АҚШ доллари индекси сўнгги уч йилдаги энг паст кўрсаткичга тушиб кетди. АҚШ президенти Дональд Трампнинг Федерал захира тизими раиси Жером Пауэллга таҳдиди бунга таъсир кўрсатди. Бу ҳақда CNBC хабар берди.
Трамп 21 апрель куни Федерал захира раисини “Жуда кечиккан жаноб” ва “катта муваффақиятсиз шахс” деб атаб, Пауэллни танқид қилди. АҚШ президенти ҳозироқ фоиз ставкаларини пасайтиришга чақирди.
Кўпчилик ставкаларни олдиндан пасайтиришни талаб қилмоқда, деди Трамп. У энергия ва кўплаб маҳсулотлар нархи сезиларли даражада пасайганини таъкидлади.
Трампнинг фикрича, АҚШда инфляция деярли бўлмаслиги мумкин, аммо Пауэлл ҳозир ставкаларни пасайтирмаса, иқтисодиёт секинлашиши кузатилади. Президент Европа Марказий банки аллақачон фоиз ставкаларини етти марта пасайтирганини таъкидлади.
21 апрель куни долларнинг DXY индекси 97,92 пунктгача тушди. Бу 2022 йил март ойидан буён энг паст кўрсаткич ҳисобланади. DXY — АҚШ долларининг бошқа асосий валюталарга нисбатан қийматини ўлчовчи индекс. У долларнинг олтита валютага (евро, иена, фунт стерлинг, Канада доллари, крона, франк) нисбатан қийматини кўрсатади.
Трамп ўтган ҳафта АҚШ Федерал захира тизими раҳбари Жером Пауэлл “анчадан бери” асосий ставкани пасайтириши кераклигини айтганди. У Пауэллни истеъфога чиқишга чақирган.
АҚШ президенти ва Федерал захира тизими ўртасидаги кескин муносабатлар фонида, хорижий инвесторлар АҚШ активларидан воз кечаётгани сабабли долларнинг асосий валюталарга нисбатан курси пасайиб кетди, деб ёзади CNBC.
Бозордаги беқарорлик туфайли инвесторлар 21 апрель куни тарихда биринчи марта бир унсия учун 3400 доллардан ошган олтин каби бошпана активларига эътибор қаратди.
Биз бозордан аниқ сигнални кўрмоқдамиз, унга ҳатто президент Федерал захира раиси лавозимини ўзгартиришга уриниши мумкинлиги ҳақидаги фикр ҳам ёқмаяпти. Сўнгги ҳафталарда АҚШ иқтисодий сиёсатига нисбатан ишончнинг бир оз йўқолиши кузатилмоқда. Буни биз Америка узоқ муддатли облигациялари даромадлилигининг ўсиши ва доллар курсининг пасайиши каби ғалати уйғунликда кўрмоқдамиз. Бу глобал инвесторлар АҚШдан капитал олиб чиқиб кетаётганини кўрсатади, деди Evercore ISI инвестицион банк компанияси вице-раиси Кришна Гуха.
Трампнинг божларни ошириш ҳақидаги баёнотларига эътибор қаратмаган инвесторлар хато йўл тутган. Худди шундай, Трампнинг бошқа масалалар бўйича сўзлари ва ҳаракатларини эътиборсиз қолдириш ҳам хато бўлади, деб ҳисоблайди Piper Sandler банки мутахассиси Энди Лаперриэр.
Изоҳ (0)