Муаллифлик ҳуқуқини бузган ижодкорларнинг лисензиялари бекор қилиниши мумкин, деб хабар бермоқда Адлия вазирлиги.
Қайд этилишича, қонунчиликка мувофиқ лицензия талаблари ва шартлари лицензиат томонидан мунтазам равишда ёки бир маротаба қўпол равишда бузилганда лицензияловчи орган лицензиянинг амал қилишини бекор қилишни сўраб судга мурожаат қилиши лозим.
Концерт-томоша фаолиятини амалга ошираётган ижрочилар томонидан муаллифлик ҳуқуқи ва турдош ҳуқуқларни бузиш лицензия талаблари ва шартларини қўпол равишда бузиш деб ҳисобланади.
Шунга кўра, Адлия вазирлиги томонидан шоир ва бастакорлардан келиб тушган мурожаатлар асосида 2024 ва 2025 йилнинг ўтган даври мобайнида муаллифлик ҳуқуқини бузган ва суд қарорларига асосан маъмурий жавобгарликка тортилган 10 нафар ижрочиларга оид маълумотларни “Ўзбекконцерт” давлат муассасасига тақдим этиб, уларнинг лицензияларини бекор қилиш бўйича зарур чораларни кўришни сўради.
Ўзбекистон халқ артисти Юлдуз Усмонова санъаткорларнинг бугунги ҳолати ҳақида мурожаат билан чиқди. Унинг фикрига кўра, бугун кўплаб санъаткорлар ижод қилишдан совиб қолган. Бунинг сабабини эса у муаллифлик ҳуқуқлари атрофидаги чалкашликлар, эски асарлар бўйича очилаётган даъволар ва ижодкорларга бўлган босимлар билан боғлайди.
Бундан аввал хонанда Феруза Каримова қўшиқ ижросида шеърдан рухсатсиз фойдалангани учун муаллифга 40 млн сўмдан зиёд тўлайдиган бўлганди.
Шунингдек, Райҳоннинг “Яхшимасми” қўшиғида шеърдан муаллиф рухсатисиз фойдаланилгани аниқланганди. Шоир Шамсиддин Садоийнинг Адлия вазирлигига қилган мурожаати асосида “Давлатинг борида”, “Омонат” ва “Тингла дўстим” номли шеърлари хонанда Ботир Қодиров томонидан ҳуқуқ эгаси рухсатисиз ҳамда тегишли тартибда муаллифлик ҳақини тўламасдан фойдаланилгани аниқланган. Яна бир машҳур шоир хонанда Ботир Қодиров устидан Адлияга шикоят қилган.
Абдуссамий тахаллуси билан билан танилган шоир Шоҳрух Абдувоҳидовга тегишли “Қизғанаман”, “Сўнгги нафасгача”, “Соғиндим ёмон” ҳамда “Дилдора” номли шеърлар хонанда Ботир Қодиров томонидан ҳуқуқ эгаси рухсатисиз ҳамда тегишли тартибда муаллифлик ҳақини тўламасдан фойдаланилган.
Манзура ва Муроджон Йўлдошев эса “Азизим” қўшиғини муаллиф рухсатисиз куйлагани маълум бўлганди.
Изоҳ (0)