Украина президенти Владимир Зеленскийнинг Қрим яриморолини Россияга тегишли деб тан олишдан Киевнинг бош тортиши ҳақидаги баёнотлари можарони ҳал қилиш бўйича музокараларни қийинлаштирмоқда. Бу ҳақда Оқ уй раҳбари Дональд Трамп ўзининг Truth Social ижтимоий тармоғидаги саҳифасида маълум қилди.
Зеленский The Wall Street Journal газетасининг биринчи саҳифасида “Украина Қримни ҳуқуқий жиҳатдан Россияга тегишли деб тан олмайди, бу ерда муҳокама қиладиган ҳеч нарса йўқ” дея мақтанмоқда. Бу баёнот Россия билан тинчлик музокараларига жиддий зарар етказади. Чунки Киев кўп йиллар олдин АҚШнинг собиқ президенти Барак Обама даврида Қримдан айрилган ва бу ҳозирда муҳокама мавзуси ҳам эмас, деди Трамп.
Шунингдек, Америка президенти Украина етакчисининг сўзлари инқирозни ҳал қилишга эмас, балки фақат вазиятни кескинлаштиришга хизмат қилишини таъкидлаган.
Ҳеч ким Зеленскийдан Қримни Россия ҳудуди деб тан олишни талаб қилмаяпти. Лекин агар унга Қрим керак бўлса, нега улар ўн бир йил олдин, Қрим Россияга бир ўқ отилмасдан топширилганда, у учун курашмаган? Шунингдек, бу ҳудудда кўп йиллар давомида “Обамага топширилишидан” олдин ҳам, Россиянинг йирик сув ости кемалари базалари жойлашган эди. Айнан Зеленскийники каби иғвогарона баёнотлар бу урушни тартибга солишни қийинлаштирмоқда. Унинг мақтанадиган ҳеч нарсаси йўқ, деб ёзмоқда Оқ уй раҳбари.
Трампнинг сўзларига кўра, ҳозир Украина учун вазият оғир бўлиб, тинчликка эришиш ёки бутун мамлакатни йўқотишдан олдин яна уч йил жанг қилиш мумкин.
Менинг Россия билан ҳеч қандай алоқам йўқ. Лекин ҳар ҳафта беҳуда ҳалок бўлаётган ўртача беш мингта рус ва украин аскарини қутқариш истаги билан кўп умумийлигим бор, дейди АҚШ президенти.
Оқ уй раҳбари Зеленскийнинг Қрим ҳақидаги баёноти “қотиллик майдонини” давом эттиришдан бошқа ҳеч нарса бермаслигига, буни эса ҳеч ким хоҳламаслигига ишонч билдирган.
Биз келишувга жуда яқинмиз, лекин “ўйнаш учун карталари йўқ” одам (Зеленский назарда тутилмоқда - таҳририят), ниҳоят, ҳозир буни қилиши керак. Мен Украина ва Россияга, агар мен президент бўлганимда ҳеч қачон бошланмайдиган бу тўлиқ ва мутлақ тартибсизликдан чиқишга ёрдам бериш имкониятини интиқлик билан кутмоқдаман, деди у.
АҚШ ташаббуси тўғрисидаги миш-мишлар
21 апрель куни Washington Post АҚШ Лондонда Украина, Британия ва Франция билан музокараларда Киев ва Москва ўртасидаги тинчлик битими бўйича ўз таклифларини тақдим этишни режалаштираётгани ҳақида ёзган эди.
Хусусан, гап АҚШ Қримни Россияга тегишли деб тан олиши мумкинлиги ҳақида кетиши керак эди. Шунингдек, Вашингтон Россияга қарши санкцияларни бекор қилишни таклиф қилмоқда. Бунинг эвазига Россия барча жанговар ҳаракатларни тўхтатиши керак бўлади, бу эса урушни амалда музлатиб қўйишни англатади.
Бунга жавобан Зеленский Қрим, Запорожье АЭС ва НАТО ҳақидаги ҳар қандай гап-сўзлар спекуляция эканлигини, чунки ўт очишни сўзсиз тўхтатиш Украинанинг Россия билан ҳар қандай мазмунли музокараларини бошлаш учун биринчи зарурий шарт эканлигини таъкидлади.
Изоҳ (0)