Голливуд актёри Киану Ривз Индиана штатидаги машҳур Indianapolis Motor Speedway профессионал автопойгасида илк бор иштирок этди.
У Шимолий Америка Toyota GR кубогида Eagles Cаnyon Racing жамоаси учун курашди. Мусобақа 5 октябрь куни бўлиб ўтди.
“Матрица” франшизаси юлдузи пойгада Toyota GR86 русумли машинаси билан иштирок этди. Спорт автомобилининг ён томонида актёрнинг исми, Канада байроғи ва BRZRKR қисқартмаси бор туширилган эди. Ривзнинг махсус кийимига ҳам туширилган BRZRKR ёзуви актёр қаламига мансуб комикслар сериясига ҳавола бўлди.
Пойга давомида Ривз 21-ўринга чиқди, бироқ 45-дақиқага келганда актёрнинг машинаси трасса чегарасидан чиқиб, майса устига учиб кетди. Бу лавҳа СRO Моtorsports Group пойга ташкилотчилари томонидан YouTube'да эълон қилинган видеода кўрсатилди.
Актёр жароҳат олмади ва бошқа иштирокчилар билан тўқнашиб кетмади. Бир дақиқадан сўнг Киану жароҳат олмаганига ишора қилиб, йўлини давом эттирди. У жами 35 нафар иштирокчи орасида 25-ўринни эгаллади.
Avto.ru қайд этганидек, Ривз аввал ҳам автопойгаларда қатнашган, лекин айнан 5 октябрь куни актёр профессионал спортда дебют қилган.
Изоҳ (0)