Жаҳон тарихида кўплаб буюк инсонлар: олимлар, ёзувчилар, ихтирочилар, рассомлар ва бошқалар ўтган. Уларнинг ҳаёт йўли нафақат дарслик ва қомусларда, балки кинематографияда ҳам ўз аксини топган. Илмга бўлган ғайратингизни ошириш ва янги лойиҳалар яратишга илҳомлантириш учун буюк инсонлар ҳаёти тасвирланган фильм ва сериалларни тўпладик.
“Стив Жобс. Йўқолган интервью” (2012)
Фильмда 1995 йилда суратга олинган Стив Жобснинг журналист ва телебошловчи Роберт Кринглига берган интервьюси намойиш этилган. Ўша пайтда Apple ҳаммуассиси иштирок этган дастур эфирга чиққан, бироқ қисқартирилган кўринишда. Аммо йиллар ўтиб, йўқолган деб ҳисобланган ёзувнинг бир қисми режиссёр Пол Сеннинг гаражидан топилади.
“Стивен Хокинг олами” (2014)
Физика талабаси Стивен Хокинг ва келажакда санъацҳунос бўлмоқчи бўлган Жейн Уайлднинг муҳаббат қиссаси. Фильм бир лаҳзада ҳамма нарса ўзгариб кетиши мумкинлиги ҳақида ҳикоя қилади. Дастлаб сиз бахтли, интилувчан, дунёни англашга чанқоқ ёш олимсиз, кейинчалик эса даҳшатли ташхис туфайли ҳаётингиз учун курашишга мажбур бўлган инсонга айланасиз. Бу оғир даврда Жейн олимнинг суянчига айланади.
“Даҳо” (2017)
Сериалда нисбийлик назариясини яратиб, тарихга кирган физик Алберт Эйнштейннинг ҳаёти ҳақида ҳикоя қилинади. Фильм воқеалари ўқитувчилари ишонмаган, истеъдодсиз деб ҳисоблаган одам ҳақида сўзлайди, аммо бу унинг буюк бўлишига тўсқинлик қила олмади.
“Леонардо” (2021 йил)
Сериалда Леонардо да Винчи ва модел Катерина да Кремонанинг муносабатлари ҳақида сўз боради. Воқеалар бир расмнинг йўқолиши ва қизнинг ўлдирилиши фонида кечади — бу фожиада рассом айбланади. Терговчилар вазиятни аниқламоқчи бўлиб, Леонардони сўроқ қилаётганда, унинг ҳаёти ва ижодининг муҳим босқичлари намойиш қилинади.
“Оппенгеймер” (2023)
Иккинчи жаҳон уруши даврида ядро қуролини яратиш устида ишлаб, Манхеттен лойиҳасига раҳбарлик қилган физик Роберт Оппенгеймер ҳақидаги кескин сюжетли драма. Олим ўз ишланмалари туфайли “атом бомбасининг отаси” деган номга сазовор бўлган.
“Тетрис” (2023)
Сюжет марказида “Тетрис” номли машҳур ўйинни ўйлаб топган совет дастурчиси Алексей Пажитнов туради. Бу ўйин Лас-Вегасдаги кўргазмада тақдим этилгач, америкалик тадбиркор Хенк Рожерснинг эътиборини тортади. Ўйин ҳақиқий шов-шувга айланишини англаган Рожерс Совуқ уруш даврида ўйин ҳуқуқларини сотиб олиш учун СССРга боришга қарор қилади.
Изоҳ (0)