Ҳар битта ролни маромига етказиб ижро этиш учун актёрдан катта маҳорат талаб қилинади. Баъзида эса маҳорат нинг ўзи камлик қилади, чунки қўшимчасига махсус кўникмаларни ҳам эгаллашга тўғри келади. Қуйида фильмдаги роли учун махсус кўникмаларни ўзлаштирган актёрлар ҳақида ҳикоя қиламиз.
Киллиан Мерфи — “Оппенгеймер”
Баъзида актёрларга бошқа миллат вакили ролини ўйнашда янги тилни ўрганиш ёки маълум ибораларни ёдлашга тўғри келади. “Оппенгеймер” фильми қаҳрамони Киллиан Мерфи фильм бошида равон голланд тилида маъруза қилади, гарчи у фильмни суратга олишдан олдин бу тил ҳақида ҳеч нарса билмаган эди. Роберт Оппенгеймернинг эски маърузалари йўқолгани сабабли продюсерлик гуруҳи квант механикаси бўйича янги маърузаларни олиб, уларни голланд тилига таржима қилган. Киллиан ушбу матнни келиб чиқиши голландиялик оператор Кристофер Ноландан она тилида ўқиб беришини сўраган. Матн минглаб сўзлардан иборат бўлишига қарамай, у матнни яхши эслаб қолган. У маърузани ҳали ҳам сўзма-сўз эслайди.
Кейт Уинслет — “Аватар: Сув йўли”
Кейт Уинслет ва Жеймс Кемерон “Аватар”нинг иккинчи қисмида биринчи марта сув билан боғлиқ саҳнада ишлагани йўқ. Улар бир неча йиллар олдин “Титаник” фильмида ҳам бирга ижод қилган. Унда Кейт музли сувда соатлаб қолишга мажбур бўлган. Уинслет ҳам бошқа суратга олиш гуруҳи аъзолари каби оғир касал бўлиб қолган. Шунга қарамай, барча кадрлар сувда бажарилиши керак бўлган кейинги жараёнлар Кейтни қўрқитмади, балки унга туртки берди. Актриса сув остида ўзини ишончли ҳис қилиш учун сузиш билан шуғулланган, шунингдек, Голливуд актёрлари орасида сувда нафасни ушлаб туриш бўйича рекорд ўрнатди. Узоқ вақт давомида рекорд Том Крузга тегишли бўлиб, у “Уддалаб бўлмас топшириқ” сериали қисмларининг биридаги саҳна учун бир неча дақиқа нафасини ушлаб турган. Кейт ундан ўзиб кетди ва сувда нафасини 7 дақиқа-ю 15 сония ушлаб турди. Қизиғи шундаки, бу ундан талаб ҳам қилинмаган. Шунчаки у рекордни янгилашга қарор қилган.
Женна Ортега — “Уэнздей”
Женна Ортега ёш актриса бўлишига қарамасдан, ҳар битта ролга катта масъулият билан ёндашиш кераклигини аллақачон тушунган. 21 ёшида “Уэнздей” сериалида бош ролни ўйнаб, катта чўққини забт этди. Фильм учун у виолончел чалишни ўрганган. Мусиқа асбобини чалиш у учун янгилик эмас, лекин икки ойлик машаққатли меҳнат эвазига у виолончелда барча саҳналарни дублёрларнинг ёрдамисиз ва қўшимча овозсиз мукаммал ижро этишга муваффақ бўлган.
Женнифер Лоуренс — “Қизил читтак”
“Қизил читтак” ким учун суратга олингани ҳали ҳам маълум эмас. Жамоатчилик фильмга ҳеч қандай қизиқиш йўқлигини билдирди. Лекин Лоуренс муваффақиятсиз бўлиши аниқ бўлган картинага катта ғайрат билан тайёргарлик кўрган. Женнифер дублёрлар ва каскадёрларга иш қолдирмаслик учун бир неча ҳафта давомида кунига уч соат, ҳафтада олти марта балет билан шуғулланган.
Марго Робби — “Тоня барчага қарши”
Марго Робби ўзининг Голливуддаги фаолиятини “Қасоскор” фильми билан бошлаган. Шундан сўнг у “Келажакдан келган дўстим” ва “Уолл-стрит бўриси” каби машҳур фильмларда суратга тушди ва катта шуҳрат қозонди. Кейинги бир неча йилларда Марго унга берилган ролларга муносиб эканлигини яна бир неча бор барчага исботлади. “Тоня барчага қарши” фильмидаги роли учун Марго 19 та номинацияга даъвогарлик қилган. Шулардан тўрттасида ғолибликка эришди ва, ажабланарлиси, барчаси “Энг яхши актриса” номинацияси бўйича. Маргонинг нуфузли мукофотлардаги ғалабалар эмас, балки унинг ролларга қандай тайёргарлик кўриши қолганлардан ажралиб туришини кўрсатади. Маълум бўлишича, Робби 5 ой давомида фигурали учишни ўрганган ва ҳатто фигурали учиш билан профессионал шуғулланадиганлар қила олмайдиган учлик акселини такрорлашга ҳам ҳаракат қилган.
Киaну Ривз — “Тўлқин чўққиси”
“Тўлқин чўққиси” фильми Киaну Ривзнинг фаолияти давомидаги энг машҳур фильмлардан бири ҳисобланади. Суратга олиш пайтида у сёрфингни ўзлаштиришга ҳаракат қилган, лекин натижа кутилганидек яхши бўлмаган. Киaнуга бир оз тажриба орттириш керак бўлган. Фильмда у Федерал тергов бюросининг яширин агенти ролини ўйнаган. Керакли натижага эришгунча у кўп меҳнат қилишига тўғри келган.
Изоҳ (0)