Land Rover ўзининг энг машҳур моделларидан бўлган Defenderʼнинг янгиланган версиясини тақдим этди. Унинг ташқи дизайни бир оз ўзгартирилди, салонга янги мултимедиа тизими қўшилди ва ҳайдовчи хавфсизлигини оширувчи илғор технологиялар билан бойитилди.
Янгиланган Defenderʼда асосий фаралар янги шаклга эга бўлиб, уларнинг марказий элементи кичрайтирилди. Орқа чироқлар бир оз қорайтирилган (тонировка) кўринишга эга, бу эса автомобилга спорт услубига хос кўриниш беради.
Эндиликда барча комплектацияларда қора олд панжара стандарт тарзда биргаликда ишлаб чиқарилади, олд ва орқа бамперлар кумушранг ёки кулранг рангга бўялади.
Салоннинг энг эътиборга молик янгилиги бу 13,1 дюймли сенсорли экранга эга янги мултимедиа тизимидир. Шунингдек, Янги Defenderʼда ҳайдовчи эътиборини назорат қилиш тизими — инфрақизил камера ҳам жорий этилди. Камера рул колонкасига жойлаштирилган бўлиб, ҳайдовчининг чарчагани ёки чалғигани аниқланса, овозли ва визуал огоҳлантириш беради. Буни фойдаланувчи хоҳишга кўра созлаши ёки бутунлай ўчириб қўйиши мумкин.
Бундан ташқари, илк бор Defenderʼда текис йўлсиз жойлар (оff-road) учун мослашган адаптив круиз-назорат тизими мавжуд. Бу технология мураккаб релефларда ҳаракатланаётганда автомобилнинг тезлигини ва олдиндаги тўсиқларгача бўлган масофани автоматик равишда бошқаради.
Ҳозирча Land Rover двигатель линиясида ўзгаришлар ҳақида маълумот бермаган. Шунинг учун аввалги вариантлар қолдирилиши кутилмоқда:
- 3,0 литрли дизель олти цилиндрли двигатель — 246 ёки 345 от кучи;
- 2,0 литрли бензинли plug-in гибрид — 296 от кучи, электрда ҳаракатланиш захираси 48 км гача;
- 5,0 литрли бензинли V8 — 419, 493 ҳамда 518 от кучи.
Defenderʼнинг флагман версияси Оctа эса аввалгидек техник имкониятлар билан тақдим этилади. Европа бозорида янгиланган Defenderʼнинг бошланғич нархи 70 минг доллардан бошланади.
Изоҳ (0)