Санъат оламида юлдуз бўлиб, кўпчиликнинг эътиборини қозонган санъаткор ва ижодкорларнинг баъзилари машҳурлик чўққисида ўз фаолиятини тўхтатиб, ҳаётнинг бошқа йўлларини танлаган. Уларнинг ҳар бири ўз сабабларига кўра санъатдан воз кечган. Мақолада шундай юлдузлардан бир нечтасини эслаймиз.
Актриса ва хонанда сифатида танилган Индира Билолова машҳурлик чўққисида санъатдан кетганди. 2017 йили италиялик эркак унга уйланиш учун исломни қабул қилган.
Индира “Ромео ва Жулетта”, “Телба” ва “Фериде” каби фильмларда суратга тушган. Унинг “Севги”, “Севади”, “Дунё”, “Айтолмайман” ҳамда Абдували Ражабов билан куйлаган “Муҳаббат қиссаси” дуэти ҳит бўлган.
“Вақф” хайрия жамоат фонди директори Сардор Раҳимхон ҳам собиқ хонанда. Унинг асл исми Санжар Раҳимов. У машҳурлик чўққисида санъатни тарк этиб, ҳаётида янги бурилиш ясади.
Хонанда кўпгина давлат тадбирларига қатнашиб, концертлар берган. “Ўзбекконцерт” томонидан уюштирилган бир тадбирга қатнашмагани сабабли лицензиясидан маҳрум этилган. Кейинчалик у шоу-бизнесни тарк этганини эълон қилган.
Санъаткорнинг “Ишонмасман”, “Маликам, энди қара”, “Санамжон”, “Нархи қанча меҳрни айтинг”, “Фаридам” каби қўшиқлари ҳит бўлган.
2019 йилдан хайрия-инсонпарварлик ишларига бошчилик қилиб келмоқда. Унинг бошчилигида “Юрак амри” инсонпарварлик лойиҳаси ташкил этилган.
“Виа Мароканд” гуруҳидаги Асал ҳам санъат билан хайрлашганлардан. У ижодини тўхтатиб, ҳаттоки 1 миллион 400 минг обуначиси бор Instagram саҳифасини ҳам дуэтдошига қолдириб кетган. Маълумотларга кўра, Асал оила қуриш арафасида шу қарорга келган экан.
Гуруҳнинг “Севиб қолдим”, “Ҳамма ҳаракатда”, “Танимадингми?” каби қўшиқлари ҳит бўлган.
Актёр Акбархўжа Расулов ҳам санъатни тарк этган. Унинг кинофильмдаги илк роли “Хўжа Насриддин: ўйин бошланди” фильми бўлиб, унда эпизодларда кўриниш берган. Кейинчалик “Йўқолган одам”, “Иблис девори”, “Пойма-пой”, “Кечиккан ҳаёт”, “Севгинатор 2” “Мендирман Жалолиддин” каби фильмларда рол ижро қилган.
Ўзбек миллий академик драма театри актрисаси Зилола Ғуломова ҳам машҳурликдан воз кечиб оддий ҳаётни танлаган.
Зилола Ғуломова 2019 йилда “Жанговар қайнона” телесериалида ва 2021 йилда “Аёл қасоси” фильмида бош ролларда суратга тушди. Шунингдек, “Жумбоқ” (2021), “Телба ошиқлар” (2019), “Соддагина қиз” (2013) каби фильмларда ҳам роллар ижро этган.
“Миллион” кулги жамоасининг собиқ аъзоси Миркомил Мусаев бир вақтлар ўзининг саҳнадаги ҳазил-мутойибалари билан томошабинларнинг қалбини забт этган эди. Аммо у кейинчалик санъатдан четга чиқиб, саҳнага чиқишни тўхтатди. Айни пайтда у шахсий ҳаётига кўпроқ эътибор қаратмоқда.
Алишер Ботиров ҳам “Миллион” кулги жамоасининг машҳур аъзоларидан бири бўлган. Унинг актёрлик маҳорати кўплаб мухлислар томонидан эътироф этилган. Аммо у ҳам саҳнани тарк этган. Унинг санъатдан кетиши сабаблари аниқ айтилмаган бўлса-да, ҳозирда омма орасида камнамо бўлиб қолган.
Мадина Мумтоз
Хонанда ва актриса Мадина Мумтоз ҳам санъатни бутунлай тарк этган. У турмуш ўртоғининг талаби билан фақат аёллар иштирок этадиган тўйларда қўшиқ куйларди. Аммо бир йилдан буён бундай тўйларда ҳам иштирок этмаяпти.
Мадина Мумтознинг ошпазлик курслари онлайн тарзда ўца-да, унга талаб ниҳоятда юқори. Шу билан бирга, унинг “Осиё султон” номли келин кўйлаклари салони ҳам бор.
Севара
Хонанда Севара ўзбек шоу-бизнесида ёниб чиққан хонандалардан бири эди. Афсуски, унинг ижоди узоққа чўзилмади. У оила қуриб, фарзандли бўлгач, санъатни тарк этди.
У айни кунларда Сафина исмли қизалоғининг парвариши ва “Марям” номли интернет дўконининг фаолияти билан банд.
Достон Убайдуллаев
Хонанда Сардор Раҳимхоннинг хайрли лойиҳаларига бош қўшган ҳамкасби Достон Убайдуллаев ҳам кўп ўтмай санъатни бутунлай тарк этди. Хонанда билан боғланиб, нималар билан бандлигига қизиқдик. Аммо у ҳеч қандай тижорат иши билан шуғулланмаётгани ва илм ўрганаётганини маълум қилди.
Ирода Иралиева
Улуғбек Раҳматуллаев билан куйланган “Мини юбка-2” қўшиғи билан халққа танилган хонанда Ирода Иралиева ҳам санъатни бутунлай тарк этган. Айни дамда у уч фарзанднинг онаси ва гўзал оиланинг бекаси ҳисобланади. Собиқ хонанда интервьюларининг бирида узоқ йил бефарзанд бўлгани ва Ҳақ йўлини танлагач, Аллоҳ унга ўғил фарзанд инъом этгани ҳақида сўзлаб берганди. У бор эътиборини илм ўрганиш ва фарзандларининг тарбияси билан шуғулланишга сарфлаётганини билдириб ўтган.
Бону
“Қора тун” ва “Афсона” қўшиқлари билан танилган хонанда Бону ҳам аллақачон санъатни тарк этган. Айни машҳурлик чўққисига эришганда суд иши ва жиддий хасталиги боис унинг ҳаёти бутунлай ўзгариб кетган.
У соғайгач, машина ва кўчаларга кичик реклама эълонларини тарқатиш билан шуғулланадиган фирмага ишга кирган. Ҳозирда шу фирманинг кичик ҳисобчиси бўлиб фаолият юритади.
Диёрбек Маҳкамов
Болалик чоғидан катта саҳнага чиқиб Шуҳрат Қаюмов, Манзура каби машҳур ижодкорлар билан дуэт куйлашга муваффақ бўлган. Афсуски, у ижодини 2016 йилда якунлаган.
Шерзод Бин
Шерзод Бин тахаллуси билан ижод қилган комик актёр Шерзод Саидалиев ҳам санъатни бутунлай тарк этган. У айни кунларда онаси ва турмуш ўртоғи билан бирга АҚШда истиқомат қилади.
Камола Арслонова
“Опа-сингиллар” сериалида Диёра ролини ижро этган Камола Арслонова ҳам санъатни бутунлай тарк этган. У саккиз йилдан буён Туркиянинг Измир шаҳрида яшайди. У Месут исмли кичик тадбиркорга турмушга чиққан. Уларнинг Ахсен исмли қизи бор.
Камола Арслонова қўл меҳнати билан шуғулланади, шу билан бирга, онлайн дарс ўтиб ҳунарини бошқаларга ҳам ўргатади.
Изоҳ (0)