Аксарият ҳолларда актёрлар ижро этган образи уларнинг реал ҳаётига алоқадор бўлмайди, аммо бугунги қаҳрамонларимиз истиснодир. Қуйида экранларда мард, жасур ва олийжаноб ролларда тасвирланган, ҳаётда эса бунда-да ажойиб инсон бўлган киноюлдузларни санаб ўтамиз.
Брюс Ли
Брюс Ли актёрлик фаолиятини болаликдан бошлаган.Отаси Брюсни Гонконг киноси билан яқиндан таништирган. АҚШга кўчиб келгандан сўнг, Брюс фильмларда рол ижро этишни бошлади, аммо актёр ирққа оид стереотипларга дуч келди. Чунки Голливудда осиёликлар одатда заиф, ҳаммага мослашган ва оддий ишчи ёки хизматкор сифатида тасвирланган. Ип Ман ёрдамида эгаллаган жанг санъати ёрдамида Брюс жанговар фильмларда кучли, чаққон ва эпчил қаҳрамонларни ўйнай бошлади. Айнан Брюс Ли туфайли йиллар давомида янги стереотип пайдо бўлди. Энди инсонларда “барча осиёликлар жанг санъатидан хабардор” деган фикр пайдо бўлди.
Жан-Клод Ван Дамм
Болалигида Жан-Клод озғин ва касалманд бола эди. Шунинг учун отаси 10 ёшли ўғлини каратэга беради. Бола бор вужуди билан машқ қила бошлайди, шу билан бирга бодибилдинг билан ҳам шуғулланади. 18 ёшида бўлажак актёр каратэ бўйича қора белбоғ олади ва бодибилдингда “Жаноб Бельгия” унвонини қўлга киритади. 1979 йилда Ван Дамм “Ит ва бўри орасидаги аёл” фильмида дебют қилади. 20 ёшида эса у аллақачон спорт зали очишга, уни Брюсселда энг яхшисига айлантиришга, бир неча йилга етадиган мўмай даромад қилишга улгуради. Кейинроқ АҚШга актёр бўлиш учун кўчиб кетади ва у ерда Чак Норрис билан учрашади. Брюс Ли сингари, Жан-Клод Ван Дамм асосан жанговар фильмларда ўйнаган. “Кикбоксчи”, “Икки карра зарба”, “Қонли спорт” каби кўплаб фильмларда иштирок этган.
Жеки Чан
Жаҳон киносининг тирик афсонаси, гонконглик Жеки Чан учун 90 йилларнинг охири ва 2000 йилларда актёрлик фаолиятининг фаол даври бўлди. Голливуднинг “Тиғиз вақт”, “Шанхайлик шоввозлар” каби фильмларидаги образидан кўнгли тўлмагач, ўзининг продюсерлик компаниясига асос солди ва асосий эътиборни Гонконг киносига қаратди. Жеки Чан мухлислари актёрнинг кинодаги қаҳрамони билан бирлашиб кетган ажойиб характери учун яхши кўради. Жеки Чан юзлаб жароҳатлар олгани ва бир нечта операцияларни бошидан ўтказганига қарамай, ижод йўлида давом этиши барчани ҳайратга солади.
Чак Норрис
Чак Норрис 1968 йилда илк бор экранларда кўринган бўлса-да, айнан 70 йилларда кино саноатидаги фаолиятига жиддий эътибор берган. Чак Норрис деганда юзлаб душманлари билан якка ҳолда кураша оладиган қудратли инсон қиёфаси кўз олдимизга келади. Ҳақиқий ҳаётда ҳам у образлари каби кўплаб муваффақиятларга эришган. Мактабни тугатгач, каратэ бўйича оғир вазн тоифасида Жаҳон чемпионига айланади ва дзюдо бўйича қора белбоғга эга чиқади. Норрис кинода актёр бўлиб эмас, балки каскадёрлар мураббийси сифатида иш бошлаган. У “Изсиз йўқолганлар”, “Октагон”, “Унсиз ғазаб”, “Мажбурий қасос” ва бошқа кўплаб фильмларда суратга тушган.
Марк Уолберг
Марк Уолберг экранда хавфли ва қўпол эркак образини гавдалантирганда унинг рол ўйнашига ҳожат ҳам қолмайди. У хавф-хатарларга тўла нотинч болаликни бошдан ўтказган. 80 йилларнинг охирида ўспирин Марк бир нечта инсонга ҳужум уюштирган пайти актёрлик ҳақида ўйлаб ҳам кўрмаганди. 1988 йилда у вьетнамлик шахсга ҳужум қилгани учун қамоққа олинган. Уолберг тез орада озодликка чиқди ва ўтмишни унутиб, мусиқа яратишни бошлади. Шу тариқа Марк кино саноатига ҳам кириб келди ва Голливудда ўз ўрнига эга бўлди.
Kиaну Ривз
Kиaну Ривз катта кинодаги фаолиятини “Билл ва Теднинг ажойиб саргузаштлари” фильми билан бошлаган, шундан сўнг “Тўлқинларни бўйсундириб”, “Тезлик”, “Иблис ҳимоячиси”, “Матрица”, “Константин: зулмат ҳукмдори” ва “Жон Уик” фильмларида рол ўйнаган. Бу фильмларнинг барчасини бутун дунё бўйлаб миллионлаб одамлар томоша қилган, аммо Kиaну бундан ҳеч қачон кибрланиб кетмаган. У бир неча ўнлаб километр йўл босиб, мушкул аҳволда қолган нотаниш одамни уйига олиб бориши мумкин, касалхоналарга пул хайрия қилади, у ҳеч қачон оддий одамларга паст назар билан қарамайди. Метрода юради ва мухлислари билан доим дўстона муносабатда бўлади. Шон-шуҳрат ва бойлик Kиaнуни бузолмади, балки унга янада хайрли ишларни қилиш имкониятини берди.
Стив Бушеми
Стив Бушеми “Қутурган итлар” ва “Фарго” фильмларида жиноятчи ролларини, “Сопранолар” ва “Ерости империяси” телесериалларида бош ролларни ижро этган. Машҳурликка эришишдан аввал Стив 1980 йилдан 1984 йилгача Нью-Йоркда беш йил давомида ўт ўчирувчи бўлиб ишлаган. Орадан 17 йил ўтгач, АҚШда содир бўлган ва бутун дунёни ларзага келтирган11 сентябрь воқеаларида машҳур актёр ўт ўчирувчи формасини кийиб, вайроналарда қолган инсонларни қутқаришга кетган. У ҳар сафар ҳаётини хавф остига қўйиб, бир ҳафта, кунига 12 соат давомида шундай ишлади.
Изоҳ (0)