Ўзбек шоу-бизнесининг таниқли вакилларидан бири бўлган Райҳон Ғаниева 16 сентябрь куни 45 ёшни қаршилади. Ижодда омади кулган хонанда ҳаётда кўплаб қийин кунларни бошдан кечирган. Хўш, ижодкорни нималар қийнаган, шахсий ҳаётидаги зарбалар унга қандай таъсир этган? Қуйида шу ҳақда сўз юритилади.
1978 йилнинг 16 сентябрида Тошкентда таваллуд топган Райҳон Ғаниева учун санъат олами бегона эмас. Унинг отаси ҳам, катта бобоси ҳам санъатнинг энг кўзга кўринган вакиллари бўлишган.
Хонанданинг катта бобоси Наби Ғаниев ўз даврининг машҳур актёр ва режиссёри бўлган. У ўзбек кино санъатининг нодир дурдона фильмлари: “Насриддин Бухорода” (1943), “Тоҳир ва Зуҳра” (1945), “Насриддиннинг саргузаштлари” (1946) ва “Фарғона қизи” (1948) кабиларни суратга олган. Унинг тўрт фарзанди бўлиб, уларнинг бирортаси санъаткор бўлишни истамайди. Фақатгина ўғли Ҳотамнинг фарзанди Отабек Ғаниев бобосининг касбини давом эттиради.
Отабек Ғаниев 1977 йили актриса Тамара Шакирова билан оила қуради. Икки ижодкорнинг муҳаббатидан қўнғироқ сочли қизалоқ Райҳон дунёга келади. Аввалига ҳаммаси яхши эди. Отабек Ғаниев энг яхши ролларни ижро этаётган пайтда бахтсиз ҳодисага учраб, вафот этади. Ўшанда Райҳон Ғаниева 6 ёшли қизалоқ эди. Оила бошининг эрта вафоти яқинларига осон кечмагани аниқ.
Тамара Шокирова бор эътиборини ижодга қаратади, нафақат ўзбек, балки озарбайжон ва ҳинд киноижодкорлари билан ҳам ҳамкорликни йўлга қўяди. 1993 йилгача ўндан ортиқ фильмларда суратга тушиб, сўнг иккинчи бор оила қуради. Бу никоҳидан яна бир қиз фарзандли бўлади ва унга Насиба деб исм қўяди.
— Биласизми, кўпчилик болалик энг бахтли давр дейди. Аммо мен ўзимнинг болалигим ҳақида бундай деёлмайман. Чунки болалигим бахтли ва қувончли бўлмаган. Шунинг учун ҳам у кунларни эслашни истамайман. Лекин 12 яшарлигимда ойим менга кучукча совға қилгани бугунгача ёдимда. Узоқ вақт орзу қилган нарсамга эга бўлганимдан роса хурсанд бўлгандим, — дейди хонанда интервьюларининг бирида.
Хонанда илк ёшидаёқ фильмда суратга тушган. У 1980 йили “Ўзбекфильм” киностудияси томонидан суратга олинган “Ленинградлик болаларим” фильмида Ҳадичанинг фарзанди ролини ижро этган. Ҳадича ролини эса онаси Тамара Шокирова ижро этган.
Райҳон санъаткорлар оиласида туғилган бўлишига қарамай, онаси унинг бу касбни эгаллашига жиддий қаршилик кўрсатади.
— Онам аввалига санъаткор бўлишимни истамаган. Нега бундай қилганини аниқ билмайман. Аммо кейинчалик ўзи қўллаб-қувватлади. Аммо санъатга бўлган қизиқишим, хоҳишим барча қийинчиликларни енгиб ўтишимга куч берганди, — дейди хонанда интервьюларининг бирида.
Ўзбекистон Давлат жаҳон тиллари университетининг инглиз филологияси факультетини тамомлаган Райҳон Ғаниева 1999 йили профессионал ижодга қадам қўяди. У илк бор 2000 йили суратга олинган “Тоҳир ва Зуҳра” мусиқали фильмидаги қўшиғи билан одамлар тилига тушади. Ўша даврларда хонандалар бугунгидек кўп бўлмаган. Шу сабаб ҳам Райҳоннинг қўшиқлари замонавий ёшлар орасида тез оммалашган ва хонанда 2002 йилда илк яккахон концерт дастурини тақдим этишга муваффақ бўлган. Омад келса, бирваракайига келади, деганларидек, хонанда 2002 йилда “Ниҳол” мукофоти совриндорига айланди.
Аммо одамлар орасида “Райҳон Ғаниева оққон, саратон экан. Шу боис унга кетма-кет мукофот топширишяпти”, деган гап-сўзлар ҳам тарқалади. Аммо хонанда бу каби миш-мишларга эътибор бермай, ижод қилади. Кетма-кет яратилган ҳит қўшиқлар “Йилнинг энг яхши аёл хонандаси”, “Йил қўшиғи”, “Йилнинг энг яхши альбоми” мукофотларини қўлга киритишига сабаб бўлади.
Райҳон Ғаниева ижодининг энг гуллаган даврлари 2005—2010 йилларга тўғри келади. Ўша йилларда яратилган қўшиқлар эса ҳамон мухлислар тилидан тушмай келяпти. “Ёдингдами?”, “Кечир”, “Орзунгга ишон”, “Доимо”, “Бака-бака банг” каби қўшиқлари тингловчилар тилидан тилига ўтиб келмоқда. Хонанданинг ҳар йилги концерт дастурини эса мухлислар интиқлик билан кутарди. У ўзбек хонандалари ичида шоу-концертлар тақдим этишда, янгиликка қўл уришда ҳамон пешқадам бўлиб келмоқда.
Райҳон Ғаниева ижоди давомида ўзини актрисаликда ҳам синаб кўрди. У иштирок этган “Кечир” фильмини томошабинлар илиқ кутиб олган. У мазкур фильмнинг сценарийсини ўзи ёзган ва картинада шоу-бизнес оламидаги иллатларни очиб беришга ҳаракат қилган.
— “Кечир” фильмидан кейин кино соҳасига қўл урмасликка қарор қилганман. Жуда қийин ва узоқ вақт сарфланадиган иш экан. Ўша пайтда фильмларга ҳам таклифлар жуда кўп бўлган. Вақтим тиғизлиги учун барчасини рад этганман, — дейди хонанда интервьюларининг бирида.
2012 йил Райҳон Ғаниева учун ҳам қайғули, ҳам қувончли келди. У 2012 йилнинг февраль ойида волидаси Тамара Шокировани йўқотди. Актриса оғир хасталик сабаб оламдан кўз юмди. Кўп ўтмай, ноябрь ойида хонанда ўз бахтини топди. 34 ёшида Райҳон актёр Йигитали Мамажоновга турмушга чиқди. Бироқ уларнинг турмуши узоққа чўзилмади. Райҳон икки эгизакнинг онаси бўлгач, Йигитали Мамажонов билан ажрашди.
— Эрим учун ўз вақтида овқатини тайёрладим, кийимларини дазмолладим, кирини ювдим… Уйимни сариштали ва шинам тутдим. Кўп аёллар каби эримдан қанча пул топаётганини сўрамадим, — деганди хонанда Райҳон.
Хонанданинг сўзларига кўра, у “нима бўлишидан қатъи назар” Йигиталини тушунишга, ундан айб изламасликка ҳаракат қилган. “Ёшимиздаги фарқ 12 йил. Мен ҳам унинг ёшидаги давримни кўз олдимга келтириб, тўғри ва адолатли муносабатда бўлишга интилдим, — деганди Райҳон.
Райҳон айнан нима сабабдан Йигитали Мамажонов билан ажрашаётганини маълум қилмаган, фақат турмушида “жуда мураккаб вазият юзага келгани” сабаб ажрашишга қарор қилганини айтган.
Райҳон Ғаниева фарзандли бўлишни узоқ вақт орзиқиб кутган. 2014 йили бир эмас, иккита ўғил фарзандларни дунёга келтирди. Ўша пайтда болаларни отасидан ажратиш унга ҳам осон кечмагани аниқ.
Фарзандларим отасини сўрайди, албатта. Улар тез-тез кўришиб туради. Бундан ташқари, мен ўзим Йигиталидан улар билан тез-тез кўришишини, мулоқот қилишини сўрайман. Ҳар доим фарзандларимни отасини ҳурмат қилишга, севишга ўргатаман, чунки у ўғилларимнинг отаси.
Ўғилларим ҳозирги турмуш ўртоғим билан ҳам дўстона муносабатда. Ўз ўрнида, мен ҳам турмуш ўртоғимнинг фарзандлари билан яхши муносабатдаман, улар билан дўст тутинганман, — деганди хонанда интервьюсида.
Хонанда 2015 йили расман ажрашди ва орадан бир йил ўтиб, турмушга чиқаётгани ҳақида хабарлар тарқалди. У бошловчи Фарҳод Алимов билан оила қурди. Фақатгина навбатдаги тўй бошқача бўлди. Хонанда тўйи аввалгидек дабдаба билан ўтишини истамади. Аммо Фарҳод Алимовнинг учта фарзанди борлигини билган баъзи негативчилар хонандани оилабузарликда айблашди.
— Райҳонни оила қурмасдан аввал ҳам яхши танирдим. Чунки иккимиз ҳам шоу-бизнесда фаолият юритамиз. Райҳон билан оила қурмасимиздан анча йил аввал ажрашгандим. Собиқ турмуш ўртоғим билан дўстона муносабатда эдик, аммо эр-хотин сифатида бир-биримизни тушунмаганмиз. Фарзандларимни яхши кўраман, улар билан ҳафтасига 2-3 бор бирга бўламиз, — деганди Фарҳод Алимов негативчиларга қарата.
— Мен бировнинг оиласини бузмайман ва оилалар мустаҳкам бўлиши тарафдориман. Ҳамма инсон бахтли бўлишга ҳақли, — деганди Райҳон Ғаниева интервьюларининг бирида.
Фарҳод Алимов билан қурилган оила узоққа бормайди, деб ҳисоблаганлар ҳам бўлган. Аммо Райҳон отани болаларидан ажратмайдиган инсон эканлигини исботлай олди. У турмуш ўртоғининг фарзандларини оилавий сафарларга олиб боради. Суратларни ижтимоий тармоқлардаги саҳифаларига жойлашни ҳам канда қилмайди.
Райҳон ўзбек шоу-бизнесидаги энг тартибли хонандалардан бири. У кунини тўғри тақсимлашни ва ортиқча инсонларга вақт сарфлашни ёмон кўради.
— Энг севимли машғулотим фарзандларим билан бирга бўлиш. Мен болаларим билан бирга бўлсам дам оламан, — дейди хонанда интервьюларининг бирида.
Айни кунда бадавлат ўзбек хонандасининг ҳаёти ана шундай ранг-барангликларга бой. Қисқа қилиб айтганда, у ҳам юлдуз бўлиб туғилмаган ва осонликча бугунги кунларга етган эмас.
Изоҳ (0)