Британиянинг The Economist журнали Ipsos агентлиги ўтказган сўров натижаларини эълон қилди. Унга кўра, Украинада Владимир Зеленскийнинг рейтинги Оқ уйда Дональд Трамп билан учрашувидан сўнг кескин кўтарилган.
The Economist буюртмаси билан Ipsos агентлиги томонидан телефон орқали ўтказилган сўровномада 1000 нафар украиналик иштирок этган. Уларнинг мутлақ кўпчилиги (74 фоизи) АҚШ ёрдамисиз ҳам ҳарбий ҳаракатларни давом эттиришни ёқлаб чиқмоқда.
Шунингдек, респондентларнинг 59 фоизи (21 фоизи қарши) Украина ҳали ҳам жанг майдонида ғалаба қозониши мумкин, деб ҳисоблайди. Бу фикр АҚШ расмийларининг, хусусан, давлат котиби Марко Рубионинг бунинг имконсизлиги ҳақидаги баёнотларига зид.
Мақола муаллифларининг ёзишича, ҳозирда Зеленский аҳоли эътибори бўйича бўлажак президентлар орасида пешқадамлик қилмоқда. Агар ҳозир сайлов ўтказилса, собиқ қўмондон Валерий Залужний катта фарқ билан мағлуб бўлиши мумкин.
Яна бир социологик сўровномадан маълум бўлишича, Зеленскийни энг кўп аёллар, ёшлар ва Украинанинг энг шарқий ҳудудлари аҳолиси қўллаб-қувватламоқда.
Залужний эса одатда жанговар кайфиятдаги ва муросага келишни истамаётган катта ёшли сайловчилар орасида кўпроқ обрўга эга бўлмоқда.
Бунда 10 нафар украиналикнинг 7 нафари Зеленскийнинг фаолиятини маъқуллашини айтмоқда. 10 кишидан 8 нафари эса уни ҳамон Украинанинг қонуний президенти деб билишини ва ҳарбий ҳаракатлар давом этаётган пайтда сайлов ўтказиш ғоясини рад этишини таъкидлаган.
Агар ушбу сўровнома натижаларига ишонилса, украиналикларнинг аксарияти Зеленский учун жон беришга тайёр. Улар ҳарбий комиссарларни кўрганда қочиб кетиш ўрнига фронтга жўнаш учун навбатда туришибди.
Изоҳ (0)