Россия Хавфсизлик кенгаши раиси ўринбосари Дмитрий Медведев Украинани “америкаликлар оёғига йиқилиш”, мамлакатда президентлик сайловлари ўтказиш ва таслим бўлишга тайёрланишга чақирди.
Медведевнинг сўзларига кўра, бу АҚШ президенти Дональд Трамп ҳокимиятга келганидан кейинги Украина учун чиқиш йўллардан биридир. У Украина президенти “Трампни ўзининг ҳийла-найранглари билан бездириб қўйган”ини даъво қилди.
Уларнинг икки йўли бор. Биринчиси: америкаликларнинг оёғига йиқилиш, зудлик билан сайлов эълон қилиш ва урушнинг ёқимсиз якунига тайёргарлик кўриш. Моҳиятан — таслим бўлиш, деди у.
Медведев Украина раҳбарияти томонидан “аллақачон синовдан ўтган” иккинчи йўл “ўзи билан муроса қилиб тинчланиш” эканини таъкидлади.
Трамп 3 февраль куни Украинага нодир металлар эвазига АҚШдан ёрдам олишни таклиф қилди. Бу гуруҳга 17 та элемент: скандий, иттрий, лантан ва бошқалар киради. Кейинчалик у келишув ҳажмини 500 миллион долларга баҳолаб, нодир металлар ва газга эга бўлиш эвазига Вашингтон Украинага ҳар қандай эҳтимолий тинчлик келишувида хавфсизлик кафолатларини беришини таъкидлади. Оқ уйнинг тушунтиришича, АҚШ Киевни қўллаб-қувватлаш учун сарфланган маблағларни қоплаш учун Украинадан нодир металларни олиш ниятида.
Зеленскийга кўра, Украина ўз ресурсларини АҚШ билан бепул бўлишмоқчи эмас, бироқ фойдали қазилмаларни биргаликда ўзлаштириш мумкин бўлган келишувга тайёр. У буни “америкаликлар ҳаммадан кўп ёрдам бергани” билан изоҳлади. Аммо Зеленский ҳужжатни имзолашдан бош тортди. АҚШ Украинага фойдали қазилмалар бўйича битимнинг янги версиясини топширди. Украина раҳбари маслаҳатчилари президентдан уни имзолашни, Трамп билан “янги келишмовчиликка бормаслик”ни тавсия қилганди.
Изоҳ (0)