АҚШ президенти Дональд Трамп учинчи президентлик муддатига сайланиш учун конституциявий тақиқни четлаб ўтиш йўлларини билишини тан олди. Бу ҳақда у Тиме журнали билан суҳбатда маълум қилган.
“Ҳозир бу ҳақда гапирмасликни афзал кўрардим. Лекин биласизки, муҳокама қилинган ва яхши маълум бўлган баъзи қонуний бўшлиқлар мавжуд”, дейди Трамп.
Шунга қарамай, Америка етакчиси бундай усуллардан фойдаланмоқчи эмаслигини таъкидлаган.
“Аммо мен қонуний бўшлиқларга ишонмайман. Улардан фойдаланишга ишончим йўқ”, дея қўшимча қилган у.
Шунингдек, Трамп агар унинг ҳозирги ўринбосари Ж.Д. Ванс давлат раҳбари лавозимига ўз номзодини қўйса, навбатдаги сайловларда АҚШ вице-президентлигига ўз номзодини қўйиш истаги бор-йўқлиги ҳақидаги саволга жавоб беришдан бош тортган.
1951 йилда қабул қилинган Америка конституциясидаги 22-тузатишга кўра, бир шахс кўпи билан икки марта давлат бошлиғи этиб сайланиши мумкин. АҚШда навбатдаги президентлик сайловлари 2028 йилда ўтказилади.
Илгари АҚШ президенти Ричард Никсон даврида Оқ уйнинг собиқ маслаҳатчиси Жон Дин агар Трамп кейинги сайловларда вице-президент бўлса, Оқ уй раҳбари лавозимига икки мартадан ортиқ сайланишни тақиқловчи мамлакат конституциясининг 22-тузатишини четлаб ўтиши мумкинлигини билдирган. Шунингдек, Дональд Трампнинг бир гуруҳ тарафдорлари унинг яна бир муддат ўз лавозимида қолиши учун конституцияни қайта ёзиш кампаниясини бошлагани хабар қилинганди.
Бундан олдин Британиянинг The Guardian газетаси Дональд Трампнинг “Trump Store” интернет-дўкони АҚШда навбатдаги президентлик сайловлари йилига бағишланган “Трамп 2028” ёзуви туширилган кийим-кечак ва кепкаларни сотаётганини хабар қилганди.
Изоҳ (0)