Ёзнинг жазирама кунларида кондиционер, ветилятор каби ҳавони салқинлаштирувчи жиҳозлар жонимизга оро киради. Кондиционердан тўғри фойдаланиш унинг узоқ йил хизмат кўрсатишини таъминлайди. Кўпчилик, кондиционер ёқилганида дераза ва эшиклар ёпиқ туриши керак, деб ҳисоблайди. Ҳақиқатдан шундайми? Қуйида ушбу саволга жавоб топишга уриниб кўрамиз.
Агар мақсадингиз хонани тез совутиш бўлса, кондиционер ёқилганда деразани ёпиш мақсадга мувофиқдир. Очиқ дераза қурилманинг самарадорлигини пасайтиради: совутилган ҳаво ташқарига чиқиб кетади, илиқ ҳаво эса ичкарига киради. Натижада компрессор узоқроқ ишлайди ва электр энергияси кўпроқ сарфланади.
Бироқ, ҳаво сифати нуқтайи назаридан, деразани узоқ вақт давомида бутунлай ёпиш хатодир. Кондиционер тоза ҳаво бермайди ва хонани кислород билан тўйинтирмайди. У фақат мавжуд ҳавони айлантириб, совутиб туради. Агар хонадаги барча дераза ва эшиклар ёпиқ бўлса, вақт ўтиши билан кислород миқдори камаяди, карбонат ангидрид гази эса кўпаяди. Бу уйқучанлик, чарчоқ ва бош оғирлигини келтириб чиқаради. Бу ҳолат, айниқса, узоқ вақт давомида бир неча киши бўлган кичик хоналарда яққол сезилади.
Энг яхши ечим — хонани мунтазам равишда шамоллатиб туришдир: ҳар соатда камида 5-10 дақиқага деразани очиб туринг. Ёки ҳаво кириш клапанлари ва филтрли вентиляция тизимларидан фойдаланинг — шунда салқинликни сақлаб, тоза ҳавога эга бўласиз. Тоза ҳаво кирмаса, ҳатто салқин хона ҳам дим бўлиб туюлади.
Изоҳ (0)