Режиссёрлар фильм муваффақияти учун ўзлари истаган актёрни ёллаш эвазига катта миқдорда гонорар беришга тайёр туради. Мисол учун, Голливуднинг энг машҳур актёрларидан бири Жонни Деппга жуда кичик нутқдан иборат роли учун киноижодкорлар мўмай ҳақ тўлаган.
Жек Читтак образи қаҳрамони 1990 йилда “Қайчиқўл Эдвард” драмасида бор-йўғи 150 та сўздан иборат нутқ айтган. Бунинг учун актёр бир ярим миллион доллар гонорар олган. Бу кўрсаткич Голливуд оламидаги ўзига хос рекорддир. Шунга ўхшаш ҳолат актёр Киану Ривз билан ҳам содир бўлган: у “Жон Уик” фильмининг тўртинчи қисмида атиги 380 та сўз айтган ва бунинг учун 15 миллион доллар ҳақ олган.
Жонни Депп ролига қайтсак. Биринчидан, охиригача ишлаб чиқилмаган механик одам образи табиатан камгап бўлади, иккинчидан, у бош қаҳрамон ҳисобланган ва барча ишлар режиссёр Тим Буртон режаларига мувофиқ кетган. У актёр билан бошқа лойиҳаларда ҳам ишлаган. Интервьюлардан бирида режиссёр Депп образи ҳақида шундай деган:
“Эдвард — новербал характер. Томошабин учун унинг нутқи эмас, балки ҳеч қандай тилга таржима қилиниши шарт бўлмаган ҳис-туйғулари муҳим. Қаҳрамон ички кечинмаларининг бари унинг кўзларида яққол ифодаланган”.
Дарҳақиқат, мимика ва эмоциялар билан маълум фикрни ифодалай олиш узун матнни ёд олишдан кўра мураккаб масала, Жонни Депп эса буни аъло даражада бажарган.
Бундан ташқари, фильм катта муваффақиятга эришди, бу эса режиссёрнинг режаси ўзини оқлаганини англатади. Бюджети 20 миллион доллар бўлган ёлғиз ва қўллари қайчидан тузилган жонзот ҳақидаги фильм 86 миллион доллар фойда кўрди. Мелодрама Rotten Tomatoes рейтингида 90 фоиз ижобий изоҳлар тўплай олди. “Кинопоиск”да ҳам фильмнинг рейтинги 8 баллни ташкил этади.
Изоҳ (0)