Тошкентдаги Hyatt Regency меҳмонхонасида Агробанкнинг “Агроbookс” лойиҳаси доирасида тайёрланган “Сув китоб” методик тўплами тақдимоти бўлиб ўтди.
Агробанк қишлоқ хўжалиги соҳасини молиявий ва илмий жиҳатдан қўллаб-қувватлаш мақсадида қатор лойиҳаларни амалга оширмоқда. Уларнинг навбатдагиси — Сув хўжалиги вазирлиги ва “ТIQХММИ” миллий тадқиқот университети билан ҳамкорликда ишлаб чиқилган “Сув китоб” тўпламидир.
Тўплам сувдан оқилона фойдаланишга бағишланган 30 та методик қўлланмани ўз ичига олади. Уларни тайёрлаш жараёнида Хитой ва Туркия каби мамлакатларнинг илғор тажрибалари ўрганилган, 50 нафарга яқин профессор ва мутахассислар иштирок этган. Қўлланмаларда замонавий суғориш технологиялари, автоматлаштирилган тизимлар, экинларни суғориш меъёрлари ва сувдан самарали фойдаланиш бўйича амалий тавсиялар баён этилган.
Фермер ва деҳқонлар учун тўпламнинг видео ва аудио шакллари ҳам тайёрланган. Видеодарслар “Фермерлар мактаби” платформасига жойлаштирилган.
Тўплам йил якунига қадар босма ва электрон шаклда бепул тарқатилиб, мамлакатимиз бўйлаб барча фермер ва деҳқонларга етказилади. Ушбу ташаббус сув хўжалигини илмий асосда ривожлантириш ҳамда амалий билимларни кенг тарғиб қилишга хизмат қилади.
Маълумот ўрнида, “Агроbookс” лойиҳаси доирасида аввалроқ Туркия тажрибаси асосида Ўзбекистон иқлимига мослаштирилган “100 китоб тўплами” ҳамда “Ўсимликлар ҳимояси” соҳасига оид 40 та методик қўлланма ҳам яратилган эди.
Агробанк бундай ташаббуслар орқали қишлоқ хўжалиги ва сув хўжалиги соҳаларини молиявий ҳамда илмий қўллаб-қувватлашни изчил давом эттиради.
Реклама ҳуқуқи асосида.
Изоҳ (0)