Миркомил Мусаев ҳаммадан узр сўради, меҳмон санъаткор ажаблантирди. “Миллион”нинг YouTube’га чиқмайдиган янги концертидан репортаж (видео)

“Миллион” кулги жамоасининг 1 май куни “Халқлар  дўстлиги” санъат саройидаги 12 кунлик концерт дастурига старт берди. “Дарё” мухбирлари концерт дастуридан репортаж тайёрлади.

Шу йили “Миллион” кулги жамоасининг 10 йиллик юбилей концерт дастури мухлисларга тақдим этилмоқда. Концерт дастурида оилавий, жамиятдаги айрим муаммолар ҳазил талқинида намойиш этилган ва мусиқий чиқишлар ўрин олган.

Концерт дастури аввалида “Миллион” кулги жамоасининг 10 йиллик чиқиши давомида кўрсатилган энг яхши ҳазиллар жамланмаси мухлисларга тақдим этилди.

“Миллион” кулги жамоаси етакчиси Даврон Кабулов янги концерт дастурини тақдим этишдан олдин жамоа таркибида кўп ўзгаришлар бўлганини, яъни актёр Миркомил Мусаев жамоани тарк этганини ва янги аъзолар қўшилганини маълум қилди.

Шунингдек “Космос” жамоаси таркибида ҳам ўзгариш бўлган.

“Бу йил ‘Миллион’ жамоасининг 10 йиллик юбилейи. Рэпертуар тузишда халқ муаммоларини юмор сифатида кўрсатиб беришга ҳаракат қилинди. Кулгили нарса бўлса ҳам фойдали бўлиши керак. Машҳур ‘эна’ юморини яратишимга ҳам қишлоқи йигит бўлганим сабабчи бўлган”, — дейди жамоа аъзоси “Космос” жамоаси аъзоси Ўткир Шодмонов.

“‘Миллион’ жамоасининг концерт дастурида чиқишимни ҳеч ким кутмаганди. Ҳамма ҳайрон. Мен театр актрисасиман, у ерда эса юмор. Бу жамоа трендга чиққан санъаткорларни саҳнага олиб чиқар экан. Менинг таклиф қилинишимга ҳам трендга чиққан гапларим бўлди. Мени бу ерга меҳмон актриса сифатида таклиф қилишди”, — дейди актриса Нилуфар Ҳамидова.

“Миркомил аканинг жамоани тарк этаётгани ҳаммамизнинг кайфиятимизни туширди. Изланяпмиз, ўрганяпмиз ва мухлисларнинг қалбидан жой олишга ҳаракат қиляпмиз. Юмор соҳасига умуман алоқам йўқ, мени жамоага устозим Даврон ака таклиф қилган. Менга ‘Наврўз муборак’ саҳнаси катта омад олиб келди”, — дейди жамоа аъзоси Дилноза Ҳабибуллаева.

“Бу йилги концерт дастурида янгиликлар ҳам, ўзгаришлар ҳам жуда кўп. Жамоа аъзоларидан катта тажриба олдим. Ёшлигимдан бу жамоанинг мухлиси бўлганман. Саҳнада қанақадир хато қилсам, ёрдам бериб ўргатишади. Бир йилда бир ёки икки марта концерт берадиган бўлсак, бир-биримизни соғиниб йиғиламиз. Юлдуз Усмоновани яратган саҳнам машҳур бўлган, қанчалик ўхшатганимни мухлислар билади”, — дейди Шаҳло Алижонова.

“Миллион” кулги жамоасининг концерт дастурида машҳур блогер, ўзбек шоу-бизнесининг кўплаб таниқли вакиллари иштирок этди.

“Концерт дастури жуда ажойиб ўтди, ҳам қувончли, ҳам қайғули бўлди”, — дейди хонанда Умидахон.

“Кулдиришни билган жамоа йиғлатишни ҳам билди. Ҳар йили жамоадан бир кишининг кетиши ҳақиқатан ҳам ғамгин ҳолатга туширади. Бироқ ҳар кимнинг ўз ҳаёт йўли бор”, — дейди “Ойбек ва Нигора” дуэти хонандаси Нигора.

Концерт дастури карнай-сурнай садолари остида якунланди. Саҳна ортида жамоа мухлислари, машҳур хонандалар ва актрисалар жамоанинг кейинги фаолиятига омад тилаб, тилакларини билдирди. 

“Миллион” етакчиси Даврон Кабуловнинг айтишича, бундан буёғига кулги жамоасининг янги концерт дастурлари YouTube платформасига жойлаштирилмайди. 

Концертдан батафсил репортажни қуйида томоша қилишингиз мумкин.