Трамп маъмуриятининг савдо сиёсати АҚШ иқтисодиёти ўсишига салбий таъсир кўрсатиб, глобал инвесторларнинг АҚШдан “совишига” сабаб бўляпти. Бу ҳақда Pictet Asset Management компаниясининг мултиактив стратеги Арун Сай CNN телеканалига берган интервьюсида маълум қилди.
АҚШ фонд бозори узоқ вақтдан бери олтин стандарт бўлиб келган. FactSet маълумотларига кўра, S&P 500 сўнгги 15 йил давомида Европа ва Осиёдаги ҳамкасбларини ортда қолдириб келмоқда.
Маълумот учун, S&P 500 — АҚШдаги Standard and Poor’s 500 нинг қисқартмаси бўлиб, 500 та маҳаллий компанияларнинг акцияларидан иборат фонд бозори индексидир. Кўплаб инвесторлар буни америка фонд бозорининг энг яхши кўрсаткичи деб ҳисоблайди.
Шундай бўлса-да, S&P 500 бу йил 10 фоизга пастлаб кетди. Бу эса 2022 йилдан бери кузатилган энг ёмон натижадир. Ўтган йил давомида таянч индекс 23 фоизга кўтарилганидан бери инвесторлар вазият кескин тус олганини англаб етди.
Инвесcо компанияси менежери Алессио де Лонгиснинг сўзларига кўра, Америка эътибордан тушиб, сармоя асосан чет элга кетаётганига 3 та сабаб мавжуд:
- Биринчидан, январь ойида DeepSeek’нинг ChatGPT’га ўхшаш арзон сунъий интеллект модели Силикон водийсини ҳайратда қолдирди ва бу билан АҚШнинг сунъий интеллектда тўлиқ устунлиги ҳақидаги “чўпчак”ка нуқта қўйилди.
- Иккинчидан, февраль ойида АҚШ Украинани қўллаб-қувватлашда сусткашлик қилди ва Германиядаги мудофаа харажатларини рағбатлантирди. Натижада Европада иқтисодий ўсиш ва сармоя киритилиши янада ривожланди.
- Учинчидан эса, Трампнинг март ва апрель ойларидаги савдо божи сиёсати инвесторларнинг бошқа бозорлар излашига туртки бўлди.
Америка хусусий сармоядорлар ассоциациясининг сўнгги тадқиқоти шуни кўрсатдики, сўнгги саккиз ҳафта давомида респондентларнинг 50 фоиздан ортиғи АҚШ фонд бозорида “камнамо” бўлишни бошлаган.
Аввалроқ олтин нархи дунё бўйича ошиб бораётгани ҳақида хабар берилган эди. Шу йилнинг ўзида олтин нархи 25 фоизга кўтарилиб кетди.
Шу билан бирга, жорий йилда АҚШ доллари сезиларли даражада заифлашди, бу инвесторларнинг АҚШга бўлган ишончи пасайганидан дарак беради. Долларнинг олтита асосий хорижий валютага нисбатан кучини ўлчайдиган АҚШ доллари индекси яқинда 2022 йилдан бери энг ёмон натижани қайд этди. Ўтган ҳафтада евро доллар билан таққослаганда ўзининг энг юқори кўрсаткичини қайд этди. Бу сўнгги 3 йилликдаги рекорд ҳисобланади.
АҚШ активлари даромадлилиги долларнинг кучини баҳоловчи омил эканлигини айтиб ўтган эдик. Тахмин қилишимизча, агар божлар АҚШ фирмаларининг фойда меъёрлари ва реал даромадларига таъсир қилса, бу кетишда доллар “синади”, дейди Goldman Sachs таҳлилчилари.
Агар сиз европалик сармоядор бўлсангиз, АҚШга сармоя киритишдан олдин етти ўлчаб бир кесишингизга тўғри келади, дейди Pictet активларни бошқариш бўйича катта мултиактив стратеги Арун Сай.
Изоҳ (0)