Ҳеч ким Украинани таслим бўлишга мажбур қила олмайди, деб ёзади Украина ташқи ишлар вазири Андрей Сибига Х ижтимоий тармоғида.
Унинг таъкидлашича, Украина Европа замонавий тарихидаги энг даҳшатли ҳарбий ҳужумга ва уч йиллик тўлиқ урушга бардош берган.
Украина халқи ва унинг президенти Владимир Зеленский Путиннинг босимига бўйсунишни рад этди. Ҳеч ким Украинани таслим бўлишга мажбурлай олмайди. Биз ўз мавжудлик ҳуқуқимизни ҳимоя қилишда давом этамиз, дея таъкидлади Сибига.
Трамп Зеленскийни “сайловсиз диктатор” деб атади
Сайловсиз диктатор. Зеленский тезроқ ҳаракат қилиши керак, акс ҳолда унинг мамлакати буткул тамом бўлади. Биз Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва унинг маъмурияти уддалай олишини барча эътироф этди, дейди АҚШ етакчиси.
У “Украинани яхши кўриши, бироқ Зеленский жуда ёмон иш қилгани сабабли унинг мамлакати вайрон бўлгани ва миллионлаб одамлар сабабсиз ҳалок бўлгани”ни қўшимча қилди.
Трампнинг таъкидлашича, Зеленский АҚШни “ҳеч қачон бошланмаслиги керак бўлган, ғалаба қозониб бўлмайдиган уруш учун” 350 миллиард доллар ажратишга кўндира олган. Украина президенти Вашингтон Киевга гўёки 500 миллиард долларлик ёрдам бергани ҳақидаги маълумотлар ҳақиқатга тўғри келмаслигини айтди.
Бундан ташқари, Германия канцлери Олаф Шольц ҳам бунга муносабат билдирди.
Президент Зеленскийнинг демократик легитимлиги йўқ, деб айтиш шунчаки хато ва хавфлидир. Ҳақиқат шундаки, Зеленский Украина давлатининг қонуний сайланган раҳбаридир. Уруш шароитида тегишли сайловлар ўтказиш имконсизлиги Украина конституцияси ва сайлов қонунларига тўлиқ мос келади. Ҳеч ким бунинг аксини таъкидлашга ҳақли эмас, деди Шольц.
У айнан Владимир Путин бошчилигидаги Россия Украинага қарши уруш бошлаганини эслатди.
Украина деярли уч йилдан бери Россиянинг шафқатсиз тажовузидан ҳимояланмоқда. Ҳар куни, деди канцлер.
Трампнинг Зеленский ҳақидаги фикрларини Германия ташқи ишлар вазири Анналена Бербок ва федерал иқтисодиёт вазири, вице-канцлер Роберт Хабек ҳам танқид қилди.
Агар ижтимоий тармоқларда шошилинч пост ёзиш ўрнига ҳақиқий дунёга эътибор қаратилса, Европада кимлар, афсуски, диктатура шароитида яшашга мажбур экани аниқ бўлади: бу Россиядаги ва Беларусдаги одамлардир.
Украиналиклар ҳар куни ўзларининг эркин демократияси учун курашмоқда ва биз европаликлар сифатида демократик давлатларимизни биргаликда мустаҳкамлаш учун уларни Европа иттифоқига олиб борадиган йўлда қўллаб-қувватлаймиз, деди Бербок.
АҚШ президентининг баёноти ҳайратга солади. Бу воқеликни мисли кўрилмаган тарзда бузиб кўрсатиш ва ўта хавфли риторика. Ҳақиқат шундаки, диктатор Путин демократик Украинага ҳужум қилди, деб ёзди Роберт Хабек ўзининг Х ижтимоий тармоғида.
Изоҳ (0)