Usmonlilar imperiyasining oltin davri haqida hikoya qiladigan “Muhtasham yuz yil” serialida saroydagi hayot, valiahdlar va hukmronlik uchun bo‘lgan kurashlar, shuningdek, sevgi va xiyonat motivlari o‘z aksini topgan. Biroq hatto eng puxta ishlab chiqilgan loyihalarda ham bir nechta xatoliklar uchrab turadi. Minglab sahnalar orasida XVI asrda hali ixtiro qilinmagan buyumlar ham kadrlarga tushib qolgan. Bu xatoliklar serial haqidagi umumiy taassurotini buzmaydi, ammo tomoshabinlar orasida turli munozaralarga sabab bo‘ladi.
Kadrga tushib qolgan traktor
Serialda harbiy yurishlar tasvirlangan sahnalar juda ishonarli ko‘rinadi: qadimiy chodirlar, otlar, harbiy uskunalarning bari Usmonlilar davri shukuhiga mos. Ammo kutilmaganda orqa fonda traktor paydo bo‘ladi. Bali Bey (Burak O‘zchivit) ortida kameraga tushib qolgan traktor serialning tarixiy muhitiga mos kelmaydi, chunki voqealar XVI asrda, ya’ni qishloq xo‘jaligi texnikalari ixtiro qilinmagan davrda sodir bo‘ladi.
Saroy bog‘idagi narvon
Bog‘dagi sahnalardan birida, kutilmaganda kadrda narvon ko‘rinadi. Avvaliga go‘zal saroy manzaralari fonida u qadar ko‘zga tashlanmaydi, ammo bu ham tarixiy jihatdan jiddiy xatolik hisoblanadi.
Shamdon yonidagi chiroq tugmasi
Xadicha sulton obrazi tasvirlangan sahnalardan birida orqa fonda elektr chiroq tugmasi ko‘rinib qoladi. Albatta, ko‘pchilik tomoshabinlar serial voqealariga berilib, tugmachani payqamasligi mumkin, lekin ziyrak muxlislarning ko‘zi hech narsani o‘tkazib yubormaydi.
Bundan tashqari, tomoshabinlar yana bir xatoni aniqlashgan: Xadicha sulton bilan bog‘liq sahnalarda foydalanilgan matolar ranglari o‘sha davrga, ayniqsa musulmonlar madaniyatiga mos emasligini aytishgan:
“Xadichaning yangi tug‘ilgan bolalari moviy va pushti adyollar bilan o‘ralgan bo‘ladi, ammo o‘sha davrda bu ranglar musulmonlar tomonidan qo‘llanilmagan” deyishadi tomoshabinlar.
Izoh (0)