“Muhtasham yuz yil”ning davomi bor va gap “Ko‘sem” seriali haqida emas

Dunyo bo‘ylab ushbu serialning millionlab muxlislari sulton Sulaymon va Xurramning sevgi hikoyasini katta ishtiyoq bilan tomosha qildi. “Muhtasham yuz yil” ko‘pchilikda nostalgiya tuyg‘usini uyg‘otsa-da, to‘rt fasldan iborat serialni qaytadan boshlashga ko‘pchilik ham jur’at etmaydi.

Turkiyadagi eng muvaffaqiyatli serial g‘oyasi aslida qanday paydo bo‘lgani haqida hikoya qiluvchi va serialni qaytadan tomosha qilishga undovchi hujjatli film olingani haqida esa ko‘pchilik bilmaydi. Quyida 8 ta qismdan iborat “Muhtasham yuz yil. Sirli dunyo” (“Muhteşem yüzyıl. Gizli dünya”) hujjatli filmi haqida so‘z boradi.

Hujjatli film nima haqida?

Hujjatli filmda harbiy, jangari sahnalarni suratga olishda duch kelingan qiyinchiliklar, murakkab kastinglar va keng ko‘lamli serial ustida ishlashning boshqa qiyin jarayonlari haqida batafsil hikoya qilinadi. Film 16-asrdagi Topkapi qiyofasi qayta tiklangan va 5000 kvadrat metr maydonga ega bo‘lgan pavilyon bo‘ylab ekskursiyadan iborat. Unda yozuvchi Meral Okay “Muhtasham yuz yil” syujeti nima uchun ba’zi tarixiy haqiqatlarga zid ekanligini ham tushuntirib o‘tgan:

“Biz serialni 100 foiz tarixiy janrda suratga olmadik, balki tarix elementlari bo‘lgan romanni ko‘rsatib berishga harakat qildik”, deydi u.

Bosh qahramonni izlash jarayoni

Hujjatli filmda Xurram rolini ijro etish uchun aktrisani izlash jarayoni alohida yoritilgan. Ijodiy guruh aktrisani butun Turkiya, Rossiya, Ruminiya va boshqa mamlakatlardan ham izlagan. Ammo natija bo‘lmagan. Filmni suratga olish ishlari boshlanishiga bir haftadan oshiq vaqt qolganida, Temur Savji Germaniyada ular izlagan ijrochi borligini aniqlagan: qizil soch, go‘zal hamda slavyan ko‘rinishga ega. U nemis-turk aktrisasi Maryam Uzerli edi. Qisqa muddat ichida Savji ushbu rolni Uzerlidan boshqa hech kim yaxshi o‘ynay olmasligini anglab yetgan. Suratga olish ishlari boshlanishiga 10 kun qolganida Uzerli bosh rolga tasdiqlangan.

Maxsus kiyimlar va hashamatli liboslar

Sakkiz qismli hujjatli filmning alohida epizodi kostyumlar va liboslar ustida ishlash mavzusiga bag‘ishlangan. Nafis naqshlar bilan bezatilgan va qimmatbaho toshlar bilan to‘ldirilgan har bir libos taxminan 3500-4000 dollar turgan. Moda dizaynerlari har bir markaziy qahramon uchun 200 ga yaqin libos yaratgan, bu esa katta miqdordagi xarajatlar va tanqidlarga olib kelgan.

Mualliflar serialning muvaffaqiyatli chiqishiga ishonmagan

Loyiha mualliflari Meral Okay va Timur Savji avvaliga serial muvaffaqiyat qozonishiga ishonmagan, “Muhtasham yuz yil” ko‘plab mamlakatlarda e’tirof etilgan. Aynan shu serial tufayli Usmonlilar sulolasi tarixiga qiziqish ortgan, shu mavzuga oid kitoblar sotuvi ko‘paygan. Aktyorlar o‘rtasidagi munosabatlar va ziddiyatlar hanuz ijtimoiy tarmoqlarda hikoya qilinmoqda. Bu orada Maryam Uzerli va Halit Ergench munosabatlari real hayotga ham ko‘chgani haqidagi mish-mishlar ham tarqalgan. Bundan aktyorning rafiqasi Berguzar Korel xavotirda bo‘lgan.

Xulosa qilib aytganda, hujjatli film “Muhtasham yuz yil” yaratilishi haqida qimmatli ma’lumotlarni beradi va aktyorlar duch kelgan qiyinchiliklarni ochib beradi. Film aktyorlar haqidagi xotiralarni yangilaydi hamda ular turk va jahon televideniyesining keng ko‘lamli tarixiga qanday kirib qolgani haqida hikoya qiladi.