Бу аёлларнинг экрандаги нафис ҳаракатлари, идеал ташқи кўриниши ва жилмайишларига асло алданиб қолманг, чунки улар турли жанг санъатини мукаммал эгаллаган. Кимдир бокс билан стрессдан халос бўлади, бошқаси таэквондо билан шуғулланади, яна бири эса жанговар ролларни дублёрсиз ижро этади. Қисқаси, бу аёллар нозик жинс вакиллари ҳақидаги мавжуд тасаввурларингизни бутунлай ўзгартириб юборади.
Сара Мишел Геллар ва таэквондо
Вампирлар билан курашган “Баффи” роли билан танилган Сара, аслида актёрликдан олдин таэквондодан қора белбоғга эга бўлган. Тўрт ёшида кино соҳасида фаолиятини бошлаган бўлса-да, спорт унинг ҳаётида доим энг муҳим ўрин тутган.
Сара фигурали учиш, гимнастика билан шуғулланган, кейин эса жанг санъатларига қизиқа бошлаган. У кикбоксинг, бокс, кўча жанги ва таэквондо билан шуғулланган. Айнан таэквондо бўйича амалий билимлар унга “Баффи” сериалидаги жанг саҳналарини дублёрсиз бажаришга ёрдам берган.
Гелларнинг ҳаётий шиори: “Агар бирор нарсани истасанг — эриш, ҳаёт бир марта берилади ва иккинчи имконият бўлмайди.” Шунинг учун ҳам у актрисалик ва жанг санъатларини уйғунлаштириб, ҳар иккала йўналишда ҳам катта ютуқларга эришган.
Гал Гадот ва жанговар кўникмалар
Гал Гадотнинг икки йил Исроил армиясида хизмат қилгани сир эмас. У айнан шу ерда турли жанг санъатларини ўрганган, хусусан, миллий мудофаа техникаси бўлган крав-мага услубини тўлиқ эгаллаган.
Орадан йиллар ўтиб, “Мўжизакор аёл” фильмидаги роли учун у жанговар машғулотларга қайтди. Бокс, жиу-жицу, кунг-фу ва кикбоксинг — буларнинг барчасини ўрганди. Галнинг ўзи айтганидек, бундай машғулотлар унга доимо завқ бағишлайди:
“Мен жанг қилишни ва қўл жанги билан шуғулланишни жуда ёқтираман”, дейди актриса.
Гал учун спорт ҳаётининг ажралмас қисмидир. У экрандан ташқарида ҳам уч нафар қизнинг онаси бўлган мўжизакор аёл бўлиб қолаверади.
Дуа Липа ва бокс
Дуа Липанинг кўп бора бокс билан узоқ йиллардан бери шуғулланаётганини айтиб ўтган. Хонанда турли спорт турларини синаб кўришни ёқтирса-да, бокс унинг ҳаётида мустаҳкам ўрин олган. Бўш вақти пайдо бўлиши билан Дуа машғулотларга шошилади.
Липанинг сўзларига кўра, бокс бутун тана учун ажойиб машқ бўлиши билан бирга, руҳий саломатликни ҳам мустаҳкамлашда ёрдам беради:
“Бокс менга ичимдаги ғубор ва жаҳлни чиқариш, стрессдан халос бўлиш имконини беради. Бокс билан шуғуллана бошлаганимдан бери мен ўзимни энг яхши жисмоний ҳолатда ҳис қилмоқдаман”, дейди у.
Мадонна ва каратэ
66 ёшга етса ҳам машҳур поп-юлдуз Мадонна ҳар куни бир неча соат вақтини спорт машғулотларига ажратади. Ҳозирда хонанда асосан ёга билан шуғулланиб келаётган бўлса-да, бир неча йил аввал у каратэ билан жиддий шуғулланган.
Ушбу спорт турини танлашига Мадоннанинг собиқ турмуш ўртоғи — кинорежиссёр ва каратэ бўйича қора белбоғ эгаси Гай Ричи илҳомлантирган. Хонанда Лондоннинг Budokwai Club номли жанг санъатлари институтидаги машғулотларга қатнаган ва кўп вақтини шахсий тренингларга бағишлаган. Қора белбоғни қўлга кирита олмаган бўлса-да, у ўз кўникмаларини мукаммаллаштирган.
Изоҳ (0)