“Дарё”да Тошкентдаги “дом”да содир бўлган портлаш 6 та хонадон эгасини “кўчада қолдиргани”, Мирзо Улуғбек тумани ҳокими эса ваъда беришдан нарига ўтмаётгани ҳикоя қилинганди. Аҳоли вакиллари шунингдек, Мирзо Улуғбек тумани ҳокимлиги ахборот хизматининг “Дарё”га билдиришича, пойтахт ҳокимлиги томонидан уйсиз қолган аҳолининг янги хонадон сотиб олиши учун маблағ ажратилган.
Ўша нохуш ҳолатдан кейин шу куннинг ўзида шахсан туман ҳокими, шаҳар ҳокимияти билан биргаликда ҳудудда яшовчи фуқароларни меҳмонхонага жойлаштирди. Аҳоли озиқ-овқат билан таъминланди. Одатда аҳолига тўланадиган компенсация Тошкент шаҳар ҳокимияти, Халқ депутатлари шаҳар кенгашидан ўтиб кейин туман ҳокимлигига келади. Бунга озгина вақт керак бўлди. Шу сабаб кечикиш рўй берди. Бугун шу масала ҳал бўлди. Энди аҳоли узоғи билан уч-тўрт кун ичида компенсация пулларини олади, дейди Мирзо Улуғбек тумани ҳокимлиги ахборот хизмати раҳбари Маъмур Пармонов.
Ҳокимлик вакили жабрланган фуқароларга мурожаат қилиб, туман ҳокимлигининг уй-жой бўлимига бориб, ҳужжатларни тақдим этишларини сўрамоқда.
Одамлар қанча тез ҳужжатларини тақдим этишса, шунча тез пулни олишади, дейди ҳокимлик масъули.
Масъулларнинг аниқлик киритишича, ҳокимлик икки хонали уйидан ажралган фуқароларга 715 миллион сўм миқдорида компенсация тўлаб беришни лозим топган. Шунингдек, портлатилган уйнинг том қисми ва зарарланган ҳудудларни таъмирлашни бошлаган.
Бу пулга айнан ўзимиз яшаб келган Қорасув-4 ҳудудидан ўзимизни уйимиздек икки хонали уй ололмаймиз. Бу ҳудудда нархлар жуда қиммат. Шу сабаб ҳокимликдан пул миқдорини ўйлаб кўришларини сўраган бўлар эдик, дейди жабрланувчи аҳоли вакиллари.
Мирзо Улуғбек ҳокимлиги масъулининг билдиришича, бу нарх мустақил баҳолаш марказлари томонидан бугунги бозор ўрганилган ҳолда ҳисоб-китоб қилинган.
Уйлар нархи давлат ташкилотлари томонидан баҳоланмаган. Бозор ўрганилиб, мустақил баҳолаш марказлари томонидан Қорасув-4 даги кўп қаватли уйлар нархидан келиб чиқиб белгиланган. Шунингдек, ўша баҳоланган суммадан керак бўлса ортиғи билан тўлаб бериш имкониятлари кўриб чиқилган, дейди Маъмур Пармонов.
Ҳокимият ахборот хизмати раҳбари “Дарё” журналистининг “Аҳолида ҳокимлик ажратган пулга уй ололмаймиз, бу кам, бизга пул эмас уй олиб беришсин деб талаб қўйиш имкони борми?”, деган саволига “Бошида одамлар ўз таклифларини билдиришган, уй эмас компенсация маъқул дейишган”, деб жавоб берди.
Эслатиб ўтамиз, 2025 йилнинг 1 март куни Тошкент шаҳрининг Мирзо Улуғбек туманида портлатилган хонадон сабаб кўп қаватли уйда яшовчи аҳоли вакиллари уйсиз қолганди. Тошкент шаҳри ҳокими ҳамда Мирзо Улуғбек тумани раҳбари жабрланган аҳоли вакиллари билан кўришиб, улар 10 кунда уйли бўлишини, муаммо ҳал этилишини ваъда қилишганди. “Дом”даги хонадонини портлатган фуқаро буни ошхонадаги газ плитасини ёқиш орқали амалга оширган. Натижада газ ҳаво аралашмаси чақнаши содир бўлиб, ёнғин келиб чиққан. Шундан сўнг ҳам ниятига етмаган фуқаро тўққизинчи қаватдан ўзини ташлаш орқали жонига қасд қилган.
Изоҳ (0)