Nurgul Yeshilchay turk kino va teatr olamining eng porloq yulduzlaridan biri. U o‘zining iste’dodi, betakror mahorati va ekranda jonlantirgan obrazlari bilan tomoshabinlar qalbidan chuqur joy olgan. Joriy yil 26-mart kuni 49 yoshga to‘lgan aktrisa san’atdagi faoliyati davomida o‘nlab filmlar va seriallarda ishtirok etib, xalqaro kino maydonida ham e’tirof etilgan. Ushbu maqolada biz uning ijodiy yo‘li, shaxsiy hayoti va san’atdagi o‘rni haqida batafsil ma’lumot beramiz.
Bolalik yillari
Nurgul 1976-yil 26-martda Turkiyaning Afyonkarahisar shahrida tug‘ilgan, so‘ng tez orada ota-onasi Izmirga ko‘chib ketishgan. Nurgul ismi “xushbo‘y” degan ma’noni anglatadi. Uning ismi “ko‘k choy” deb tarjima qilinadigan familiyasiga mos kelishi uchun shunday nomlangan.
Bo‘lajak yulduz maktabdan tashqari o‘ziga qo‘shimcha daromad yig‘ish uchun popkorn sotish bilan shug‘ullangan. O‘sha paytda hech kim uning kelajakda Turkiyaning eng mashhur aktrisalaridan biriga aylanishini bilmagan.
Nurgul aktrisa bo‘lish uchun maxsus ta’lim oldi: u Antaliya teatr maktabini, so‘ng Eskishehir universitetida aktyorlik kursini tamomladi. Diplomni olgach, Yeshilchay teatr sahnasini zabt etishga kirishdi. U ko‘plab spektakllarda, jumladan, “Gamlet” da o‘ynab, Ofeliya obrazini gavdalantirdi. Ma’lum vaqtdan so‘ng unga televideniyedan ko‘plab takliflar kelgani uchun Nurgul teatrni tark etishga qaror qildi.
Kino sohasiga ilk qadam
Aktrisa kinodagi debyutini 1998-yilda “Hammasi yaxshi bo‘ladi” komediyasida suratga tushishdan boshlagan. So‘ng Nurgul uch yil davomida “Ikkinchi bahor” serialida Gulsum rolini ijro etdi.
2001 yilda turk aktrisasi bir vaqtning o‘zida ikkita rolga taklif oldi: u Turkiyada 60-yillardagi harbiy to‘ntarish hikoya qilingan “Sharshara” dramasida hamda “90-60-90” nomli melodramasida ishtirok etdi. Ko‘p o‘tmay Yeshilchay “Qochayotgan mumiya” filmida latofatli Fotima rolini ijro etdi.
Aktrisaning birinchi bosh roldagi loyihasi “Ishkomli uy” dramasidagi Bahar obrazi bo‘ldi. Serial O‘zbekistonda 2003-yilda efirga uzatildi va minglab tomoshabinlarning qalbidan joy oldi. 2004-yilda Nurgul “So‘yla, Istanbul!” kinoalmanaxida zamonaviy uyqudagi go‘zal rolini ijro etgan.
“Farishtalar oroli” melodramasini suratga olish uchun Nurgul sochini qisqartirishi kerak edi, biroq bir yildan u go‘zal uzun sochlari bilan “Vaqtinchalik kelin” serialida namoyon bo‘ldi.
So‘ng aktrisa turk va nemis ijodkorlar hamkorligida “Jannat yoqasida” loyihada talaba rolini o‘ynadi. Film tanqidchilar tomonidan ijobiy baholandi va bir nechta nufuzli mukofotlarni oldi, jumladan, 60-Kann kinofestivalida “Eng yaxshi ssenariy” nominatsiyasida g‘olib chiqdi.
Karyera cho‘qqisi
2008-yilda Nurgul Yeshilchay teletomoshabinlarning sevimlisi aktrisasi sifatida Turkiyada mustahkam obro‘ va e’tiborga ega edi. Keyingi yillarda chiqqan “Sevgi va jazo” filmi aktrisani xorijda ham mashhurlikka erishishiga imkoniyat berdi. Tez orada aktrisa mamlakatdagi eng ko‘p gonorar oluvchi san’atkorlardan biriga aylandi va kino sohasida jadal ishlashda davom etdi.
2016-yilda Nurgul “Muhtasham yuz yil. Ko‘sem imperiyasi” filmida bosh rol — Ko‘sem sulton obrazini ijro etdi. Serial nafaqat Turkiyada, balki dunyoning boshqa mamlakatlarida ham eng ko‘p tomosha qilingan turk seriallaridan biri sifatida e’tirof etildi hamda nufuzli mukofotlarni qo‘lga kiritdi.
Yeshilchayga Gollivud filmida suratga tushish va rol uchun sochlarini kal qilib oldirish taklif qilingan, lekin u bunga rozi bo‘lmagan va rolni rad etgan. Ma’lum vaqt o‘tib aktrisa bundan afsuslanganini tan oladi.
Shaxsiy hayot
Nurgul Yeshilchay oilali erkaklar bilan hech qachon do‘st bo‘lmaslik hamda o‘zganing turmush o‘rtog‘iga qaramaslik prinsipiga qat’iy amal qilar edi. ammo shunday bo‘ldiki, aktyor Jem Yezer Nurgul uchun avvalgi xotini Selin Delmendan voz kechdi. Juftlik 2004-yilda turmush qurdi.
Jem ayoli Nurguldan 17 yosh katta edi. oilada Osman Nejat ismli o‘g‘il farzand dunyoga keldi. Ammo turmush uzoqqa cho‘zilmadi, oradan olti yil o‘tib ular rasman ajrashdi. Chunki Jem Nurguldan kino sohasini tark etishni talab qildi, ammo aktrisa o‘z kasbini juda yaxshi ko‘rar edi.
2018-yilda aktrisa prodyuser Nejati Kodjabay bilan munosabat o‘rnatdi. Ularning aloqalari jiddiy tus oldi va juftlik turmush qurishni rejalashtirayotgan edi, biroq 2019-yilda koronavirus pandemiyasi boshlandi va to‘y marosimi ortga surildi.
Nurgul Yeshilchay nafaqat iste’dodli aktrisa, balki mohir rassom hamdir. U rassomchilik san’ati sohasida ham ko‘plab yutuqlarga ega. Hozirda Nurgul ijtimoiy tarmoqlardagi sahifasini faol tarzda olib boradi va obunachilari bilan ko‘plab shaxsiy suratlarini bo‘lishadi.
Nurgul Yeshilchay bugungi kunda
Nurgul hozirda ham turli filmlarda suratga tushishda davom etmoqda. Uning so‘nggi loyihalaridan biri “Vidolashuv maktubi”seriali bo‘lib, unda oddiy oilada ulg‘aygan Ziyo ismli yigitni sevib qolgan Alanur haqida hikoya qilinadi. Ammo qizning badavlat va mansabdor ota-onasi bu munosabatlarga qarshi bo‘ladi. Ko‘p o‘tmay, yigit xayrlashuv maktubini qoldirib, uzoqlarga qochib ketadi, lekin oradan 30 yildan o‘tib, ularning taqdirlar chiziqlari kesishadi va o‘tmishdagi barcha haqiqatlar yuzaga chiqadi.
Aktrisaning O‘zbekistonga tashrifi va mojarolar
2022-yil 15-sentyabr kuni “O‘zbekiston” anjumanlar saroyida “Ipak yo‘li durdonasi” XIV Toshkent xalqaro kinofestivali doirasida “Turkiya kinosi kunlari”ning ochilish marosimi hamda kino ijodkorlar ishtirokida ijodiy kecha bo‘lib o‘tgan edi. Tadbirda kinoyulduzlar, taniqli rejissorlar, o‘zbek san’ati vakillari, ko‘plab turk kinosi yulduzlari, jumladan Burak O‘zchivit va Nurgul Yeshilchay ham ishtirok etdi.
Avvaliga Nurgul Yeshilchay sahnadagi o‘rindiqda o‘zini qirolichadek his qilayotganini va unga faqatgina toj yetishmayotganini aytib, hazil qildi. So‘ng jurnalist va tadbir tashkilotchisi bo‘lgan Shoira Raufboyeva o‘zining Facebook’dagi sahifasiga turk kinoijodkorlari o‘rtasida ro‘y bergan sovuq vaziyat, o‘zbek ijodkorlariga o‘rnak bo‘lishi kerakligi haqida yozib qoldirdi:
Turkiyadan tashrif buyurgan 9 ta aktyor sahnaga chiqib, tomoshabinlar bilan yuzma-yuz bo‘lishdi. Lekin o‘zbek “burakshunoslari” va Yeshilchay muxlislari tadbirni yarmini ularni kutib, ko‘chada o‘tkazishgan, boshlovchilar ikki qayta tantana bilan e’lon qilishsa-da, ular sahnaga chiqmagan. Va nihoyat Nurgul Yeshilchay sahnani bir burchagidan chiqib, o‘sha yerda qotdi. Hamyurt hamkasblariga nazar tashladi-yu, ikki qo‘lini cho‘ntagiga solib, g‘oz turib oldi. Uzatilgan mikrofonni ham qo‘liga olishni ep ko‘rmay, boshlovchining qo‘lidagi mikrofonga egilib, “Salom, yaxshimisizlar?” deb boshqa aktyorlar yoniga borib o‘tirmasdan, sahna ortiga o‘tib ketdi. Burak-ku umuman ko‘rinmadi.
Alisher Uzoqov ham turkiyalik aktyorlar Burak O‘zchivit va Nurgul Yeshilchayning Toshkent xalqaro kinofestivalida o‘z hamkasblariga nisbatan hurmatsizlik qilganiga munosabat bildirdi:
“O‘sha kuni sahnaga hammaga yetarli stul olib chiqib qo‘yilgan hamda dastur bo‘yicha turk aktyorlarining hammasi sahnaga birma-bir chaqirilib, o‘sha yerda o‘tirishi kerak edi. Nurgul va Burak oxirida chiqishi kerak edi, lekin ular chiqmadi. Sahnada juda katta tajribali aktyor ham bor edi, ‘Ertug‘rul’ serialida boshqa qahramonning otasi rolini o‘ynagan 75 yoshli turk aktyori Serdar Gokhan ham bor edi. Nurgul va Burak ular bilan bitta sahnaga chiqmaymiz, dedi. Keyin yoshi katta taniqli turk aktyorlari sovg‘a-salom berilib, sahnadan tushirildi hamda ular zaldagi birinchi qatordan joy olishdi. Shundan keyin Nurgul Yeshilchay sahnaga chiqib, o‘zini ko‘rsatdi. Juda o‘zini oladigan aktrisa ekan. Shunda 75 yoshli otaxon aktyor sahnaga chiqib, tomoshabinlarga “Sizlar bularning tashqi ko‘rinishiga, mashhurligiga qarab baho bermanglar. Avvalo yaxshi inson bo‘lishi kerak. Insonning qalbiga qarab baho beringlar”, dedilar. Men ularning gaplariga yuz foiz qo‘shilaman. Balki ularning sahna ortida qandaydir kelishmovchiliklari bo‘lgandir, lekin u narsa sahna ortida qolishi kerak edi. Tomoshabinlarga nisbatan hurmatsizlik qilmasliklari kerak edi. Nurgul Burakdan o‘tib tushadigan darajada og‘ir fe’l-atvorga ega ekan”, degan edi Alisher Uzoqov.
Izoh (0)