Уларни фильмлардан ва журнал муқоваларидаги расмларидан таниганмиз. 2000 йилларнинг энг ёрқин француз юлдузларини ёдга оламиз.

Одри Тоту

Жан-Пьер Жене томонидан суратга олинган “Амели” фильмидаги Одри Тотуни кўриб, қанча қизлар сочларини кесган. Бироқ бир нарса аниқ: жигарранг кўзли бу ёш актриса бутун дунё учун ҳақиқий француз аёлининг тимсоли бўлиб қолди. Дастлаб у муаллифлик лойиҳаларида рол ижро этган бўлса, 2000 йиллар охирига келиб “Да Винчи коди” фильмида суратга тушиб, жаҳон миқёсидаги юлдузга айланди.

2009 йилда Одри Тоту Chanel билан шартнома тузиб, Chanel Но.5 юзига айланди. Актриса бош ролни ижро этган “Тунги поезд” номли реклама мини-фильмини яна ўша Жене суратга олди. Кейинчалик эса Тоту “Коко Шанель” фильмида Шанелнинг ўзини гавдалантирди.

2019 йилда актриса қатъий қарор қабул қилиб, кинодаги фаолиятини тўхтатди. Камера олдида туриш ўрнига, Тоту ўзи камера ортига ўтди ва фотосуратга бўлган кўп йиллик муҳаббатини янги касбга айлантирди. У кўп йиллар давомида, масалан, “Амели” фильмининг катта муваффақиятидан сўнг актрисадан интервью олиш учун келган журналистларни суратга олганди. 2017 йилда эса у биринчи кўргазмасини очди.

Ҳозирда 47 ёшли Одри Тотуни эски амплуасида фақат театр саҳнасида кўриш мумкин — январь ойида актриса Освенсимда ҳалок бўлган яҳудий рассоми Шарлотта Соломон ролида намоён бўлди. У, шунингдек, Катрин Денев билан биргаликда битта фильмда суратга тушишни орзу қилади. Бошқа томондан, Тоту баъзида шахсий ҳаёти ҳақида озгина маълумот олиш мумкин бўлган суҳбатлар беради. Одри 2018 йилда қиз фарзанд асраб олди — у қизига имкон қадар кўпроқ меҳр ва эътибор беришга ҳаракат қилади.

Ализе

Ализе Жакотте болалигидан рақс ва қўшиқ билан шуғулланган, 15 ёшида “Янги юлдуз” танловида энг ёш ижрочи сифатида мукофот олган, Фармер-Бутонна ижодий жуфтлиги эса айнан шундай хонандани излаётган эди. 2000 йилда “Moi... Lolita” сингли чиқади ва 16 ёшли қиз аввал Францияни, сўнгра бутун Европани лол қолдиради. “Gourmandises” номли дебют альбоми платина мақомига эришади, яъни атиги уч ой ичида 300 минг нусхада сотилади.

Бироқ Ализе кўплаб ёш ижрочиларга хос бўлган хатога йўл қўйди: у машҳурликни ҳис қилгач, Фармер ва Бутоннинг продюсерлик қарорларига қарши чиқди ва натижада улар билан алоқаларини узди.

Устозларисиз Ализе яна бир нечта альбомлар чиқарди, аммо уларнинг биронтаси ҳам унинг дастлабки ишлари шуҳратига ета олмади. Шундай бўлса-да, қўшиқчи фаолиятини давом эттирди — у вақти-вақти билан муҳтожларга овқат етказиб беришга кўмаклашадиган “Қалб ресторанлари” жамғармасини қўллаб-қувватлаш учун концертлар беради.

Фаолиятидаги танаффусдан сўнг Ализе умидсизликка тушмасдан, классикадан фламенкогача ва қайтадан рақсга қайтди, хореограф сифатида ишлади ҳамда 2013 йилда “Юлдузлар билан рақс” кўрсатувининг француз версиясига ташриф буюрди. Бу ажойиб муваффақият эди: дастурда қатнашиб, Ализе барча йўналишларда ғалаба қозонди. У нафақат шоу ғолиби бўлди, балки Франция миқёсида машҳурлигини қайтариб олди, бу эса унга мусиқага қайтиш имконини берди. Бундан ташқари, Ализе ўз севгисини топди.

Икки мингинчи йиллар бошида у моделер Жереми Шатленга турмушга чиқиб, ундан қиз фарзанд кўрганди. Никоҳ анча вақт давом этди, аммо 2012 йилда эр-хотин ажрашди. “Юлдузлар билан рақс” лойиҳасида эса Ализе шериги — раққос Грегуар Лионнега кўнгил қўйди. Улар 2016 йилда турмуш қурган, яна бир қизни тарбиялашмоқда ва катта рақс мактабини очишган.

2024 йилда у Европада бир нечта концертлар бериш учун саҳнага қайтди. 2025 йилда эса у Париждаги Олимпия концерт залида катта концерт ўтказишни режалаштирмоқда.

Марион Котияр

Актриса 90 йиллар охирида Люк Бессон қаламига мансуб афсонавий “Такси” фильмида бош қаҳрамоннинг жаҳлдор ва мафтункор севгилиси ролини ижро этди. Бироқ айнан 2000 йилларда дунё ўткир нигоҳли француз аёлини Франциянинг энг муҳим тимсолларидан бирини — Эдит Пиафни гавдалантиришга қодир бўлган жиддий актриса сифатида тан олди. 2008 йилда “чумчуқча” роли учун Котияр илк “Оскар”ини қўлга киритди, сўнгра режиссёр Кристофер Нолан жамоасига қўшилди.

Марион Котияр кинодаги дастлабки муваффақиятларидан бошлаб Chanel уйига бўлган мода садоқатини сақлаб келмоқда. Бироқ унга Chanel Nо 5 атирининг реклама юзи вазифасини фақатгина 2020 йилда ишониб топширишди. Актриса “Ойда рақс тушиш” номли романтик роликда суратга тушди ва Лорде томонидан ёзилган Team қўшиғини ўзи ижро этди.

Ҳозирда Марион Котияр Иккинчи жаҳон уруши давридаги америкалик фотомухбир Ли Миллер ҳақидаги “Ли” фильмининг премерасига тайёргарлик кўрмоқда. Ушбу фильмда Котияр урушдан олдинги француз Vogue журнали муҳаррири Соланж д’Аен ролини ижро этган. Бундан ташқари, актриса яқинда Артюр Онеггернинг ораториясига асосланган “Жанна д’Арк гулханда” спектакллар туркумини якунлади.

Марион Котияр ҳам шахсий ҳаётини яширади. Актрисанинг актёр ва режиссёр Гиём Каньедан икки фарзанди бор, аммо бу маълумотлар Котиярнинг ўзининг ошкор қилишидан эмас, балки журналистларнинг изланишлари туфайли маълум бўлган. Жуфтликни ватанида “Француз Бранжелинаси” деб аташади, чунки Канье ва Котияр бир пайтлар Жоли ва Питт каби никоҳдан қочишга ҳаракат қилишади.

Ванесса Паради

Икки мингинчи йилларга келиб, Ванесса Паради ўзининг биринчи рақамли ҳити — ўсмирлик даврида ёзилган ““Joe le Taxi” қўшиғи билан аллақачон машҳур бўлганди. Жонни Депп билан муносабатлари бошланган пайтда Паради Европа юлдузи, Жонни эса ёш актёр эди. Икки мингинчи йилларга келиб эса, уларнинг иккаласи ҳам санъат оламининг энг эътиборли сиймоларига айланишди.

Ванесса Парадининг актёрлик карьераси ҳар доим ҳам текис кечмаган бўлса-да, мусиқа соҳасида уни Францияда деярли ҳар доим илиқ кутиб олишган. Шундай қилиб, Паради рекорд даражада тез-тез йилнинг энг яхши қўшиқчиси унвонига сазовор бўлди (1990-, 2008 ва 2014 йилларда), жуда кўп гастролларда қатнашди ва янги альбомлар ёзди, кўпинча ёш мустақил муаллифлар билан ҳамкорлик қилди.

Шубҳасиз, сўнгги йилларда Ванесса Парадининг номи кўпроқ унинг собиқ турмуш ўртоғи атрофидаги жанжал билан боғлиқ ҳолда тилга олинган. Жонни Депп Эмбер Херд билан ажрим сабаб судлашаётган пайтда айнан Паради уни ҳимоя қилиб чиқди ва уларнинг биргаликдаги ҳаёти давомида Депп ҳеч қачон Херднинг айбловларига ўхшаш бирор нарсани ўзига раво кўрмаганини тасдиқлади.

Ҳозирда Ванесса Паради ёзувчи ва режиссёр Самуэл Беншетри билан турмуш қурган. 2024 йилда қўшиқчи концертлар берди. Худди онаси каби шаҳло кўзли ва жозибадор қизи Лили-Роуз Депп эса Chanel юзи ҳисобланади.