“Матрица” фильмининг навбатдаги қисми суратга олинади

Warner Bros. кинокомпанияси “Матрица” франшизасининг бешинчи қисмини ишлаб чиқмоқда. Бу ҳақда “Правила жизни” хабар берди.

Нашрда қайд этилишича, мазкур фильм режиссёр Лана ва Лили Вачовскилар иштирокисиз суратга олинади. Бу сафар фильмнинг навбатдаги қисмига режиссёр Дрю Годдард бошчилик қилади. Годдард “Эл-Роял меҳмонхонасида яхши нарса йўқ”, “Марслик” фильмлари билан танилган бўлиб, эндиликда “Матрица”нинг бешинчи қисми сценарийси муаллифи ҳамдир. Лана Вачовски ижро этувчи продюсер сифатида иш олиб боради.

Франшизанинг аввалги қисмлари юлдузлари Киану Ривз, Керри Энн-Мосс ва Лоуренс Фишбёрн ўз ролларини қайта ижро этишлари масаласи ҳозирча очиқ қолган, сюжет тафсилотлари ҳам ошкор этилмаган. Бироқ Warner Bros. Motion Pictures президенти Жесси Эрман сўзларига кўра, сюжет “Матрица”нинг аввалги қисмларини ажойиб тарзда давом эттиради.

“Матрица” франшизасининг биринчи қисми 1999 йилда намойиш этилган бўлиб, фильмнинг классикага айланишига ундаги ажойиб инқилобий ғоялар ва замонавий визуал эффектлар ёрдамида яралган жанг саҳналари сабаб бўлган.