Kиaну Ривз ҳар доим Росомаха образини гавдалантиришни орзу қилгани ҳақида сўзлаб берди

Голливуд актёри Kиaну Ривз Reddit платформаси орқали мухлисларини қизиқтирган саволларига жавоб берди. Қуйида актёрнинг энг қизиқарли саволларга жавоблари келтирилади.

• Kиaну Ривзнинг айтишича, унинг ижодида рад этган ва кейинчалик бундан афсусланган роллари бўлмаган. Актёр ҳар доим Marvel кино оламидаги Росомаха супер қаҳрамонини гавдалантиришни хоҳлаган.
• Актёр ҳеч қачон суратга олиш майдончасидаги нарсаларни ўғирламаган. Бироқ у “Жон Уик”даги никоҳ узуги ва соатни, “47 Ронин” лойиҳасидаги қилични ва “Матрица” франшизасининг муаллифлари опа-сингил Вачовски томонидан тақдим этилган биринчи қизил таблеткани олган.
• Ривз Жеймс Ганн “Константин” фильмининг иккинчи қисмини суратга олади, деб умид қилмоқда.
• Актёр боққан биринчи ҳайвон Морковка лақабли денгиз чўчқаси бўлган. “Ўша пайтда беш ёки олти ёшда эдим. Морковка жуда ёқимтой бўлган”, — дейди актёр.
• Шунингдек, Ривз ўзга сайёраликлар билан гаплашса, ўзини бахтли ҳис қилишини айтган. “Мен улардан Ерга парвозлари қандай ўтганини сўрардим ва уларга ичимлик ичишни таклиф қилардим”, — дейди актёр.
• Ривз яқинда Кормак Маккартининг “Йўловчи” китобини ўқиб тугатган ва ўз мухлисларига ҳам ушбу романни тавсия қилди.
• Актёр режиссёр Девид Финчер (“Аждарҳо татуировкали қиз”, “Етти”, “Жанг клуби”, “Ғойиб бўлган”) билан ишлаш нияти борлигини маълум қилди.
• Ривз болалигида пойга машинаси ҳайдовчиси, кондуктор ёки астрофизик бўлишни орзу қилган. У ҳозирда киноларда суратга тушмаганида, мусиқани ўрганган бўлишини айтган.
• Актёр ўзи суратга тушган фильмлардан бирининг номини эслай олмади. Унинг севимли лойиҳалари орасида “Дарё бўйида”, “Билл ва Теднинг ақл бовар қилмас саргузаштлари”, “Матрица” трилогияси, “Иблиснинг адвокати”, “Менинг шахсий штатим Айдаҳо”, “Жон Уик” кинокартиналари бор.
• Ривз, шунингдек, нималардан завқланишини айтиб ўтди. “Менга мототцикл, ёзув машинкаси, япон вискиси, мусиқий гуруҳда ўйнаш, ўрганиш, китоб ўқиш ва яхши қизил шароб ёқади”, — дейди актёр.
• Актёрнинг болалигини эслатувчи энг севимли таомлари — пирог, пишлоқли макарон,  ерёнғоқ ёғи ва асал ҳисобланади.
• Ривз мюзиклда бўлишни жуда хоҳлаган, бироқ у қўшиқ айта олмагани учун кимдир уни таклиф қилишига шубҳа қилган.
• Актёр болалигида уйида арвоҳ кўрганига ишонади. Актёрнинг назарида, энагаси ҳам у билан бир вақтда бу арвоҳни пайқагандек туюлган.

Kиaну Ривз “Жон Уик-4” премераси олдидан савол-жавоб ўтказди. Жанговар фильмнинг суратга олиш жараёнларида Ривзни Голливуд мураббийи Патрик Мерфи тайёрлаган.