Украина президенти Владимир Зеленский Қрим яриморолининг Россия томонидан ноқонуний аннексия қилинишини ҳеч қачон тан олмаслигини таъкидлаган эди. АҚШ президенти Дональд Трамп бу Россия билан музокаларга жиддий зарар етказишини айтиб, украиналик ҳамкасбини танқид қилди. Зеленский мазкур танқидга жавоб қайтарди.
Украина раҳбари Трампнинг биринчи президентлик даврида давлат котиби бўлган Майк Помпео 2018 йилда берган баёнотни эслатди. У Қримнинг Россия томонидан аннексия қилиниши ноқонуний экани ва АҚШ буни ҳеч қачон тан олмаслигини билдирганди. Зеленский буни акс эттирувчи АҚШнинг 2018 йилги Қрим декларацияси скриншотини ўзининг Х ижтимоий тармоғига жойлади.
Ҳамкорлардан миннатдормиз. Украина ҳар доим ўз конституциясига мувофиқ ҳаракат қилади ва биз ҳамкорларимиз, хусусан, АҚШ ўзининг кучли қарорларига мувофиқ ҳаракат қилишига мутлақо ишонамиз, деб ёзган сиёсатчи.
Зеленский бу фикрларини 23 апрель куни Лондонда бўлиб ўтган Украина, АҚШ, Буюк Британия, Франция ва Германия вакиллари иштирокидаги учрашувга изоҳ тариқасида билдирган.
Баҳсли масала
АҚШ 17 апрель куни Украина делегациясига Трамп томонидан таклиф қилинган тинчлик режасини тақдим этган. Ушбу ҳужжат АҚШнинг урушни дипломатик йўл билан ҳал қилишга қаратилган “сўнгги таклифи” ҳисобланади. Агар Украина бу режани рад этса, АҚШ Киев ва Москва ўртасидаги воситачилик ролидан воз кечишини маълум қилган.
Режанинг энг баҳсли бандларидан бири — АҚШнинг Қрим устидан Россия назоратини тан олишга тайёрлиги саналади. Зеленский бу борада аниқ позициясини билдирган. У Қрим Украина халқига тегишли эканини ва бу баҳслашмаслигини айтган. Трамп эса буни танқид қилиб, “Қрим кўп йиллар олдин қўлдан кетгани”, Зеленскийнинг сўзлари эса “тинчлик музокараларига зарар етказиши”ни таъкидлаганди.
Изоҳ (0)