Календарь август ойининг ўрталарини кўрсатмоқда, ҳадемай куз фасли ҳам эшик қоқади ва жазирама кунлар салқин ёмғирли ҳавога алмашади. Аммо куз фаслида руҳан умидсизликка тушишга шошилманг. Ахир ушбу мавсумда ҳам энг гўзал хотираларни яратиш ёки шунчаки мароқли фильмларни томоша қилиш мумкин.
“Нью Йоркда куз” (2000)
Мазкур фильм, албатта, томоша қилишга арзийди. Унда Нью Йорк марказий боғининг кузги манзаралари, маҳоратли актёр Ричард Гир ва Вайнона Райдернинг ажойиб образларидан баҳраманд бўлишингиз мумкин.
Бош қаҳрамон Уилл Кейн муваффақиятли тадбиркор бўлиб, туғилган кунини нишонлаётган 22 ёшли Шарлотта билан ресторанда танишиб қолади. Ёшдаги кескин фарқ — 26 йиллик тафовутга қарамай, Кейн ҳис-туйғулари чин эканлигига ишонч ҳосил қилади. Афсуски, Шарлотта жиддий касал бўлади ва юраги билан боғлиқ муаммолар туфайли бир йил умри қолган бўлади.
“Фарахли ноябрь” (2001)
Kiaну Ривз ва Шарлиз Терон иштирокидаги машҳур Америка мелодрамасида воқеалар кузги манзаралар фонида содир бўлади.
Нелсон Мосс исмли тадбиркор карьераси учун шахсий ҳаётини қурбон қиладиган реклама агенти бўлиб ишлайди. Кунларнинг бирида у шу пайтгача учратган ҳеч қайси аёлга ўхшамайдиган Сара билан танишиб қолади. Уларнинг тасодифий танишуви яна бир нечта учрашувлар билан давом этади. Қувноқ Сара Нелсоннинг ҳаётини тубдан ўзгартиради ва Нелсонга ҳаётни ва ундан қандай завқланиш кераклигини кўрсатади. Бироқ ажойиб севги ҳақидаги ҳикоя фожиали якунланади.
“Таржима машаққатлари” (2003)
Ноодатий мелодрама классик муҳаббат ҳикояси эмас, балки икки киши шунчаки биргаликда бўлгани туфайли бахтли бўлишларини ифодалаб берадиган фильмдир. Ундаги воқеалар сентябрь ва октябрь ойларида Токиода суратга олинган.
Шарлотта (Скарлетт Йоханссон) ва Боб (Билл Мюррей) бир-биридан тубдан фарқ қиладиган икки инсон бўлса-да, айни вақтда иккиси ҳам атрофдаги оламга нисбатан ишончи жуда пастдир. Уларнинг романтика билан ишлари йўқ, иккиси шунчаки биргаликда вақт ўтказишни яхши кўради.
“Жаноб Морганнинг сўнгги муҳаббати” (2013)
Фильмда гўзал Париж шаҳрининг кузги манзаралари акс этган. Унда америкалик кекса профессор Метю Морган ҳақида ҳикоя қилинади. Метюнинг бутун умр жуда яхши кўрган рафиқаси бир неча йил аввал вафот этди. Унинг ҳаётида ҳеч қандай мазмун қолмагандек туюлади. Аммо кунларнинг бирида у ёш, қувноқ ва очиқкўнгил парижлик рақс ўқитувчиси билан танишиб қолади. Полин Метюни тушкунликдан чиқишга ва ҳаётга яна бир бор ижобий кайфиятда боқишга ёрдам беради.
“Ёшликка қайтиб” (2014)
Ёши 40 га қараб кетган Жош ва Корнелия фарзандли бўла олмайди. Уларнинг кўп болали дўстлари эса эр-хотиндан узоқлашиб бораётганини ҳис қилади. Шу сабабли улар юрагида ўти бор, ёш дўстларни излашга тушади ва хаёли ажойиб ғояларга тўла ёш йигит ва қиз билан танишади ва ҳаётлари ўзгариб кетади.
Изоҳ (0)