“Миллион” кулги жамоаси 20 октябрь куни “Халқлар дўстлиги” санъат саройида янги концертига старт берди. Хўш, жамоанинг бу йилги концерти томошабинларга қандай янгиликларни тақдим этмоқда? Концерт дастурида қайси долзарб мавзулар тилга олинган? “Дарё” мухбирлари тайёрлаган репортажни томоша қилиб, ушбу саволларга жавоб олишингиз мумкин.
— Концертда олиб чиқиладиган мавзулар устида бутун жамоа ишлайди. Бир кишининг меҳнати билан бўладиган иш эмас. Гуруҳнинг энг кичик аъзосидан тортиб энг каттаси ҳам бирдек меҳнат қилади. Роллар тақсимотида ҳам шундай, бир саҳна кўринишида камроқ рол ўйнаган йигит ёки қиз кейингисида асосий ролда чиқиши мумкин. Агар ҳамма ўзи ёзган ҳазилида ўзи чиққанида ҳамма фақат ўзи учун саҳна кўриниши тайёрлаган бўларди. Лекин барча чиқишларга Мўмин ва Маъруф қўйилади (кулиб), деди Даврон Кабулов.
Миллион охирги етти йил ичида ўн кундан кам концерт қўймаяпти. Бу биз учун нормал ҳолат, бунга ўргандик ҳам. 2-3 кунлик концертларда, менимча, зерикиб қолсак керак. Концертнинг биринчи кунида уч соат саҳнада бўлибмиз. Иккинчи кунида бир оз қисқартирдик — икки соат-у қирқ дақиқа давом этди. Лекин бу дегани биринчи куни келадиганлар кўпроқ нарса кўради дегани эмас. Бутун бошли саҳна кўриниши қисқартирмаймиз — фақат у ер, бу ерини бир оз таҳрирлаймиз.
Комик актёр Асқар Ҳикматов “Миллион”нинг бу концертида илк бор саҳнада кўриниш беради, Келаси концертларда Асқар Ҳикматовни гуруҳга қўшилиш эҳтимоли борми деган саволга Мўмин Иброҳимов шундай жавоб берди:
— Асқар ака бугун саҳнада отам ролини ижро этади. Бу Асқар аканинг “Миллион”га кўрсатаётган ижодий ёрдами. Гуруҳга қўшилиш эҳтимоли бор, албатта, йўқ эмас. Буни гуруҳимиз боши Даврон Кабулов ҳал қилади.
Асқар Ҳикматов:
— Бу йил биринчи марта “Миллион”чилар билан саҳнага чиқаман. Менга гуруҳ йигитлари саҳна кўринишида қатнашиш таклифи билан чиқди, бундан жуда хурсанд бўлдим. Агар гуруҳга расман қўшилиш таклифи бўлса ҳам йўқ демайман.
Маъруф Носиров анчайин жиддийлашгандек кўринди:
— Ёшим 40 га қараб кетяпти, қарияпман, олдингидек позитив эмасман. Буёғига оғир-вазминроқ бўлиш керак. Олдин ёш эдим, кулиб-кулиб юрардим. Ҳаёт мажбур қилади, фарзандлар катта бўляпти, жиддий бўлиш вақти келяпти. Саҳнада шундай образларда чиққаним билан у ўз номи билан саҳна, ҳаёт эмас.
— Мавзу танлашда нималарга аҳамият берилади? Бу мавзуни олиб чиқсак қандай бўларкан, деган ўй ёки қўрқув ўтадими ҳеч?
— Биласизми, бўридан қўрққан ўрмонга бормайди. Ҳазил қилишда ўзингизни чегаралашингиз нотўғри бўлади, деди жамоа етакчиси.
— Ҳар концертда меҳмон санъаткор келиб, кечани “қиздириб” бериши анъанага айланган. Санъаткорларни таклиф қилишда унинг тренддалигига қараладими ёки мавқейига?
— Баъзида трендга, баъзида хонанданинг “статуси”га, баъзан эса қиладиган ҳазилларимизга қараб танланади. Аввалги концертда Лола чиқди, у ҳазилларимизда ҳам иштирок этди. Олти йилдан бери Юлдуз Усмонова, Фаррух Зокиров, Жаҳонгир Отажонов, Тоҳир Содиқов, “Сетора” гуруҳи, Озода Нурсаидова, Лола каби биринчи рақамли санъаткорларни дастуримизга таклиф қилиб келмоқдамиз. Доим айтаман, бизнинг мухлислар ҳам биринчи рақамли мухлислар — улар энг яхшисига муносиб! Бу сафар Шоҳруҳ рэперни чақирдик, лекин у билан ҳазил уюштирилмади. Сабаби унинг сиёсий фаолиятига ножўя таъсир қилиб қолиши мумкин, дейди Даврон Кабулов.
“Миллион”нинг сири тинимсиз меҳнатда, мухлисга кўрсатиладиган ҳазилларга енгил-елпи қарамаслигида! Пишган нон, табиийки, мазали чиқади ҳамда харидори кўп бўлади. Саҳнага “хом нон” олиб чиқаётган гуруҳларни ҳам кўряпмиз, пойдеворига секин-секин сув кетиб қоляпти. Ҳақиқий меҳнат билан чиқадиган бўлсак, кўп йиллар шу саҳнада туриб мухлислар кулгиси ва олқишига сазовор бўламиз, деб ўйлайман.
“Cosmos” жамоасида ҳар доимгидек кайфият юқори даражада.
— Концертга икки кун давомида келган инсонларнинг айтишига қараганда, сизнинг чиқишингиз анчайин ўзгарибди. Мухлисларга янада ёқяпти. Умуман олганда, сценарийни фақат ўз жамоангиз билан ёзасизми ёки бу жараёнда “Миллион” йигитлари ҳам иштирок этадими?
— Ўзимиз ҳам ёзамиз, лекин асосий жойларида барибир устозлар ёрдам беради. Сабаби биз фақат бир томонга қараб кетиб қолсак, улар мавзунинг бошқа жиҳатларини ҳам қамраб олишимизни эслатиб туради. Тайёргарлик жараёнини ҳам бир вақтда, бир жойда бошлаймиз. Концерт яқинлашганда эса саҳнада бир-биримизнинг чиқишларимизни кўрамиз, деди гуруҳ аъзоси Ўткир Шодмонов.
Концертда ижтимоий мавзулар, спорт соҳаси ва яна бир қанча мавзулардаги ечилмаган муаммо кулги орқали олиб чиқилди. Дастур якунида Шоҳруҳ рэпер ўзининг энг машҳур қўшиқлари билан саҳнани “оёққа турғазди”.
Видеорепортажни тўлиқ ҳолда “Дарё Lifestyle” YouTube каналида томоша қилинг.
Изоҳ (0)