iPhone 16 нинг базавий модели 2025 йилнинг январь–март ойларида смартфонлар савдоси бўйича дунё рейтингида биринчи ўринга қайтди. Бу ҳодиса сўнгги икки йил ичида илк маротаба юз берди. Бу ҳақда Counterpoint Research тадқиқот компанияси хабар берди. Apple кетма-кет бешинчи марта йилнинг биринчи чорагида етакчи ўнталикда бешта ўринни эгаллашга муваффақ бўлди.
Иккинчи ва учинчи ўринларни мос равишда iPhone 16 Pro Max ва iPhone 16 Pro эгаллади. Хитой бозорида арзонроқ моделларга катта миқдорда субсидия берилиши ва унга бўлган талаб юқори бўлишига қарамай, флагман версиялар кетма-кет уч чорак давомида iPhone савдосининг деярли ярмини ташкил қилмоқда.
Февраль ойида сотувга чиққан iPhone 16e модели эса март ойидаги глобал рейтингда олтинчи ўринни эгаллади. У 2022 йилги iPhone SEʼдан қимматроқ бўлса-да, такомиллаштирилган техник хусусиятлари ва кенгайтирилган функсионаллиги туфайли савдода катта муваффақиятга эришди. Йил якунига келиб iPhone 16eʼнинг аввалги моделлардан ўзиб кетиши кутилмоқда.
Samsung ҳам мазкур рейтингда барқарор ўрнини сақлаб турибди: Galaxy А16 5G модели Шимолий Америка ва ривожланаётган минтақаларда савдо ҳажмининг кенгайиши ҳисобига бешинчи ўринга кўтарилди. Galaxy S25 Ultra эса ўтган йилдаги S24 Ultra билан солиштирганда бешинчидан еттинчи ўринга тушиб кетди. Бунга асосан смартфоннинг сотувга кечроқ чиқгани ва биринчи чоракда қисқароқ вақт давомида савдода бўлгани сабаб бўлди.
Арзон смартфонларга қизиқиш ҳам жадал ўсмоқда: нархи 100 доллардан паст бўлган моделларнинг бозор улуши 20 фоизга етиб, энг тез ўсаётган смартфонлар тоифасига айланди. Айниқса, Galaxy А06 ва Redmi 14C 4G моделлари ажралиб турди: Redmi 14C 4G Apple ёки Samsungъга тегишли бўлмаган ягона модел бўлиб, Redmi 13C 4G билан солиштирганда 43 фоизлик ўсишни қайд этди.
Аналитиклар фикрича, иқтисодий беқарорлик ва глобал савдо тизимидаги ўзгаришларга қарамай, энг машҳур смартфонларнинг ўрни ўзгармай қолади.
Изоҳ (0)