“Матрица” фильми 25 ёшда: Нeo, Тринити ва фильмдаги бошқа қаҳрамонлар ҳозир қандай кўринишда? (фото)

1999 йилда ака-ука Вачовскилар томонидан суратга олинган “Матрица” номли илмий фантастик фильми дунё экранларига чиқди. Фильмда машиналар томонидан одамларнинг матрицага мажбуран улангани ва улардан энергия сифатида фойдалангани ҳақидаги келажак ҳаётидан ҳикоя қилади.

Фильмда Нeo исмли хакерга ҳақиқий дунё аслида қандайлигини аниқлаш ва инсониятни қутқариш вазифаси юклатилади. Асарнинг муваффақиятли чиқиши ва энг яхши фильмлар рўйхатига қўшилишида, албатта, унда иштирок этган актёрларнинг ўрни катта. Қуйида “Матрица” даги асосий қаҳрамонларини гавдалантирган актёрлар ҳаёти қандай кечгани ҳақида сўз боради.

Киану Ривз (Нeo)

Канадалик актёр 35 ёшида “Матрица”да Томас Андерсон, яъни Нeo образини гавдалантирган. Киану Ривз ушбу фильмда ўз мақсадини аниқ биладиган ва ўзига ишончи баланд қаҳрамонни ижро этган.

Фильм унга оламшумул машҳурлик олиб келган бўлса-да, бундан аввал Киану Ривз “Тезлик” ва “Иблис ҳимоячиси” каби лойиҳаларда суратга тушган. Аввалига “Матрица” фильмидаги Нeo ролини бошқа актёр ижро этиши керак эди. Продюсерлар бу ролга Уилл Смитни афзал кўрди, лекин у бошқа фильмда ишлашни танлади ва таклифни рад этди.

Киану Ривз оила қурмаган, ҳаёти давомида у бир нечта машҳур актрисалар, жумладан Керри-Энн Мосс, Сандра Буллок, Клер Форлан, Чайна Чоу ва бошқалар билан муносабатда бўлган. Актёрнинг фарзандлари ҳам йўқ. Ривзнинг қаллиғи Женнифер Сайм ҳомиладор бўлган, бироқ унинг қизи ўлик туғилган. Сўнг 2001 йил апрель ойида аёл автоҳалокатда вафот этган.

Киану Ривз ҳозирда 60 ёшда. У фильмларда фаол рол ўйнашда давом этмоқда. Актёр ҳозирда  рассом Александра Грант билан бахтли эканини таъкидлайди.

Лоуренс Фишбёрн (Морфей)

Америкалик актёр “Матрица”да Морфей ролини тахминан 38 ёшида ижро этган. Унинг роли актёрга катта машҳурлик олиб келган. “Матрица”дан аввал Фишбёрн “Севги нималарга қодир” номли фильмда иштирок этган ва “Оскар” мукофотига номзод бўлган.

Морфей ролидан сўнг Голливуд юлдузи “Уддалаб бўлмас топшириқ”, “Ганнибал”, “Жон Уик”, “Трансформерлар: Ибтидо” ва бошқа машҳур фильмларда суратга тушган.

Актёр икки марта турмуш қурган ва унинг тўрт нафар фарзанди бор. Лоуренс Фишбёрн ҳозирда 63 ёшда. У кино саноатидаги фаолиятини давом эттирмоқда ва шахсий ҳаёти тафсилотларини сир тутмоқда.

Керри-Энн Мосс (Тринити)

Канадалик актриса Тринити образини гавдалантирганда 32 ёшда эди. “Матрица” фильмидан кейин Керри-Энн Мосс “Қизил сайёра”, “Помпей”, “Унутма”, “Шоколад” ва бошқа кўплаб фильмларда иштирок этган.

“Матрица” фильмини суратга олиш жараёнида актриса ўзининг ҳамкасби Киану Ривз билан қисқа муддат ишқий муносабатда бўлди. Жуфтлик ажрашгач, Керри-Энн Мосс актёр Стивен Ройга турмушга чиқди. Оила Оуэн ва Жейден исмли ўғиллари ва Beatрис исмли қизи дунёга келди.

Керри-Анн Мосс ҳозирда 57 ёшда ва актёрлик фаолиятини давом эттирмоқда.

Ҳьюго Уивинг (Агент Смит)

Британиялик австралиялик актёр 39 ёшида “Матрица” фильмида суратга тушган бўлиб, ҳозирда 64 ёшда.

Агент Смит образи Уивингга катта машҳурлик олиб келди, сўнг актёр “Узуклар ҳукмдори”, “Вендетта инқилоби”, “Хоббит”, “Капитан Америка: Биринчи қасоскор” ва бошқа кўплаб фильмларда муваффақиятли ролларни ижро этди.

1984 йилдан бери у Катрина Гринвуд билан бирга. Жуфтликнинг икки нафар фарзанди — ўғли Гарри ва қизи Холли бор. Улар Австралиянинг Сидней шаҳрида яшайди. Аммо Уивинг ва Гринвуд муносабатларини никоҳ билан қонунийлаштирмаган.

Жо Пантолиано (Сайфер)

Америкалик актёр тахминан 48 ёшида Сайфер ролини ижро этган. Ҳозирда у 73 ёшни қарши олган.

Жо Пантолиано “Матрица” фильмидан аввал кўплаб муваффақиятли лойиҳаларда иштирок этди, аммо айнан Сайфер образи унга бутун дунё бўйлаб машҳурлик келтирди. Жо Пантолиано “Сопрано клани” телесериалида ҳам иштирок этган ва Эмми мукофотига сазовор бўлган.

Актёр икки марта турмуш қурган. 1979 йилдан 1985 йилгача у Морган Кестер билан яшаган, уларнинг бир нафар ўғли бор. 1994 йилда Пантолиано Ненси Шеппардга уйланган ва бу никоҳда учта фарзанд туғилган. Ҳозирда актёр оиласи билан Лос-Анжелесда яшайди.