Марҳум Рим папаси Франциск 20 апрель Пасха куни Пётр майдонида нутқ сўзлади. Нутқида унга ёрдам берганларга миннатдорчилик билдириб ўтди. Бу унинг сўнгги нутқи бўлди. Бу ҳақида Vatican News хабар берди.
Қайд этилишича, Франциск умрининг сўнгги кунида ёрдамчиси Массимилиано Страппеттидан Пётр майдонига йиғилган диндорлар билан учраштиришини сўраган. У машинада туриб оломон билан саломлашмоқчи бўлган.
Майдонда нутқ сўзлаган Папанинг якшанба куни кечқурун тоби қочиб қолди. Тахминан, бир соат ўтгач комага тушди.
Франциск ёрдамчиларига “Мени майдонга олиб келганингиз учун раҳмат”, деган
Улар, ўз навбатида, понтификнинг сўнгги дақиқаларда азобланмаганини хабар қилишди.
Аввалроқ Ватикан Францискнинг дафн маросими 26 апрель, шанба куни Санта Мария Мажора базиликасида бўлиб ўтиши маълум қилинганди.
23 апрель куни понтификнинг жасади жамоатчилик билан видолашув учун Пётр соборига қўйилади. Бу уч кун давом этади. Дафн маросими эса 26 апрель куни бошланади. Маросимни Кардиналлар коллежи декани Жованни Баттиста Ре олиб боради. Унда бутун дунёдан патриархлар, кардиналлар, архиепископлар, епископлар ва руҳонийлар иштирок этади.
Reuters хабарига кўра, маросимда АҚШ президенти Дональд Трамп рафиқаси Мелания билан, Аргентина президенти Хавьер Майли ва Бразилия президенти Луис Инасиу Лула да Сильва иштирок этади. Украина президенти Владимир Зеленскийнинг ташрифи ҳам кутилмоқда, деб ёзади агентлик унинг офисидаги манбаларга таяниб.
Россия президенти Владимир Путин Рим папасининг дафн маросимида қатнашишни режалаштирмаяпти. Унинг матбуот котиби Дмитрий Песковнинг сўзларига кўра, маросимда Россия Федерацияси номидан ким иштирок этиши ҳали ҳал қилинмаган.
14 февралдан 23 мартгача Франциск касалхонада бўлган, унга иккиламчи пневмония ташхиси қўйилган. Папанинг аҳволи оғир бўлиб, унга қон қуйишга тўғри келган. Февраль ойи охирида понтифик сунъий нафас олиш аппаратига уланган.
Изоҳ (0)