2023 йилда кўплаб санъат вакиллари фарзандларининг тўйини ўтказиб, қайноталик мақомига эришди. Машҳурлар иштирокидаги тўйлар ижтимоий тармоқларда кўплаб муҳокамаларга сабаб бўлди.
Улуғбек Холмедов иккинчи марта уйланди
Ўзбекистонда хизмат кўрсатган артист Мирзабек Холмедов кенжа ўғли Улуғбек Холмедовни уйлантирди. Аммо бу биринчи никоҳ эмас, актёр бундан аввал ҳам оила қурганди. Унинг илк никоҳ тўйи 2020 йилнинг 14 июнь куни бўлиб ўтган. Карантин кучайтирилган пайт бўлгани учун Мирзабек Холмедов тўйни ҳовлисида ўтказган. Афсуски, келин-куёвларнинг муносабати узоққа бормай, узилган. 2023 йилнинг 2 июль куни Улуғбек яна оила қурди. Унинг навбатдаги тўйи ҳам дабдабали тарзда ўтказилди ва унда ўзбек санъатининг кўплаб вакиллари иштирок этди.
Фатҳулла Маъсудовнинг кенжа ўғли оила қурди
Марҳум ижодкор, Ўзбекистонда хизмат кўрсатган артист Фатҳулла Маъсудовнинг ўғли Абдуллоҳ Маъсудов ҳам бу йил бўйдоқлар сафини тарк этди. Унинг тўйи пойтахтдаги муҳташам ресторанлардан бирида бўлиб ўтди. Ёш актёр Абдуллоҳ Маъсудов наманганлик қиз билан оила қурди. Ёшларни табриклаш учун театр ва кино актёрларидан ташқари, Юлдуз Усмонова, Мавлуда Асалхўжаева, Ботир Қодиров ҳам ташриф буюрди. Куёвнинг Ёрқинхўжа Умаров билан куйлаган дуэти эса кутилмаган янгилик бўлди.
Соҳиб Аббосхон қизини узатди
Узоқ йиллардан буён АҚШда ишлаётган маҳоратли режиссёр Соҳиб Аббосхон ҳам бу йил тўй қилди. У қизини турмушга берди. Ёдингизда бўлса, икки йил аввал ҳам у қизларидан бирини турмушга берган, аммо тўйда ўзи иштирок этолмаганди. Навбатдаги тўйда эса ўзи бош-қош бўлди, шу билан бирга ўзбек санъаткорларини бир дастурхон атрофига тўплади.
Вазирнинг қизига уйланган Ёрқинхўжа Умаров
2023 йилнинг энг шов-шувли тўйларидан бири шубҳасиз Озодбек Назарбековнинг қизи Зиннурани узатгани бўлди. Машҳур ижодкор қизини хонанда Ёрқинхўжа Умаровга турмушга берди. Уларнинг никоҳ оқшоми 19 сентябрь куни бўлиб ўтди. Тўй ҳақиқий шоуга айланди. Бу тўйда қайси машҳур санъаткор келди, дегандан кўра келмаганларини тилга олиш осонроқ. Боиси, меҳмонлар орасида санъат ва маданият вакиллари ниҳоятда кўп эди. Тўй билан боғлиқ хабарлар шоу-шувга айланди, ундан кейин Зоҳида Умарованинг интервьюси эса гап-сўзларнинг янада авж олишига сабаб бўлди. Чунки у 31 ёшли ўғли, Маданият вазирининг 17 яшар қизи билан қандай танишгани ва қайнотасини қандай кўндиргани ҳақида интервью берди.
Суюнбек ҳам қудали бўлди
Суюнбек роли билан томошабинларга яхши таниш бўлган актёр Рихситилла Абдуллаев ҳам бу йил қуда бўлди. У 20 ёшли ўғли Тожираҳмонни уйлантирди. Маълумотларга кўра, келин ўғлининг параллель синфдоши бўлган ва улар беш йил аввал бир-бирига кўнгил қўйган. Асосан зодагонлар тўйида бошловчилик қиладиган Рихситилла Абдуллаевнинг тўйи ҳам ўзига хос, олий даражада ўтди.
Комик актёр қизини турмушга берди
Комик роллари билан томошабинларга яхши таниш бўлган актёр Музаффар Нуриддинов ҳам якунланган йилда қизини турмушга берди.
Музаффар Абдуазимов эса ўғлини уйлантирди
“Онам касалман, деманг” қўшиғи билан халқ меҳрини қозонган хонанда Музаффар Абдуазимов ҳам 2023 йилда ўғлини уйлантирди. Никоҳ тўйи пойтахтдаги энг муҳташам ресторанлардан бирида бўлиб ўтди. Ёшларни табриклаш учун ўзбек санъатининг кўплаб вакиллари ташриф буюрди.
Изоҳ (0)