Британиялик актриса Кетрин Зета-Жонс 25 сентябрь куни 55 ёшини нишонлади. Машҳур актриса Буюк Британияда жойлашган Уэлсда туғилган. Унинг отаси ширинлик фабрикаси эгаси, онаси эса тикувчи бўлган. Болалигиданоқ Кетрин актёрлик касбини орзу қилган, шунинг учун у мактабни ташлаб, мусиқа санъати ва театр йўналиши бўйича санъат коллежига ўқишга киради.
Кўп ўтмай, Зета Жонс маҳаллий театрда рол ўйнай бошлайди. 14 ёшида у мюзиклдаги рол учун кастингдан ўтади. 18 ёшга келиб, актриса яна бир нечта саҳна асарларида иштирок этади.
Натижада Кетрин Зета-Жонс фильмдаги илк дебютини “1001 кеча” фильмида амалга оширади.
Актрисага янада кўпроқ машҳурлик келтирган комедия “The Darling Buds of May”даги роли бўлади. Кейинчалик у секин-аста катта кино ва сериалларда кўриниш бера бошлайди. Хусусан, Кетриннинг карьерасини тубдан ўзгартирган “Титаник” сериали бўлди, чунки сериалдан сўнг актриса машҳур режиссёр Стивен Спилбергнинг эътиборига тушади. У Зета-Жонсни ҳамкасби Мартин Кембеллга актриса сифатида тавсия қилди. Натижада юлдуз “Зорро ниқоби” фильмида рол ўйнайди ва “Тузоқ”, “Руҳлар” ва бошқа фильмлар орқали Голливудда тезда машҳурлик қозона бошлайди.
Актрисага кўплаб танқидлар ва эътироф “Трафик” ва “Чикаго” фильмларидан кейин келади. “Чикаго”да у “Энг яхши ёрдамчи актриса” номинациясида “Оскар” мукофотини қўлга киритади.
Келгуси ўн йил давомида актриса машҳурликнинг чўққисида туриб, “Оушеннинг 12 дўсти”, “Терминал” комедияси ва “Ҳаёт лаззати” романтик комедияси каби бир қатор фильмларда рол ўйнайди.
Қизиғи, Кетрин Зета-Жонс 1990 йилларда бир оз вақт мусиқа билан шуғулланган. Унинг рэпертуарида “In the Arms of Love”, “I Cаn’t Help Myself” ва “True Love Ways” каби қўшиқлар мавжуд.
Зета-Жонс бир неча йил давомида ўзини карьерасига доимий равишда бағишлаганидан сўнг, у иштирок этадиган лойиҳаларни янада эҳтиёткорлик билан танлай бошлади. Актриса кўплаб марта карьерасидан танаффус олиб, вақтини ўзига ва оиласига бағишлашга ҳаракат қилади.
Сўнгги йилларда актриса машҳур “Уэнздей” сериалида рол ўйнайди, бир неча реклама кампанияларида иштирок этиб, ҳозирда ҳам турли хил хайрия ташаббусларини қўллаб-қувватлайди.
Шунингдек, актриса 55 ёшида ажойиб кўриниши сир эмас. Кетриннинг сўзларига кўра, у пластик операция қилдирмаган. Унинг ёшликни сақлаш сирлари анча оддий: қайта ишланмаган овқатлар, кўпроқ суюқлик ичиш ва спорт. Аёлларнинг қариш жараёнини ҳисобга олган ҳолда, актриса 40 ёшдан ошган аёлларга фильмларда жуда кам рол берилишини танқид қилиб, ўзгаришларни талаб қилган.
Кетрин Зета-Жонс ўзидан 25 ёш катта бўлган актёр Майкл Дуглас билан тахминан 24 йилдан бери бахтли яшайди — жуфтликнинг 23 ёшли ўғли Дилан ва 21 ёшли қизи Керис бор.
Уларни шоу-бизнеснинг энг мустаҳкам жуфтликларидан бири деб аташади. Дугласнинг сўзларига кўра, уни актрисадаги нафақат профессионал ижро, балки голфга бўлган қизиқиши ҳам мафтун қилган.
Бироқ эр-хотин ўртасидаги муносабатлар ҳар доим ҳам идеал бўлмаган. 2010 йилда Майклга томоқ саратони ташхиси қўйилган, кейинги йилда эса Кетрин биполяр бузилишдан даволанади. Бир-бирларини қўллаб-қувватлашлари туфайли иккаласи ҳам тўлиқ даволанган. Ҳозирда бахтли оила сифатида улар ижтимоий тармоқларда болалари билан бирга саёҳат қилгани ёки ёлғиз вақт ўтказганини обунчилари билан баҳам кўради.
Изоҳ (0)