Россия президенти Владимир Путин Украинадаги жанговар ҳаракатларни ҳозирги фронт чизиғида тўхтатишни таклиф қилди. Бу ҳақда учта манбага таяниб Financial Times хабар берди.
Путин апрель ойи бошида америкалик ҳамкасби Дональд Трампнинг махсус вакили Стив Уиткофф билан учрашган эди. У учрашув чоғида Украинанинг босиб олинган тўрт вилоятининг Киев назорати остида қолаётган қисмларига даъволаридан воз кечиши мумкинлигини айтган. Гап Донецк, Луганск, Херсон ва Запорожье вилоятлари ҳақида кетмоқда.
Бунинг эвазига Москва Қрим аннексиясининг АҚШ томонидан тан олиниши ва Россиянинг босиб олинган қолган ҳудудлар устидан амалда назорат ўрнатишига умид қилмоқда. Бироқ анонимлик шарти билан гапирган европалик амалдорлар таъкидлашича, Путиннинг ташаббуси тактика бўлиши мумкин. У орқали Кремлнинг бошқа талабларини Трампга ўтказиш ва уларни Украинага тайёр қарор сифатида мажбуран қабул қилдириш кўзланмоқда.
Ҳозирда Киевга Трамп ғалабани эълон қилиши учун баъзи позициялардан воз кечиш бўйича катта босим ўтказилмоқда, деди Financial Times суҳбатдошларидан бири.
Таклифлар муҳокамаси 23 апрелда, Украина, АҚШ ва Европа давлатлари вакилларининг Лондондаги учрашувида давом этади. Бироқ учрашувда Стив Уиткофф ҳам, АҚШ давлат котиби Марко Рубио ҳам иштирок этмаслиги мумкин.
Музокараларда АҚШ номидан Трампнинг Украина бўйича махсус вакили Кит Келлог қатнашади. Парижда бўлиб ўтган аввалги учрашувда АҚШ бир қатор таклифларни илгари сурган. Оқ уйнинг фикрича, улар келажакдаги келишувга асос бўлиши мумкин. Юқори лавозимли украиналик манбалар Киев розилик билдирган айрим ғоялар ҳам мавжудлигини маълум қилди, бироқ тафсилотларни очиқламади.
Бўлажак келишув доирасида муҳокама қилинаётган ташаббуслар орасида Европа тинчликпарвар кучларини Украина ҳудудига жойлаштириш ва НАТОга кирмайдиган алоҳида ҳарбий кучлар томонидан 1000 километрдан ортиқ узунликдаги бутун фронт чизиғи бўйлаб отишкесимни мониторинг қилиш ҳам бор, деб ёзади FТ.
Ушбу кучлар Украина ва Россия вакиллари билан ҳамкорликда сулҳга риоя этилишини таъминлаш учун ҳаракат қилиши керак бўлади. Украина босиб олинган ҳудудларни куч билан қайтариб олишга уринмаслик мажбуриятини олади, Россия эса ҳарбий ҳаракатларни тўхтатади.
Шунга қарамай, Москва аввалроқ АҚШнинг бир қатор таклифларини, жумладан, Украина ҳудудида НАТОнинг ҳар қандай кучларини жойлаштиришни рад этган эди. Бундан ташқари, Россия Киевни Шимолий Атлантика альянсига қўшилиш истагидан воз кечишни талаб қилмоқда.
Биз Америка томони билан музокаралар олиб бормоқдамиз. Иш мураккаб ва кўп вақт талаб қилади, шунинг учун дарҳол натижа кутиш қийин ва уни омма олдида қилиш мумкин эмас, деди Кремль матбуот котиби Дмитрий Песков.
Украина президенти Владимир Зеленский 22 апрель куни “Қрим бизнинг еримиз. Босиб олинган ҳудудларнинг мақоми ҳақидаги ҳар қандай мунозаралар урушни фақат чўзади” деб айтганди. Европа дипломатияси раҳбари Кая Каллас бу фикрни қўллаб-қувватлаб, аннексиянинг эҳтимолий тан олинишини “қўпол хато” деб атаган. У Вашингтоннинг Москвага нисбатан етарлича қатъий бўлмаган позициясидан ҳафсаласи пир бўлганини билдирган.
Изоҳ (0)