AQSH prezidenti Donald Trampning bir guruh tarafdorlari uning yana bir muddat o‘z lavozimida qolishi uchun konstitutsiyani qayta yozish kampaniyasini boshladi, deb xabar bermoqda NBC News.
Hozirda AQSH konstitutsiyasidagi tegishli tuzatish tufayli Trampning 3-muddatga saylanishi qonuniy jihatdan imkonsizdir.
NBC News’ning Oq uydagi muxbiri Piter Nikolasga ko‘ra, Trampning o‘zi tarafdorlarining harakatlariga to‘sqinlik qilish uchun hech qanday chora ko‘rmayapti va bundan tashqari, u o‘zining keyingi prezidentlik g‘oyasini faol ravishda targ‘ib qilmoqda. Amerika siyosiy doiralarining ba’zi vakillari fikricha, bu bilan u o‘z muxoliflari va tanqidchilarini shunchaki mazax qilmoqda.
O‘tgan dam olish kunlari Vashington yaqinida amerikalik konservator siyosatchilar uchun asosiy tadbirlardan biri — Konservativ siyosiy harakatlar konferensiyasi bo‘lib o‘tdi. Yig‘ilishda namoyish etilgan plakatda Tramp qadimgi Rim libosida tasvirlangan, stenddagi yozuvda esa: “Uchinchi muddat loyihasi”, “2028-yilda va unda keyin ham Tramp uchun” kabi yozuvlarni ko‘rish mumkin edi.
Konferensiya tashkilotchilaridan biri aksiyaning maqsadi konservativ respublikachilarni Trampning ittifoqchisi, Tennessi shtatidan respublikachi kongressmen Endi Oglz tomonidan o‘tgan oyda taklif qilingan konstitutsiyaga tuzatishni qo‘llab-quvvatlashga ko‘ndirish ekanligini aytdi.
Hujjat prezidentlik muddatini 8 yildan 12 yilgacha uzaytirishga chaqiradi. Bundan kelib chiqadiki, agar Tramp yana g‘alaba qozonsa, u 2033-yil yanvarigacha (86 yoshgacha) o‘z lavozimida qolishi mumkin.
Biz Trampni 2028-yilda xohlaymiz. Trampga o‘xshagan odam mamlakat tarixida bir-ikki marta uchraydi. Biz Trampni xohlaymiz!, dedi Oq uyning Trampning birinchi muddatidagi katta maslahatchisi Stiv Bannon konferensiyadagi nutqi chog‘ida.
Konstitutsiyani Tramp foydasiga o‘zgartirish g‘oyasi haqida skeptiklar ham fikr bildirmoqda. Masalan, Trampning 2020-yilgi saylovoldi kampaniyasi rahbari Bred Parskeyl NBC News telekanaliga bergan intervyusida tashabbusni hazilga qiyosladi.
Bu sodir bo‘lmasligi aniq, ammo tanqidchilarning bu borada aqldan ozayotganini kuzatish qiziq, dedi u.
Amerikalik siyosatchi Jenna Ellis Tramp o‘z vakolatlarini uzaytirishning bunday usuli haqiqatga yaqin bo‘lsa, asosiy qonunni o‘zgartirishga o‘tishini ta’kidladi.
Buning uchun konstitutsiyaga o‘zgartirish kiritish talab etiladi, biroq shuni unutmaylikki, unga vakolat muddatlari soniga cheklovlar o‘rnatadigan o‘zgartirishlar allaqachon kiritilgan, deya qo‘shimcha qildi u.
Gap 22-tuzatish haqida ketmoqda, unga ko‘ra hech kim ikki martadan ortiq AQSH prezidenti etib saylanishi mumkin emas.
Prezident Tramp yana prezidentlikka saylanishi mumkinligiga hech qanday dalil yo‘q, dedi iste’fodagi federal apellyatsiya sudi sudyasi J. Maykl Lattig.
Izoh (0)