Genuine Impact жамоаси битта фильм учун энг кўп ҳақ олган актёрлар рейтингини тузиб чиқди. Рейтингни тайёрлашда “Википедия”даги маълумотлардан фойдаланилган.
Унга кўра, кино тарихида битта фильм учун энг кўп ҳақ олган актёр Киану Ривз ҳисобланади. “Матрица”нинг давоми сифатида тақдим этилган фильм учун актёрга 156 миллион доллар миқдорида гонорар тўланган. Ушбу сумма намойишлардан тушган даромад фоизи ва авансни ҳам ўз ичига олган.
Ривздан кейинги ўринда эса 1999 йили “Олтинчи ҳиссиёт” фильмидаги роли учун 100 миллион доллар миқдорида ҳақ олган Брюс Уиллис исми қайд этилган.
Учинчни ўринни Голливуд юлдузи Том Круз эгаллади. У ўзининг актёрлик фаолияти давомида 3 марта 100 миллион доллар миқдорида гонорар олган. Булар – “Топ Ган: Меверик”, “Дунёлар жанги” ва “Бажариб бўлмас топшириқ — 2” фильмлари бўлган. Бундан ташқари, Круз франшизанинг биринчи қисми учун тўланган 70 миллион доллар миқдоридаги гонорар билан рейтингнинг 7-ўрнини ҳам банд этган.
Уилл Смит “Қора либосдаги одамлар-3” фильми учун 100 миллион доллар (4-ўрин), Роберт Дауни-кичик “Темир одам-3”, “Қасоскорлар: Абадийлик жанги” ва “Қасоскорлар: Интиҳо” фильмлари учун 75 миллион доллардан гонорар олган.
Рейтингнинг умумий кўриниши қуйидагича:
1. Киану Ривз (“Матрица: Қайта юклаш”, “Матрица: Инқилоб” – 156 миллион)
2. Брюс Уиллис (“Олтинчи ҳиссиёт” – 100 миллион)
3. Том Круз (“Топ Ган: Меверик”, “Дунёлар жанги”, “Бажариб бўлмас топшириқ-2” – 100 миллион)
4. Уилл Смит (“Қора либосдаги одамлар-3” – 100 миллион)
5. Роберт Дауни-кичик (“Темир одам-3”, “Қасоскорлар: Абадийлик жанги”, “Қасоскорлар: Интиҳо” – 75 миллион)
6. Сандра Буллок (“Гравитация” – 70 миллион)
7. Том Хенкс (“Форрест Гамп” – 70 миллион)
8. Том Круз (“Бажариб бўлмас топшириқ” – 70 миллион)
9. Харрисон Форд (“Индиана Жонс ва биллур бош суяк қироллиги” – 65 миллион)
10. Жек Николсон (“Бетмен” 1989 йил – 60 миллион)
Изоҳ (0)