Хитой раҳбари Си Цзиньпин январь ойида Дональд Трампнинг АҚШ президенти лавозимига инаугурацияси учун Вашингтонга бориши кутилмаяпти. Бу ҳақда Американинг CBS News телеканали манбаларга таяниб хабар берди.
Аввалроқ телеканал ўз манбаларига таяниб Трамп ноябрь ойида бўлиб ўтган президентлик сайловидаги ғалабасидан кўп ўтмай, Си Цзиньпинга маросимга шахсий таклифнома юборгани ҳақида ёзган эди:
“Айни пайтда Хитойнинг АҚШдаги элчиси ҳамда унинг рафиқаси 2025 йил 20 январда пойтахтда бўлиб ўтадиган АҚШ президентининг инаугурациясига меҳмон бўлиши кутилмоқда”.
Телеканал манбаларига кўра, хитойлик дипломат сафига Пекиндан яна бир неча амалдор қўшилиши мумкинлиги айтилган эди.
Хитойнинг АҚШдаги элчихонаси ҳам, Трамп жамоаси вакиллари ҳам хабар нашр қилинган вақтда Трампнинг Си Цзиньпинни инаугурацияга таклиф қилиши билан боғлиқ вазиятга расман изоҳ бермаган.
АҚШдаги сайлов натижалари 2025 йил 6 январда Конгресснинг янги таркиби томонидан расман тасдиқланади. Инаугурация учун масъул бўлажак президент жамоаси Трампнинг қасамёд маросимига бошқа хорижий меҳмонларни ҳам таклиф қилишни режалаштирмоқда. Хусусан, тадбирда Венгрия бош вазири Виктор Орбан қатнашиши мумкин.
Инаугурацияга одатда элчилар ва бошқа дипломатлар таклиф қилинади, аммо давлат департаментининг 1874 йилга оид ёзувлари хорижий етакчилар ҳеч қачон ҳокимиятни топшириш маросимида иштирок этмаганидан далолат беради, дейилади хабарда.
Виктор Орбан 10 декабрь куни Трампнинг миллий хавфсизлик бўйича бўлажак маслаҳатчиси Майк Уолс ҳамда миллиардер Илон Маск билан Флорида штатидаги Мар-а-Лаго қароргоҳида учрашган.
Трамп ўтган ҳафта Париждаги реконструкция қилинган Нотре Даме соборининг очилиш маросимига ташриф буюриб, сайловлардаги ғалабасидан кейин биринчи хорижий ташрифини амалга оширди. Сиёсатчи Франция президенти Эммануэль Макронни реставрация суръати ва сифати учун мақтади, шунингдек, Украина президенти Владимир Зеленский билан қисқа учрашув ўтказди.
Изоҳ (0)