Volkswagen концерни эълон қилган кенг кўламли қисқартиришлар доирасида унинг 20 минг ходими меҳнат шартномасини муддатидан олдин бекор қилишга рози бўлди. Бу ҳақда концернинг Вольфсбургдаги бош қароргоҳида бўлиб ўтган ишлаб чиқариш кенгаши йиғилишига асосланиб, Bild газетаси хабар бермоқда.
Нашр маълумотларига кўра, уларнинг қарийб учдан икки қисми нафақага чиқади. Таъкидланишича, шундай қилиб автомобиль ишлаб чиқарувчиси харажатларни камайтириш бўйича чора-тадбирлар мажмуасини амалга оширишда сезиларли натижаларга эришмоқда.
Маълум қилинишича, мураккаб музокаралардан сўнг VW директорлар кенгаши ва ходимлар манфаатларини ҳимоя қилувчи IG Мetall саноат касаба уюшмаси ўтган йил охирида Volkswagen асосий бренди учун харажатларни қисқартириш дастури бўйича келишувга эришган. Дастур 2030 йилгача жами 35 мингта иш ўрнини, асосан концерннинг Германия Федератив Республикасидаги заводларида қисқартиришни назарда тутади. Қисқартиришлар ижтимоий жиҳатдан мақбул тарзда амалга оширилиши ва бу жараёнга жалб қилинган ходимлар ўз розиликларини беришлари лозим.
“Ходимлар ишдан бўшатиш нафақасини иш стажига қараб оладилар. Бу 400 минг еврогача етиши мумкин”, дея тушунтиради Bild.
Иш ўринларини қисқартиришдан ташқари, 2026 йилдан бошлаб Volkswagen ҳар йили таклиф қилинадиган амалиёт ўринлари сонини 1,4 мингдан 600 тагача камайтиради. Ушбу чора-тадбирлар туфайли автоконцерн ҳар йили ишчи кучи харажатларидан 1,5 миллиард евро тежашни мўлжалламоқда.
Бундан ташқари, VW’нинг 130 мингга яқин ходими иш ҳақини музлатишга рози бўлган. 5 фоизлик ошириш ўрнига, бу маблағ махсус жамғармага йўналтирилади, ушбу маблағларддан, масалан, мослашувчан иш жадваллари молиялаштирилади. Шу билан бирга, оширилган таътил нафақаси тўлови бекор қилинади.
“IG Меtall маълумотларига кўра, ушбу чоралар VW заводлари ёпилишининг олдини олган. Бироқ Германия автомобиль ишлаб чиқарувчиларининг заифлиги давом этаётганини ҳисобга олинса, бу ваъданинг узоқ муддат сақланиб қолиши гумон”, дея хулоса қилмоқда Bild.
Изоҳ (0)