Икки машҳур ижодкор оиласида туғилган Бобур Йўлдошев болаликдан санъат ичида камол топган. Кун келиб унинг машҳур санъаткор бўлишига ҳеч ким шубҳа қилмасди. Газли сув ичаётганида тасодифан кинокадрда кўриниб қолган Бобур Йўлдошев фаолияти қандай бошланган?
“Туғилганимда отам сафарда бўлган экан”
Бобур Йўлдошев 1979 йилнинг 16 январь куни Тошкент шаҳрида дунёга келган. У икки қиз фарзанддан кейин туғилган ўғил бўлгани учун ҳам ота-онасини янада севинтирган.
— Мен туғилганимда отам Москвадан Попов медалини олиб қайтаётган бўлган. Аэропортда Тўти опанинг турмуш ўртоқлари Мирғиёс Соатов суюнчи олган экан. Исмимни эса отамнинг дадаси, бобом раҳматли қўйган. Болаликда жуда шўх, ўйинқароқ бола бўлганман. Отам театрда, онам эса дубляжда ишларди. Гоҳ театрга, гоҳ дубляж студиясига олиб боришарди. Уйимизда шунчаки суҳбатлар бўлганини, ота-онам бекор ўтирганини эслолмайман. Уларнинг иккиси ҳам кўп китоб ўқирди. Тинимсиз ижод ҳақида гаплашарди. Ўша вақтда уларнинг машҳур санъаткор эканлигини ҳис қилмаганман, — дейди актёр Бобур Йўлдошев.
“Дадамга болангиз тиланчилик қиляпти, дейишган”
Актёр болалиги билан боғлиқ қизиқарли воқеани сўзлаб берди.
— Ўша вақтда 5-6 ёшлардаги бола эдим. Рихсивой Авазовнинг ўғли билан собиқ Ҳамза театрининг ҳовлисида ўйнаб юргандик. Сал нарида 10 тийиндан музқаймоқ сотаётган экан. Роса егимиз келди. Шунда театрда ишлайдиган актёрлардан бири ўтиб қолди. “20 тийин беролмайсизми, роса музқаймоқ егимиз келяпти”, дедик. У “ҳўп” деб берди-ю, аммо дадамга “Ўғлингиз кўча бошида пул сўраб турган экан, берақолдим”, дебди. Бир пайт дадам раҳматли жаҳл билан чиқиб “Тиланчиликни театрда эмас, сал нарида қилсанг бўлмайдими, бу ерда мени ҳамма танийди-ку” деганди, — дейди Бобур Йўлдошев.
“Жанжалда бир йигит майиб бўлганди...”
Актёр болалигида шўх бола бўлгани ва 13 ёшида безори болалар жанжалига гувоҳ бўлгани ҳақида сўзлаб берди.
—Эрка бўлганман, деёлмайман, чунки дадам ниҳоятда қаттиққўл инсон эди. Аммо роса шўх ва кўча ҳаётига қизиқадиган бола бўлганман. 13 ёшимда Хадрада катта жанжалнинг гувоҳи бўлганман. Ўшанда шунчаки ҳазиллашиб уришиш натижасида бир бола бутун умрга майиб бўлиб қолган. Бу гап роса овоза бўлганди. Ўшанда дадам олдига чақириб “Агар шу йўлдан кетсанг, охири вой бўлади, майиб бўлганнинг ўрнида сен ёки дўстинг бўлиши мумкин эди”, деган. Шу гапдан кейин ҳаётимни бутунлай ўзгартиришга қарор қилганман. Онам билан дубляж студияларига қатнашни бошлаганман. Кичик ёшдаги болалар ролига овоз берардим. Аммо ўзбек тилида яхши гапиролмасдим, — дейди Бобур Йўлдошев.
“Тузукроқ овқат тополмаган кунларимиз ҳам бўлган”
Баҳодир Йўлдошев ва Римма Аҳмедова хонадонида туғилган Бобур Йўлдошев ҳам моддий қийинчиликларга учраганига ишониш қийин. Аммо Ўзбекистон мустақилликка эришган йиллари улар ҳам молиявий қийинчиликларга учраганини қуйидагича хотирлайди.
— 1992—93 йилларда кўпчилик қийин кунларни бошдан кечирган. Театрда ойлик йўқ, кинолар эса умуман суратга олинмай қўйган пайтлар эди. Фақатгина дубляжга чақириб туришарди, шу боис онам кўпроқ ишларди. Жуда қийин кунларни бошдан кечирганмиз. Тамакининг хумори тутганда қолдиқларини чеккан, ҳатто ейишга тузукроқ таом тополмаган кунларимиз ҳам бўлган, — дейди Бобур Йўлдошев.
“Онам 10 йил саратон билан курашди”
Актёр онаси билан боғлиқ энг ширин хотиралари ва унинг оғир касалликдан вафот этгани ҳақида эслади.
— Ошни жуда яхши кўраман, кунига беш маҳал ош беришса ҳам рад этмай еявераман. Онам буни яхши билгани учун соат нечада келишимдан қатъи назар дўппидеккина ош қилиб кутиб оларди. Кечаси келганимда ҳам биргалашиб ош ердик. Ҳамманинг онаси ўзига яхши, аммо ҳақиқатан ҳам менинг раҳматли онам тилло аёл бўлган. Ҳеч кимга оғир гапирмасди, ақлли аёл эди. Онам 10 йил саратон билан курашди. Айниқса, умрининг сўнгги кунларида жуда қийналди. Афсуски, ўша вақтда сёмкалар ёки театрда иш сабаб, ёнида кўп бўлолмадим. Ҳозир бу ҳақида ўйласам юрагим сиқилади. Ўша пайтда онамга қанчалик керак бўлганимни ҳис қиламан, — дейди актёр Бобур Йўлдошев.
Грек қизи билан оила қурган
Бобур Йўлдошев икки марта оила қурган. Афсуски, ўғил ва қиз фарзандли бўлганидан кейин улар ажрашишга қарор қилган. Аммо актёр бу ҳақида гапиришни унчалик истамайди. Кейин актёр грек миллатига мансуб Анна Марисина исмли қизга уйланган, бир қиз ва бир ўғил фарзандли бўлган. Актёрнинг биринчи турмушидан бўлган фарзандлари билан муносабатлари яхши. У Instagram тармоғида тўрт фарзанди билан тушган суратларини тез-тез жойлайди.
— Ҳаётда эр-хотин бир-бирини тўлдириши, куч бера олиши жуда муҳим. Бу нафақат оиладаги муҳитга, балки фарзандларнинг руҳиятига ҳам яхши таъсир қилади. Аёлимни ҳурмат қиламан, чунки у мени тушунади, — дейди актёр Бобур Йўлдошев.
“Менга шунчаки омад кулиб боққан”
Актёр ўзини у қадар қобилиятли деб билмаслиги, шунчаки муҳим вазиятда омад кулиб боққани ҳақида айтди.
— Ота-онанинг қобилияти ҳар доим ҳам фарзандда такрорланмайди. Агар шундай бўлганида мен энг зўр режиссёр ёки дубляж қироли бўлишим керак эди. Менимча, бу борада табиат хатога йўл қўйган. Ўзимни қобилиятли актёр деб билмайман. Шунчаки омад кулиб боққан. Чунки йилига элликдан зиёд актёр ва актрисалар институтни тамомлайди. Уларнинг ҳаммасига ҳам омад кулиб боқмайди.
Менга омад олиб келган рол шубҳасиз “Сардор” ва “Остона” сериаллари бўлган. Ундан кейин “Севинч”, — дейди актёр.
“Режиссёр бу ролни беришни истамаган”
Бобур Йўлдошев “Ватан” фильмида Қурбон ролини ижро этишни истагани аммо режиссёр бу ролни Музаффар Саъдуллаевга бергани ҳақида гапирди.
— Бир марта имкон беринг, Қурбонни ижро этай деб роса сўраганман. Аммо Зулфиқор Мусоқов мени бу ролда кўролмаган. Ўйлаб қарасам бу тўғри танлов бўлган, нафақат мен балки бошқа актёр ҳам уни Музаффардек ишончли ижро этолмасди. Режиссёрнинг ютуғи, ҳаммасини олдиндан кўра олишида деб бежиз айтишмайди. “Ўтов” фильмидаги ота ролини ҳам ижро этгим келади. Нозим Тўлахўжаев ролни маромига етказиб ижро этган, аммо мен ҳам шу ролда ўзимни кўргим келган. Унда катта дард ва ички алам бор, — дейди актёр Бобур Йўлдошев.
Нафақага чиққан актёр
Бобур Йўлдошев 28 йил давомида Ёш томошабинлар театрида фаолият юритиб, нафақага чиққан. Айни пайтда отаси Баҳодир Йўлдошев асос солган “Дийдор” театр студиясига раҳбарлик қилади. Студияда Акбархўжа Расулов, Юлдуз Ражабова ва Адиз Ражабов каби машҳур актёрлар ҳам ишлайди.
Изоҳ (0)