АҚШ Иммиграция ва божхона назорати 2023 йил сентябрдан 2024 йил сентябргача Ўзбекистонга 572 кишини депортация қилган. Бу ҳақда 2024 йил 19 декабрь куни эълон қилинган ҳисоботда келтирилган.
Ҳисоботга кўра, бу давр ичида 192 мамлакатга 271 484 киши депортация қилинган бўлиб, бу сўнгги 10 йилдаги энг юқори кўрсаткичдир. Депортация қилинганлар сони ўтган йилнинг шу даврига нисбатан деярли икки баравар кўп, яъни 142 580 киши чиқариб юборилган.
Ўн йилликда максимал кўрсаткич 2014 йилда қайд этилган – 315 943 киши. Дональд Трампнинг АҚШда биринчи муддатда президентлик қилган пайтида (2019 йилда) энг кўп депортация қилинганлар сони 267 258 нафарни ташкил қилган.
Депортациялар сонининг кўпайиши парвозлар, жумладан, дам олиш кунлари учиш ва Гватемала, Гондурас ва Салвадор каби мамлакатларга мигрантларни қайтаришнинг осон тартиблари ортиб бораётгани билан боғлиқ. Олти йил ичида биринчи марта Хитойга парвоз амалга оширилди, шунингдек, Альбания, Миср, Грузия, Ҳиндистон, Руминия, Тожикистон, Ўзбекистон ва бошқа мамлакатларга депортациялар ташкил этилди.
Ўзбекистонликлар депортацияси ошган
2024 йилда АҚШ ҳукумати 572 ўзбекни депортация қилган бўлса, бу ўтган йилга нисбатан 6,5 баравар кўп. 2013 йилда 88 киши, 2022 ва 2021 йилларда эса депортация қилинган ўзбекистонликлар сони мос равишда 21 ва 55 кишини ташкил қилган.
Ўзбекистон фуқаролари асосан Ўзбекистон—Туркия (Испания)—Боливия—Колумбия—Мексика—АҚШ йўналиши бўйича АҚШга боришга ҳаракат қилмоқда. 2021 йилдан 2023 йилгача Ўзбекистоннинг 13 600 нафар фуқароси Мексика орқали АҚШга ноқонуний киришга уринган. Марказий Осиё давлатларидан 2023 йилда 50 мингдан ортиқ одам АҚШ чегарасини ноқонуний кесиб ўтган.
2024 йил февралида АҚШга Мексика орқали келган Ўзбекистон фуқаролари Байден устидан судга мурожаат қилганди.
Трамп даврида бу янада кучайиши мумкин
АҚШ президентлик сайловларида ғалаба қозонган Дональд Трамп сайловолди кампаниясидаги оммавий депортация ҳақидаги ваъдасини бажаришдан бошқа чораси йўқлигини маълум қилди. Трамп учун иммиграция сиёсатини кучайтириш сайлов кампаниясининг асосий нуқталаридан бирига айланганди. У Жо Байден маъмуриятининг “ўта юмшоқ” сиёсати Қўшма Штатларнинг учинчи дунё давлатига айланишига олиб келганини бир неча бор таъкидлаган. Трамп оммавий депортацияларни амалга ошириш учун ҳарбий куч ишлатишга ҳам тайёрлигини айтган.
Изоҳ (0)