Импровизация ва комедик шоулар кўпинча бўлажак киноюлдузлар учун дастлабки майдонча вазифасини ўтайди. Баъзи стендап ижрочиларининг актёрлик санъатига ўтиши шунчалик табиий бўлганки, улар бир пайтлар кичик клубларда қўлларида микрофон билан чиқиш қилганига ишониш қийин.
Жим Керри
Актёр ўсмир пайтиданоқ Торонто клубларида чиқишлар қила бошлаган. У ерда канадалик йигитни машҳур комедиячи Родни Дейнжерфилд пайқаб қолиб, уни ўз турнеларига саҳнани “қиздирувчи” сифатида таклиф этган. Кўп ўтмай Жим Керри Лос Анжелесга кўчиб ўтиб, маҳаллий стендап саҳналарининг доимий иштирокчисига айланади, машҳурларни пародия қилиб, томошабинларни ҳайратга солади.
Шу даврда Керри тунги ток-шоуларда ҳам тез-тез кўрина бошлайди. Харизма ва энергияси туфайли Жим тез орада “Ёрқин рангларда” кўрсатувида, кейинчалик “Шанба кечасидаги жонли эфир” култ сериалида чиқади.
Жим кинода ўзини илгари ҳам синаб кўрган бўлса-да, ҳақиқий муваффақият 1994 йилда келади. Ўшанда “Эйс Вентура: уй ҳайвонларини қидириб” фильми экранларга чиқади, ундан кейин эса “Ниқоб” фильми суратга олинади. “Труман шоуси” трагикомедияси эса унинг драматик актёр сифатидаги фаолиятига бурилиш ясайди — Керри бу роли учун “Олтин глобус” мукофотига сазовор бўлади.
Эмма Томпсон
Икки марта “Оскар” ва “Олтин глобус” мукофотлари соҳибаси ҳам кинога стендап комедияси орқали келган. Эмма Томпсон Кембрижда ўқиётган пайтидаёқ Footlights комедия труппасига аъзо бўлиб, Стивен Фрай ва Ҳью Лори билан дўстлашган. Битирувдан сўнг, бу истеъдодли учлик “Алфреско” номли скетч-шоуда бирлашган.
Ҳажвий кўрсатувлар ва стендап чиқишларда иштирок этишни давом эттирган ҳолда, британиялик актриса кинога илк қадамларини қўйган. Томпсоннинг карьераси 1992 йилнинг асосий мукофотларини қўлга киритган “Ҳовардс Энд” мелодрамасидаги роли билан янги босқичга кўтарилади. 1996 йилда эса Эмма Жейн Остинннинг севимли “Ақл ва туйғу” романини экранлаштирганлик учун сценарий муаллифи сифатида “Оскар” мукофотига сазовор бўлади.
Жейсон Судейкис
Америкалик актёр карьераси ўзи туғилиб ўсган Виржинияда бошланган. Кейинчалик Жейсон Судейкис Чикагога кўчиб ўтиб, у ердаги афсонавий The Second City труппасига қўшилади ва тез орада “J.Т.S. Brown” номли кўнгилочар дастурини йўлга қўяди. 2003 йилда Судейкис “Шанба кечасидаги жонли эфир” кўрсатувининг сценарий муаллифлари жамоасига қабул қилинади, кўп ўтмай эса скетчларда ҳам кўрина бошлайди. 2005 йилга келиб Жейсон кўрсатувнинг асосий актёрлари сафига қўшилади.
Судейкис кинода ҳам ўзини синаб кўради — дастлаб “Вегасда бир кеча” ва “Каллакесар” фильмларида иккинчи даражали ролларда қатнашади. Актёрнинг номи “Ёмон бошлиқлар” ва “Биз Миллерлар” комедияларидан сўнг янада машҳур бўлади. Ўша пайтга келиб, томошабинлар Жейсонни яхши таниб, уни севиб қолишганди. Унинг карьерасининг чўққиси сифатида “Тед Лассо” сериалини кўрсатиш мумкин, бу сериал унга иккита “Олтин глобус” ва “Эмми” мукофотларини олиб келади.
Вупи Голдберг
Бу юлдуз ўз ютуқлари туфайли нуфузли EGOТ клубига киради. Бироқ Вупи Голдберг карьерасидаги дастлабки жиддий қадамларни “Тhe Spook Show” номли комедия моноспектакли билан қўйган. Унинг ёрқин чиқиши “Виржиния Вулфдан ким қўрқади?” ва “Яқинлик” фильмлари билан машҳур бўлган режиссёр Майк Николснинг эътиборини тортади. 1984 йилда режиссёр ёш актрисага лойиҳани Бродвейга олиб чиқишга кўмаклашади ва унинг премераси ғоят катта муваффақият қозонади. Бир йил ўтар-ўтмас, Вупи Стивен Спилбергнинг “Бинафшаранг гуллар” драмасида бош ролни қўлга киритади.
Муваффақиятли дебютига қарамай, Голдберг ҳазил-мутойиба фильмларида суратга тушишни ва стендап чиқишларини давом эттиради. 1989 йилда актриса Жеймс Белуши билан бирга Андрей Кончаловскийнинг “Гомер ва Эдди” фильмида рол ижро этади. “Руҳ” фильмидаги ролини эса Вупининг стендап чиқишларини севиб томоша қиладиган Патрик Суэйзи туфайли қўлга киритади.
Изоҳ (0)