Ҳаммаси шундан бошланди: машҳур турк актёрларнинг биринчи роллари

Энг улкан муваффақият ҳам доимо биринчи ролдан бошланади. Баъзан бу асосий ва муҳим рол бўлади, баъзан эса кичик рол, бироқ лойиҳа бутун дунёга танилгани сабабли ҳар бир актёр юлдузга айланади. Шундай ҳоллар ҳам бўладики, кинодаги илк тажриба муваффақиятсиз чиқади, аммо мақсадга интилувчан ва шижоатли истеъдодлар юлдузлар сари машаққатли йўлларини давом эттиради. Келинг, машҳур турк актёрлари ва уларнинг ҳаммаси қайси роллардан бошлангани ҳақида гаплашамиз.

Бурак Ўзчивит

Муболағасиз айтганда, жаҳон миқёсидаги юлдуз турк киносининг рамзларидан бирига айланди. У бутун дунё бўйлаб учрашувлар уюштиради, Россияга тез-тез ташриф буюради. Кўплаб ҳамкасблари каби Бурак Ўзчивит ҳам кинога подиумдан кириб келган: моделлик соҳасида ютуқларга эришгач, кино саноати вакилларининг эътиборини жалб этган.

Кинодаги илк тажрибаси “Минус 18” (2006) номли кўп қисмли драматик триллер бўлди. Бурак сериалда полиция комиссари Мурат ролини ижро этди. Муваффақиятли дебютдан сўнг Ўзчивит бир қанча асосий ролларга таклиф этилди: “Юқтирилган”, “Истанбулнинг кичик сирлари” ва бошқа сериалларда. Кейинчалик актёр “Муҳташам юз йил”, “Чолиқуши”, “Акам” фильми ҳамда бутун дунё мухлислари севиб томоша қиладиган кўплаб асарларда бош қаҳрамонга айланди.

Киванч Татлитуғ

Актёрнинг йўли ҳам подиумдан бошланди. Бироқ Киванч Татлитуғ моделлик оламига киролмаслиги ҳам мумкин эди: якка-ю ягона ўғлининг дизайнерликда ўқишдан мамнун эмаслигини кўрган онасининг маслаҳатига қулоқ солди. Бўлажак актёр саҳналарда юлдуз бўлиб порлади, машҳур дизайнерлар билан ҳамкорлик қилди, аммо моделлик карьераси узоққа чўзилмаслигини англаб етди. Шу боис у актёрликка қизиқиб қолди, махсус курсларни тамомлади ва кўп ўтмай ўзининг илк бош ролини қўлга киритди.

Киванч “Кумуш” (2005) сериалида илк бор кўринди, дарҳол томошабинлар ҳамда режиссёрларнинг эътиборини тортди. Бугунги кунда унинг фильмографиясида 20 га яқин иш мавжуд. Улар орасида “Менекше ва Халил”, “Тақиқланган севги”, “Мард ва гўзал”, “Трубадурлар фестивали” ва бошқа кўплаб асарлар бор. Уларнинг аксариятида у бош ролларни ижро этган.

Халит Эргенч

Халит Эргенч ёшлигида денгизчи бўлишни орзу қилган: узоқ саёҳатлар романтикаси унга ҳаётдаги энг ёрқин саргузашт бўлиб кўринарди. Бироқ йигит консерваторияга ўқишга кириб, опера қўшиқчилигини ўрганди ва вокал билан шуғулланди. Ўша пайтда актёр бўлишга қатъий қарор қилганди.

Таълимни тугатгандан сўнг дастлабки пайтларда Халит режиссёрлар эътиборидан четда қолгани учун рекламаларда суратга тушиш ва мусиқий фильмларда қатнашиш орқали пул топарди. Кўп ўтмай у сериаллар эпизодларида ҳам рол ўйнай бошлади. Масалан, “Телбалар” (1996) ва “Қора фаришта” (1997) сериалларида. Кўпчилик мухлислар тўлиқ маънода унинг карьераси ва шуҳрати “Зерда” (2002) сериали чиққандан сўнг келган деб ҳисоблашади.

Керем Бурсин

10 ёшидан бошлаб ёш Керем Бурсин оиласи билан АҚШда яшай бошлади. Йигит ёшлигиданоқ актёрлик касбини орзу қилади, аммо отаси ўғли учун жиддийроқ карьерани маъқул кўради. Керем олий ўқув юртига кириб, маркетинг соҳасида таълим олишга ҳаракат қилди, бироқ қалби кино оламига интиларди. Онасининг қўллаб-қувватлаши билан у актёрлик маҳоратини ўрганишга киришди. Бу осон кечмади: пулсиз қолган пайтларда Бурсин оиласидан ёрдам сўрашни истамай, официант ва ҳайдовчи бўлиб ишлади.

Бир куни продюсер ва режиссёр Рожер Корман тиришқоқ ва ёқимтой Бурсинни кўриб қолиб, уни кастингга таклиф этади. Керем Бурсин биринчи эпизодик ролини “Пайшанба” (2006) жангари фильмида ижро этди. Кўп ўтмай, Керем турк киносида ўз ўрнини топди. “Қуёшни кутиб” сериали намойишидан сўнг актёрнинг шуҳрати тез суръатда ўса бошлади.

Фаҳрие Эвжен

Фаҳрие Эвжен мактаб йилларидан бошлаб спектаклларда қатнашган. Аммо олий таълим муассасасида социология ва менежментни ўрганишга ҳаракат қилади. Мутахассислик унга ёқмагани сабабли таътил пайтида қизга турк фильмида суратга тушиш таклифи келганда, ўқишни иккиланмасдан ташлаб кетади.

Кино саноати вакиллари онаси билан таътилга келган Фаҳриени Истанбулда кўриб қолишади. Шундай қилиб, у “Соғинч” (2005) сериали эпизодида суратга тушади. Бош ролда иштирок этган асари “Хазонрезги” сериали ҳисобланади. Ҳозирда актрисанинг 20 га яқин ишлари мавжуд, улар орасида “Алп-Арслон: Салжуқий”, “Ҳаётимдаги гол”. “Сен менинг уйимсан”, “Чолиқуши” кабилар бор.

Ҳанде Эрчел

19 ёшида Ҳанде Эрчел гўзаллик танловида иштирок этиб, фахрли иккинчи ўринни эгаллайди. Шундан сўнг уни журналларда суратга тушиш ва кино синовларига таклиф этишади. Кўпчилик Эрчелнинг карьерасидаги биринчи роли “Чолиқуши” сериали бўлган деб ҳисоблайди, аммо бу унчалик тўғри эмас.

Мазкур сериалдан олдин у “Татарча рамазон” (2013) сериалида рол ўйнаган. Шундан сўнг актриса яна ўнлаб лойиҳаларда, жумладан, “Бутунлай бошқача”, “Узук”, “Қалбим эшигини қоқ” ва бошқа кўплаб асарларда суратга тушади.

Неслиҳан Атагул

Неслиҳан Атагул ўсмирлик пайтида реклама агентлигига қўнғироқ қилиб, кастинг учун келишиб олади. Онаси қизининг режасидан мамнун бўлмаса-да, уни олиб боради ва шу тариқа бўлажак актрисани қўллаб-қувватлайди.

Бир нечта реклама роликларидан сўнг, қиз “Биринчи муҳаббат” (2006) драматик комедиясида кичик рол ижро этади. Тез орада у “Хазонрезги” сериалида қатнашади. Профессионал актёрлик таълимини олгач, тобора кўпроқ фильм ва сериалларда асосий таркибда рол ола бошлади. Ҳозирда унинг фильмографиясида ўндан ортиқ рол мавжуд, улар орасида “Севги изтироби”, “Ишқ соҳиллари”, “Тун охирида”, “Элчининг қизи” ва бошқа кўплаб асарлар бор.

Марям Узерли

Марям Узерли актёрлик касбидаги илк тажрибасини 5 ёшида, отасининг дўсти бошқарган театр саҳнасида синаб кўрган. Қизининг истеъдодини пайқаган ота-онаси уни санъат мактабига жўнатишган. Олий маълумот олгач, актриса Гамбург театри саҳнасида рол ижро этган. Кинодаги дебют роли “Икки кишилик иш” сериалидаги иштироки бўлган. 2008 йилда “Учов” фильмида ва “Инга Линдстрем” сериалида рол ўйнаган.

Бироқ ҳақиқий муваффақият Марямга турк сериалида бош ролни таклиф қилган дугонасининг қўнғироғидан сўнг келган. Ўша пайтда Узерли Германияда туғилиб-ўсгани боис турк тилини билмас эди. Аммо бу қўл келган: сюжетга кўра, унинг қаҳрамони қрим татарлари томонидан ўғирлаб кетилгани учун унинг талафффузидаги акцент маъқул топилган. Шундай қилиб, актриса “Муҳташам юз йил” сериалида Хуррам ролини ўйнайди.