Hammasi shundan boshlandi: mashhur turk aktyorlarning birinchi rollari

Eng ulkan muvaffaqiyat ham doimo birinchi roldan boshlanadi. Ba’zan bu asosiy va muhim rol bo‘ladi, ba’zan esa kichik rol, biroq loyiha butun dunyoga tanilgani sababli har bir aktyor yulduzga aylanadi. Shunday hollar ham bo‘ladiki, kinodagi ilk tajriba muvaffaqiyatsiz chiqadi, ammo maqsadga intiluvchan va shijoatli iste’dodlar yulduzlar sari mashaqqatli yo‘llarini davom ettiradi. Keling, mashhur turk aktyorlari va ularning hammasi qaysi rollardan boshlangani haqida gaplashamiz.

Burak O‘zchivit

Mubolag‘asiz aytganda, jahon miqyosidagi yulduz turk kinosining ramzlaridan biriga aylandi. U butun dunyo bo‘ylab uchrashuvlar uyushtiradi, Rossiyaga tez-tez tashrif buyuradi. Ko‘plab hamkasblari kabi Burak O‘zchivit ham kinoga podiumdan kirib kelgan: modellik sohasida yutuqlarga erishgach, kino sanoati vakillarining e’tiborini jalb etgan.

Kinodagi ilk tajribasi “Minus 18” (2006) nomli ko‘p qismli dramatik triller bo‘ldi. Burak serialda politsiya komissari Murat rolini ijro etdi. Muvaffaqiyatli debyutdan so‘ng O‘zchivit bir qancha asosiy rollarga taklif etildi: “Yuqtirilgan”, “Istanbulning kichik sirlari” va boshqa seriallarda. Keyinchalik aktyor “Muhtasham yuz yil”, “Choliqushi”, “Akam” filmi hamda butun dunyo muxlislari sevib tomosha qiladigan ko‘plab asarlarda bosh qahramonga aylandi.

Kivanch Tatlitug‘

Aktyorning yo‘li ham podiumdan boshlandi. Biroq Kivanch Tatlitug‘ modellik olamiga kirolmasligi ham mumkin edi: yakka-yu yagona o‘g‘lining dizaynerlikda o‘qishdan mamnun emasligini ko‘rgan onasining maslahatiga quloq soldi. Bo‘lajak aktyor sahnalarda yulduz bo‘lib porladi, mashhur dizaynerlar bilan hamkorlik qildi, ammo modellik karyerasi uzoqqa cho‘zilmasligini anglab yetdi. Shu bois u aktyorlikka qiziqib qoldi, maxsus kurslarni tamomladi va ko‘p o‘tmay o‘zining ilk bosh rolini qo‘lga kiritdi.

Kivanch “Kumush” (2005) serialida ilk bor ko‘rindi, darhol tomoshabinlar hamda rejissyorlarning e’tiborini tortdi. Bugungi kunda uning filmografiyasida 20 ga yaqin ish mavjud. Ular orasida “Menekshe va Xalil”, “Taqiqlangan sevgi”, “Mard va go‘zal”, “Trubadurlar festivali” va boshqa ko‘plab asarlar bor. Ularning aksariyatida u bosh rollarni ijro etgan.

Xalit Ergench

Xalit Ergench yoshligida dengizchi bo‘lishni orzu qilgan: uzoq sayohatlar romantikasi unga hayotdagi eng yorqin sarguzasht bo‘lib ko‘rinardi. Biroq yigit konservatoriyaga o‘qishga kirib, opera qo‘shiqchiligini o‘rgandi va vokal bilan shug‘ullandi. O‘sha paytda aktyor bo‘lishga qat’iy qaror qilgandi.

Ta’limni tugatgandan so‘ng dastlabki paytlarda Xalit rejissyorlar e’tiboridan chetda qolgani uchun reklamalarda suratga tushish va musiqiy filmlarda qatnashish orqali pul topardi. Ko‘p o‘tmay u seriallar epizodlarida ham rol o‘ynay boshladi. Masalan, “Telbalar” (1996) va “Qora farishta” (1997) seriallarida. Ko‘pchilik muxlislar to‘liq ma’noda uning karyerasi va shuhrati “Zerda” (2002) seriali chiqqandan so‘ng kelgan deb hisoblashadi.

Kerem Bursin

10 yoshidan boshlab yosh Kerem Bursin oilasi bilan AQSHda yashay boshladi. Yigit yoshligidanoq aktyorlik kasbini orzu qiladi, ammo otasi o‘g‘li uchun jiddiyroq karyerani ma’qul ko‘radi. Kerem oliy o‘quv yurtiga kirib, marketing sohasida ta’lim olishga harakat qildi, biroq qalbi kino olamiga intilardi. Onasining qo‘llab-quvvatlashi bilan u aktyorlik mahoratini o‘rganishga kirishdi. Bu oson kechmadi: pulsiz qolgan paytlarda Bursin oilasidan yordam so‘rashni istamay, ofitsiant va haydovchi bo‘lib ishladi.

Bir kuni prodyuser va rejissyor Rojer Korman tirishqoq va yoqimtoy Bursinni ko‘rib qolib, uni kastingga taklif etadi. Kerem Bursin birinchi epizodik rolini “Payshanba” (2006) jangari filmida ijro etdi. Ko‘p o‘tmay, Kerem turk kinosida o‘z o‘rnini topdi. “Quyoshni kutib” seriali namoyishidan so‘ng aktyorning shuhrati tez sur’atda o‘sa boshladi.

Fahriye Evjen

Fahriye Evjen maktab yillaridan boshlab spektakllarda qatnashgan. Ammo oliy ta’lim muassasasida sotsiologiya va menejmentni o‘rganishga harakat qiladi. Mutaxassislik unga yoqmagani sababli ta’til paytida qizga turk filmida suratga tushish taklifi kelganda, o‘qishni ikkilanmasdan tashlab ketadi.

Kino sanoati vakillari onasi bilan ta’tilga kelgan Fahriyeni Istanbulda ko‘rib qolishadi. Shunday qilib, u “Sog‘inch” (2005) seriali epizodida suratga tushadi. Bosh rolda ishtirok etgan asari “Xazonrezgi” seriali hisoblanadi. Hozirda aktrisaning 20 ga yaqin ishlari mavjud, ular orasida “Alp-Arslon: Saljuqiy”, “Hayotimdagi gol”. “Sen mening uyimsan”, “Choliqushi” kabilar bor.

Hande Erchel

19 yoshida Hande Erchel go‘zallik tanlovida ishtirok etib, faxrli ikkinchi o‘rinni egallaydi. Shundan so‘ng uni jurnallarda suratga tushish va kino sinovlariga taklif etishadi. Ko‘pchilik Erchelning karyerasidagi birinchi roli “Choliqushi” seriali bo‘lgan deb hisoblaydi, ammo bu unchalik to‘g‘ri emas.

Mazkur serialdan oldin u “Tatarcha ramazon” (2013) serialida rol o‘ynagan. Shundan so‘ng aktrisa yana o‘nlab loyihalarda, jumladan, “Butunlay boshqacha”, “Uzuk”, “Qalbim eshigini qoq” va boshqa ko‘plab asarlarda suratga tushadi.

Neslihan Atagul

Neslihan Atagul o‘smirlik paytida reklama agentligiga qo‘ng‘iroq qilib, kasting uchun kelishib oladi. Onasi qizining rejasidan mamnun bo‘lmasa-da, uni olib boradi va shu tariqa bo‘lajak aktrisani qo‘llab-quvvatlaydi.

Bir nechta reklama roliklaridan so‘ng, qiz “Birinchi muhabbat” (2006) dramatik komediyasida kichik rol ijro etadi. Tez orada u “Xazonrezgi” serialida qatnashadi. Professional aktyorlik ta’limini olgach, tobora ko‘proq film va seriallarda asosiy tarkibda rol ola boshladi. Hozirda uning filmografiyasida o‘ndan ortiq rol mavjud, ular orasida “Sevgi iztirobi”, “Ishq sohillari”, “Tun oxirida”, “Elchining qizi” va boshqa ko‘plab asarlar bor.

Maryam Uzerli

Maryam Uzerli aktyorlik kasbidagi ilk tajribasini 5 yoshida, otasining do‘sti boshqargan teatr sahnasida sinab ko‘rgan. Qizining iste’dodini payqagan ota-onasi uni san’at maktabiga jo‘natishgan. Oliy ma’lumot olgach, aktrisa Gamburg teatri sahnasida rol ijro etgan. Kinodagi debyut roli “Ikki kishilik ish” serialidagi ishtiroki bo‘lgan. 2008-yilda “Uchov” filmida va “Inga Lindstrem” serialida rol o‘ynagan.

Biroq haqiqiy muvaffaqiyat Maryamga turk serialida bosh rolni taklif qilgan dugonasining qo‘ng‘irog‘idan so‘ng kelgan. O‘sha paytda Uzerli Germaniyada tug‘ilib-o‘sgani bois turk tilini bilmas edi. Ammo bu qo‘l kelgan: syujetga ko‘ra, uning qahramoni qrim tatarlari tomonidan o‘g‘irlab ketilgani uchun uning talafffuzidagi aktsent ma’qul topilgan. Shunday qilib, aktrisa “Muhtasham yuz yil” serialida Xurram rolini o‘ynaydi.