Қуйидаги машҳурлар энг қиммат машиналар, қасрлар ва муваффақиятли ҳаётнинг бошқа атрибутларини сотиб олишлари мумкин, аммо улар пулни оқилона сарфлашни афзал кўради.
Kиaну Ривз
Kиaну Ривз Голливудднинг энг муваффақиятли актёрлардан бири. Шундай бўлса-да, миллионлаб мухлисларнинг кумири камтарона яшайди: у улкан қасрлар, виллалар ва ажойиб қимматбаҳо машиналар сотиб олмайди. Фақатгина ҳашаматли мототциклига ҳавас қилиш мумкин — Kиaну тезликни ёқтиради. Аммо актёр буни одатга айлантириб олмаган: у энг ноёб ва энг қиммат моделларни йиғмайди, кимошди савдосида қатнашмайди.
Афтидан, Ривз ақл бовар қилмайдиган даражадаги гонорарлар ва улар берадиган имкониятларга умуман аҳамият бермайди. Аммо актёр хайрия ишларига пул аямайди.
Кира Найтли
Кира Найтли кўпинча бой аёллар ролини ўйнайди — бриллиант тақинчоқлар ва қимматбаҳо либослар кияди. Лекин ҳаётда актриса бундай ҳашаматдан узоқ юради. Интервьюларида у пулни бахтнинг асосий ўлчови деб ҳисобламаслигини айтади. Унинг фикрича, ҳақиқий бахт бу — оила ва яқинлардир.
Кира, шунингдек, инсон ўзини бошқалардан яхшироқ деб ҳисобламаслиги ва жамиятдан ажралган ҳолда яшамаслиги кераклигини таъкидлайди.
Сара Жессика Паркер
Дунёга машҳур актриса Сара Жессика Паркер эри — актёр Мэттью Бродерик ва уч фарзанди билан жуда камтарона турмуш тарзини олиб боради. Унинг бойлиги 100 миллион долларга яқин бўлишига қарамай, исрофгарчиликка йўл қўймаслиги болалиги билан боғлиқ: у катта оилада ўсган, унинг ҳаёти, жумладан, озиқ-овқат, уй-жой ва кийим-кечаги тўғридан тўғри ижтимоий нафақаларга боғлиқ эди. Шунинг учун актрисага болалари учун кийимларни каттадан кичикка ўтказиш одатий ҳол. Эр-хотин нарсаларни ҳам, пулни ҳам тежаб ишлатади.
Зои Дешанель
Зои турмуш ўртоғи Бен Гиббарддан ажрашиш учун ариза берганида, кўплаб ҳужжатлар оммага эълон қилинди, натижада актрисанинг ойлик бюджети ошкор бўлди. “Ёзнинг 500 куни” фильми юлдузи бу ҳолатдан деярли мамнун эмасди.
Маълум бўлишича, Зоининг ойлик даромади ўртача 95 минг долларни ташкил этади, аммо харажатлари даромаднинг чорак қисмидан ошмаган — атиги 22,5 минг доллар. Шу вақтгача йиғилган маблағлар миқдори ошкор этилмаган, актриса акциялар ва кўчмас мулкка сармоя киритган.
Бироқ Дешанел хайрия тадбирларидаги иштироки билан ҳам танилган. Сиз бу актрисани қимматбаҳо бутикларда учратмайсиз. Умуман олганда, актриса шон-шуҳрат ва ҳашамга ўч юлдузлардан эмас.
Тайра Бэнкс
Victoria’s Secret брендининг собиқ модели подиум билан чекланиб қолмаган. У “Американча топ модел” телешоусига муаллифлик қилади. Шоу омадли чиқиб, банкдаги ҳисобини 75 миллион долларга кўпайтирди. Бироқ бу Тайра энди хоҳлаган нарсасини сотиб олишга қодир дегани эмас. Уни ким тўхтатмоқда? Унинг ўзи!
Тайра Forbes журналига берган интервьюсида: “Мен тез-тез бухгалтеримдан фалон нарсани сотиб олсам бўладими, деб сўрайман ва бунга жавобан унинг кулганини эшитаман. Ҳа, мен тежамкорман ва ҳар доим шундай бўлганман”, — дейди.
Шунингдек, Тайра Бэнкс қиммат смартфон ёки планшетга пул сарфлашни истамай, ёзиш учун оддий қоғоз дафтардан фойдаланади. Қиммат ресторанда овқатланиш ўрнига уйи яқинидаги оддий фастфуд кафени афзал кўради.
Женнифер Лоуренс
“Оскар” совриндорини тежамкор ҳаётни афзал кўрганлар учун намуна деб ҳисоблаш мумкин. У ҳали ҳам Лос-Анжелесга кўчиб ўтганда сотиб олган жуда камтарона квартирасида яшайди — катта уй сотиб олишни режалаштирмайди.
Бошқа юлдузларга харид қилишда шахсий ёрдамчилар кўмак беришса, Женнифер чегирмали купонлардан фойдаланади ва арзон нархлардаги йирик дўконларга ташриф буюради. Машина танлашда ҳам актриса ўзини кўрсатмайди: Bugatti-Mazerati’ига қурби йетса-да, Volkswagen ва Chevrolet Volt’да юради.
Сўнгги пайтгача унинг бойлиги турли манбалар томонидан 2 миллиондан 7 миллион долларгача баҳоланган. “Ҳаёт-мамот ўйинлари” фильмининг учинчи қисмида иштирок этганидан кейин бойлиги тахминан 10 миллион долларга кўпайган, аммо бу Женниферни одатларидан воз кечиб, ортиқча пул сарфлашига сабаб бўлмаган.
Леонардо Ди Каприо
Лео 1997 йилда “Титаник” фильмида рол ўйнагунга қадар унчалик машҳур бўлмаган актёр эди. Фильмдан сўнг у дарҳол нафақат энг таниқли, балки энг кўп маош олувчи актёрлардан бирига айланди: ҳозир унинг бойлиги 200 миллион доллардан ошади.
Шунча бойликка эга бўлса-да, Лео ҳашаматли нарсаларга харажат қилмайди, аммо биргина истисно бор: актёр Белиз яқинидан 2,4 миллион долларга орол сотиб олган. Шуни ҳисобга олмаганда Ди Каприо миллионерга унчалик ўхшамайди — у эколог, у ҳатто БМТда ҳам чиқиш қилган, шунинг учун унинг гаражида фақат биттагина машинаси бор — Toyota Prius.
Лео интервьюларининг бирида кўп пул сарфлашни ёқтирмаслигини айтади, чунки етарли шахсий маблағга эга бўлиш унга актёр сифатида ижодий эркинликнигина кафолатлайди холос. Шу билан бирга, Лео экологик хайрия ташкилотлари эҳтиёжлари учун сахий донор сифатида танилган.
Унинг ёрдами билан йўлбарсларни ҳимоя қилиш учун 39 миллион доллар йиғилган. У ҳатто ўзининг номи билан аталадиган хайрия жамғармасини яратди, у бошқа нарсалар қатори ичимлик сувини тозалаш дастурини амалга оширади, шу йўл билан Африкадаги деярли ярим миллион кишига ёрдам беради.
Кристен Белл
Вероника Марс роли билан танилган актриса ва унинг турмуш ўртоғи Дакс Шепҳерд тежамкорлиги билан машҳур. Кристен бу ҳақда жуда хотиржам гапиради ва чегирма купонларидан фойдаланишни севимли машғулотларидан бири деб билади. У яна шундай дейди: “Эрим ва мен қишлоқда катта бўлганмиз ва бундан умуман уялмаймиз”. Оила биргаликда 18 миллион долларга яқин пул ишлаган, аммо улар ҳалигача исрофгарчиликка йўл қўймайди.
Интервьюда эр-хотин тўйларини алоҳида мамнуният билан эслайди: бошқа машҳурлар экзотик жойларда ҳашаматли маросимларни ташкил қилаётганда, Кристен ва Дакс суд биносида никоҳни қайд қилиш ҳужжатига имзо чеккан холос. “Тўй ўтказиладиган жойга боришимиз учун бензинга 140 доллар сарфлаганмиз”, — деб мақтанишади улар.
Тоби Магуайр
Тобининг ота-онаси (отаси ошпаз, онаси котиба) у икки ёшида ажрашган. Тоби жуда камбағал муҳитда улғайган, бу ўз таъсирини ўтказмай қолмаган. Шу сабаб актёр исрофгарчиликка йўл қўймайди. “Ўргимчак одам” фильмининг уч қисмидан деярли 30 миллион доллар ишлаб топган бўлса ҳам қимматбаҳо нарсалар харид қилмайди.
Интервьюларининг бирида Тоби пулларининг ҳаммасини сарфлаб юборса, кейин пул топиш учун ҳаракат қилиш заруратига дуч келишини айтади. Ҳозирда у суратга тушмаса ҳам бўлади — охирги пайтларда у камдан-кам ҳолларда рол ўйнаяпти, хотини ва икки боласи билан вақт ўтказишни афзал кўради. Айтганча, унинг рафиқаси Женнифер Мейер машҳур аёл эмас, у оддий заргар. Тўғри, унинг дадаси кино продюсери, лекин бу Тоби учун аҳамиятга эга эмас, чунки у юлдуз бўлганидан кейингина турмуш қурган.
Тоби Калифорнияда катта кўчмас мулк сотиб олган, лекин у бу харидини фойдасиз ҳашамат эмас, аксинча, вақт ўтиши билан ўсиб борувчи кўчмас мулкка яхши сармоя деб ҳисоблайди. Тоби бошқа нарсаларда ҳам камтарин — у деярли вегетариан, тери ва мўйнадан тикилган кийим киймайди.
Уоррен Баффет
Уоррен Баффет дунёнинг энг бой одамлари рўйхатида 7-ўринни эгаллаб турибди ва 2022 йилда пул йўқотмаган, ҳаттоки капиталини кўпайтиришга муваффақ бўлган ягона миллиардер саналади.
Уоррен Баффет ҳозир 91 ёшда ва молия оламининг тирик афсонаси ҳисобланади. У ўзининг биринчи акцияларини 11 ёшида сотиб олади ва дарҳол ўз тажрибасига асосланиб, уни бутун ҳаёти давомида бошқарадиган қоидани шакллантиради: қимматли қоғозларни сотиб олиш ва кутиш керак, уларни фақат нарх аввалгисидан бир неча баравар юқори бўлганда сотиш лозим.
32 ёшида Уоррен Баффет аллақачон миллионерга айланган эди, 80 йилларда миллиардерга айланади, 2008 йилда эса у Ер юзидаги энг бой одам унвонини олади. Аммо бундай мисли кўрилмаган муваффақият биз ўрганиб қолган миллиардерларнинг пулга бўлган муносабатига зид эди, чунки унинг асосий қоидаси топган пулини юз фоиз тежаш, сарфламаслик, балки бюджетни янада оширишга инвестиция қилиш эди.
Миллиардер 1958 йилда сотиб олган эски уйида яшайди, “thrifty” — тежамкор давлат рақами бўлган эски машина ҳайдайди ва фастфудда овқатланишни афзал кўради. Биржа нархлари пасайиб кетганидан хабар топгач, гамбургерни бир долларга арзонроқ сотиб олгани ҳам кўпчиликни ҳайратда қолдирган. Фақат хайрия ишлари бундан мустасно — миллиардер бошқа одамларга моддий ёрдам беришни “дунёдаги энг осон иш” деб атайди.
Изоҳ (0)