Биргина фильм учун 100 миллион доллардан ортиқ гонорар олган жаҳон кино юлдузлари

Режиссёрлар фильм муваффақияти учун актёрларга жуда кўп пул тикади. Айниқса, асар Голливуднинг энг кассабоп фильмларидан бирига айланишида актёрлар ижро этган роли муҳим аҳамиятга эга. Баъзи юлдузлар шунчалик катта миқдорда гонорар оладики, уларнинг маоши фильм бюджетининг ярмини ташкил қилади. Қуйида машҳур актёрларга сармоя киритиш орқали муваффақият олиб келган фильмлар ва актёрларнинг гонорари ҳақида сўзлашамиз.

Уилл Смит, “Қора либосдаги одамлар 3” (2012)

Гонорар: 100 миллион доллар

Актёр Уилл Смит фильмнинг учинчи қисмида ҳам барчага таниш бўлган Жей ролини ижро этди. Унинг қаҳрамони аввалгидек ажойиб ва позитив характерли шахс сифатида тасвирлангани боис Уилл мухлисларини янада шод этди.

Актёр фильмдаги роли учун 18 миллион долларлик шартнома имзолаган ҳамда касса тушумларининг 15 фоизини олишни режалаштирган эди. Фильм 624 миллион доллар даромадга чиққанда Смит 100 миллион доллардан кўпроқ маош олишга эришди ва у тарихдаги энг кўп даромад оладиган актёрлардан бирига айланди

Том Круз, “Дунёлар жанги” (2005)

Гонорар: 100 миллион доллар

Актёр Том Круз иштирок этган энг яхши фильмлардан бирига айланган “Дунёлар жанги” режиссёр Стивен Спилберг томонидан суратга олинган. Асар Герберт Уэллс романи асосида яратилган. Фильмни суратга олиш ишлари бир неча ой давом этган ва Том каскадёрлар ёрдамисиз барча мураккаб ҳаракатларни мустақил бажарган.

Фильм учун Том Круз 100 миллион доллар гонорар олган. Бу касса тушумларининг 20 фоизини ташкил этади.

Брюс Уиллис, “Олтинчи ҳиссиёт” (1999)

Гонорар: 120 миллион доллар

“Олтинчи ҳиссиёт” фильмида актёр Брюс Уиллис ўзини серқирра ижодкор эканини исботлади. Фильмда у барчанинг муаммосини чуқур ҳис этадиган психиатр ролини ижро этган. Фильм актёрнинг нафақат жангари фильмларда, балки драма йўналишида ҳам юқори истеъдод соҳиби эканлигини исботлади.

Брюс Уиллис мазкур роль учун 14 миллион доллар гонорар ҳамда фильм даромадининг 17 фоизини олган. Буларнинг барчаси унга жами 120 миллион доллар гонорар келтирди.

Kиaну Ривз, “Матрица: қайта юклаш” (2003)

Гонорар: 126 миллион доллар

Актёр Kиaну Ривз ушбу фильмда ўз мақсадини аниқ биладиган ва ўзига ишончи баланд қаҳрамонни ижро этган. Унинг жангини томоша қилиш мухлисларга ҳақиқий завқ беради.

Актёр аввалида фильм учун 15 миллион доллар гонорарга рози бўлган, бироқ унинг агенти фильм кассасининг 15 фоизини олишни таклиф этган ва актёр бунга рози бўлган. Юқори натижаларни кўрсатган “Матрица” нинг учинчи қисми Kиaнуга 126 миллион доллар даромад олиб келди ва шу тариқа у 2003 йилнинг энг кўп даромад олган актёрлардан бирига айланди.

Шундай бўлса-да, Kиaну Ривз юлдузлик касаллигига чалинмаган саноқли актёрлардан бири саналади. Хайрли ишларни ҳам яхши кўрувчи Kиaну 80 миллион доллар гонорарини фильм дизайнерлари ҳамда махсус эффектлари учун масъул бўлган жамоага тарқатиб юборган. 12 нафар каскадёрга эса янги мототцикл совға қилган.