Tesla раҳбари Илон Маск АҚШ ҳукуматидаги ролини “сезиларли даражада” қисқартиради. Сабаби унинг электромобиль компанияси йил бошидан бери фойда ва сотувда пасайиш темпини қайд этди.
Маск ўтган йилдан бери янги ташкил этилган маслаҳат органи — Ҳукумат самарадорлиги департаментига (DOGE) раҳбарлик қилиб келаётган эди. Унга АҚШнинг харажатлари ва иш ўринларини қисқартириш масалалари юкланган.
Аммо Маск келаси ойдан бошлаб бу вазифасига камроқ вақт, аниқроғи, ҳафтасига 1-2 кунини ажратишини айтиб ўтди. Сабаби уни одамлар Tesla’ни “ташлаб қўйганликда” айблашмоқда.
Унинг сиёсатга аралашуви бутун дунё бўйлаб норозилик намойишлари ва Tesla автомобилларининг бойкот қилинишига сабаб бўлди.
Маск каби вақтинчалик давлат хизматчилари одатда йилига 130 кун ишлаш билан чекланади. Агар бу муддат президент Дональд Трампнинг инаугурацияси кунидан бошлаб ҳисобланса, у кейинги ойнинг охирида тугайди.
Аммо Трампнинг қайта сайланишига чорак миллиард доллардан кўпроқ ҳисса қўшган Маскнинг қачон тўлиқ истеъфога чиқиши номаълум.
Трамп шу ой бошида Маскни “қўлидан келгунча” узоқроқ олиб қолишини айтганди.
Технологик магнат энди Tesla’га кўпроқ вақт ажратишини айтди, аммо Трамп маъмуриятидан бутунлай кетмаслигини ҳам билдириб ўтди. Сабаби унинг вазифаси жуда муҳим ва президент бу вазифани бажаришга ундар экан, Маск ҳам буни инкор этмаслигини таъкидлади.
Сешанба куни Tesla йилнинг дастлабки уч ойида автомобиллар савдоси ўтган йилнинг шу даврига нисбатан 20 фоизга, фойда эса 70 фоиздан кўпроққа камайганини маълум қилди.
Компания инвесторларни бу ҳолат давом этиши мумкинлиги ҳақида огоҳлантириб, ўсиш прогнози йўқлигини ҳамда бунга давлатнинг “сиёсий кайфияти” сабаб бўлаётганини етказди.
Компания акциялари сешанба куни ёпилган бозор ҳолатига кўра жорий йилда ўз қийматининг қарийб 37 фоизини йўқотди.
Изоҳ (0)