Кўплаб актриса ва қўшиқчилар аслида шуҳрат ва эътиборни изламайди. Аксинча, улар омма билан мулоқотдан ва эътибордан тезда чарчашади. Шунга қарамай, улар муваффақиятли карьера қуришга, гастролларда иштирок этишга ва саҳнада чиқиш қилишга эришади. Улар шахсий ҳаёт ва саҳнадаги фаолият орасида қандай мувозанат топаётганларини ушбу мақолада билиб оласиз.
Билли Айлиш: Гастроллар — ҳиссий синов
23 ёшли қўшиқчи Билли Айлиш самолётда учишни, вақтлардаги тафовутни ва атрофида кўп одам бўлишини ёмон кўради. Ҳар бир гастрол сафари хонанда учун жуда қийин кечади. У ҳатто гастроллардан шу даражада чарчаганидан сочини қирдириб ташлашни ўйлаганини тан олган. Уни фақат ўз вақтида бошлаган терапия қутқарди.
Билли энергиясини мулоқот, қисқа концертлар ва ташқи дунёдан вақти-вақти билан чекиниш орқали тиклайди. У кун тартибини ўзи тузади, оммавий мулоқотни камайтиради ва ҳаддан ташқари ашаддий мухлислар ҳақида очиқ-ойдин гапиришдан тортинмайди.
Уч соатлик концертга қандай чидашади? Бу ҳақиқий тентакликку, дейди у.
Зендая: Мода ортига яширилган уятчанлик
Зендая болалигида жуда тортинчоқ эди. Ҳатто ота-онаси уни боғчада яна бир йил қолдиришга мажбур бўлган. Кейинчалик, улар қизининг ўзига бўлган ишончини ошириш учун моделликка олиб боришган.
Жамоат олдида бўлиш модел учун ҳам синов, ҳам терапияга айланди.
Мен модани ўзимга қалқон қилиб олгандим. Кўчада юрганимда ўзимни ғалати ҳис қилсамда, лекин бу кераклигини билардим, таъкидлади у.
Зендая оммавий чиқишларда ўзига ишончсизликни енгиш учун лоқайд ва мағрур кўринишга ҳаракат қилган. Бу эса уни бошқалар кўзида “кибрли” қилиб кўрсатган.
Бугунги кунда Зендая бутун дунё бўйлаб миллионлаб мухлисларга эга. Аммо хавотир ва тортинчоқлик ҳали ҳам унинг ҳамроҳи. Ҳаттоки оддий ижтимоий тармоқ пости ҳам унда хавотир уйғотади.
Адел: Саҳна қўрқуви ва уни енгиш йўли
Британиялик хонанда Адел 15 та “Гремми” мукофотига сазовор бўлган, аммо ҳанузгача саҳнага чиқишдан қаттиқ қўрқади. Адел гўёки томошабинлар уни ҳақиқий ҳаётдагидек эмас, бошқача тасаввур қилади, унинг ташқи кўринишидан, жонли ижросидан ҳафсаласи пир бўлади ва масхара қилади деб ўйлайди. Саҳнага чиқиш арафасида у ўзини ёмон ҳис қилади, ҳатто саҳнадан чиқиб кетишни хоҳлайди. Аммо мусиқанинг илк оҳанглари янграган заҳоти бу ҳислар йўқолади.
Адел болалигидан безовталик ва депрессия билан курашган. Бу ҳолатлар кўп маротаба мутахассисларга мурожаат қилишига сабаб бўлган. У ўз принципларига қарши бориб, томошабинлар учун киборли юлдуз бўлишни хоҳламайди. Аксинча, у тез орада карьерасини якунлаб, табиий қўйнида жояшган кичик уйида ёлғиз қолишни орзу қилади.
Интроверт — Лана Дел Рей
“Видео Гамес” ва бошқа машҳур қўшиқлар ижрочиси Лана болалигидан ўта таъсирчан бўлган. Оддий ҳолатлар ҳам унга фожиа бўлиб туюлган. У ўлимдан, акулалардан қўрққан, Санта-Клаус йўқлигини билиб, руҳий зарба олган. Дунё шафқатсизлигидан ўзини ҳимоя қилиш учун ёлғизликка чўмган.
Мен интровертман, тинчлик — ижод ва дам олиш учун керак, деган у интервьюларидан бирида.
У аста-секин оммавий эътиборга ўрганишга ҳаракат қилган. Аммо кўп одамлар билан мулоқот ҳанузгача унга ноқулайлик туғдиради. Шу сабабли, унинг биринчи альбоми бир неча йил жавонда чанг босиб ётган. Лана уни рекламасиз “ўз-ўзидан машҳур бўлиб кетар” деб кутган. Кейин эса дўстлари билан бирга клиплар суратга олиб, YouTube каналига жойлаштирган.
У учун идеал ҳолат — сукунат, гитара ва яқин инсон билан бирга бўлиш. Шунинг учун машҳурликни ҳам бу ҳаёт тарзига алмаштиришдан чўчимайди.
Шайлин Вудли: Карьера ва сукут ўртасидаги мувозанат
COVID-19 пандемияси даврида дунё изоляцияга тушганда, Шайлин бу ҳолатдан ростдан ҳам завқ олган кам сонли инсонлардан бири бўлган. Энди бошқа қитъаларга учиш, бегона одамларга тўла самолётларда соатлаб ўтириш, мулоқот қилиш шарт эмас эди. Актриса ўзини “квадрат интроверт” деб атайди. У машҳурлик билан боғлиқ ҳамма нарсадан жуда чарчайди.
Лекин Шайлин кино оламида жиддий карьера қилиш учун мулоқот зарурлигини тушунади. Шу сабабли, ўзини экстровертдек тутади, аммо кейин ўзини “сиқилган лимон”дек ҳис қилади. Шу сабабли у вақти-вақти билан уйига қамалиб олади ва фақат ити билан гаплашади.
Интровертлик ва шуҳрат бир-бирига зид эмас. Ушбу юлдузлар муваффақиятни ҳатто ортиқча таъсирчанлик ва ёлғизликка бўлган эҳтиёж билан ҳам эришиш мумкинлигини исботлайди. Энг муҳими ўз овозингизга қулоқ тутиш, жамоат ҳаёти ва дам олиш ўртасидаги мувозанатни топиш ва ўз ҳолатингиз ҳақида очиқ гапиришдан қўрқмаслик.
Изоҳ (0)