Tirik afsonalar: Dunyoga mashhur keksa yoshdagi turk aktyorlari

So‘nggi yillarda turkiyalik yosh va intiluvchan aktyorlar o‘z ijrosi va xarizmasi bilan tomoshabinlarning mehrini qozonib kelmoqda. Ammo ularga yo‘l ochib berganlarni ham unutmaslik kerak. Bugun mahorati, iste’dodi, tajribasi va serqirraligi bilan dunyodagi millionlab tomoshabinlar qalbini zabt etgan turk seriallarining faxriy aktyorlarini yodga olamiz.

Nebahat Chehre

80 yoshni qarshilagan turk aktrisasi 1960-yilda “Turkiya go‘zali” unvoniga sazovor bo‘ladi va aynan shu g‘alaba unga kino olamiga kirib keladi. Nebahat 19 yoshida debyut qilgan. Uning filmografiyasi bugungi kunda 100 ga yaqin filmlarni o‘z ichiga oladi.

Turk aktrisasi ishtirokidagi eng mashhur asarlari – “Taqiqlangan sevgi”, “Muhtasham yuz yil”, “Iyun kechasi”. Aktrisa oxirgi marta 2020-yilda ekranlarda ko‘rinish bergan. Turkiyada Nebahat Chehreni nafaqat kinematografiya, balki uslub timsoli deb bilishadi. 80 yoshli yulduzning tashqi ko‘rinishiga havas qilish mumkin.

Chetin Tekindor

79 yoshli Chetin Tekindor nafaqat teatr va kino aktyori, balki dublyaj ustasi va tajribali o‘qituvchi ham. Hamkasblari har doim u haqda o‘z ishining haqiqiy ustasi sifatida fikr bildirishadi. U har safar o‘z qahramonining hayotini yashaydi. Chetin hech qachon jurnalistlarga intervyu bermaydi va shaxsiy hayotini imkon qadar yashiradi.

Ko‘plab tomoshabinlar uning ijodini “Ichkarida”, “Qora amaki,” “Asi”, “Ayla: Urush qizi”, “Istilochi”, “Bobomning xalqi” kabi film va seriallar orqali bilishadi. So‘nggi yillarda Chetin Tekindorning sog‘lig‘i yomonlasha boshladi, biroq u professional ijrosi bilan tomoshabinlarni xursand qilishda davom etmoqda.

Majit Sonkan

72 yoshli turk aktyori kinoda ishlashdan oldin uzoq yillar davomida teatrda rol o‘ynagan. “Beqaror” serialidagi Nasux roli unga butun dunyo bo‘ylab mashhurlik keltirdi. Bundan tashqari, u “Nafasimni yutib”, “Telba yurak”, “Men quyoshni ko‘rdim”, “Dilbarning sakkiz kuni”, “Kelin” kabi filmlarda ham suratga tushgan.

Tomoshabinlar Majit Sonkanni oxirgi marta 2021-yilda “Chuqur” serialida ko‘rishgan. Turk aktyori yangi rollar ketidan quvmaydi. U sevimli teatrida faol ishtirok etib, bo‘sh vaqtini oilasi davrasida o‘tkazishga harakat qiladi.

Erjan Kesal

65 yoshli aktyor birinchi marta 2002-yilda debyut qilgan. Aynan o‘shanda u “Begonalashuv” filmida rol o‘ynagan. Vatanida birinchi e’tirofni unga Muxtor rolini o‘ynagan “Bir paytlar Anatoliyada” (2011) kartinasi olib keldi. 2016-yilda esa Erjan butun dunyoga mashhur bo‘lib uyg‘ondi. U mashhur “Chuqur” serialida bosh rollardan birini ijro etgan. Kesal ekranlarda Idris Ko‘chavali obrazini gavdalantirdi.

Turk aktyorining filmografiyasida 40 dan ortiq loyiha mavjud bo‘lib, ularning aksariyati to‘liq metrajli filmlardir. Qizig‘i shundaki, aktyor 1982-yilda Egey universitetining tibbiyot fakultetini tamomlagan va ko‘p yillar davomida Keskin va Bale klinikalarida ishlagan. Baxtli tasodif tufayli Erjan faoliyatini tubdan o‘zgartirishga qaror qildi, va buning uddasidan chiqadi.

Ayda Aksel

62 yoshli aktrisa “Beqaror” seriali orqali tanilgan. Unda u Azize Aslanbey – salobatli va murakkab taqdirli ayol rolini o‘ynaydi. Ayda kinodagi debyutini 1994-yilda qilgan. U faqat 2010-yilga kelibgina mashhur bo‘ldi. O‘shanda Aksel “Yurak” serialida Nesrin rolini o‘ynagan. Aktrisaga 2018-yilda ekranlarga chiqqan “Tugun” seriali olamshumul mashhurlik olib keldi.

Uning filmografiyasi 30 ga yaqin loyihani o‘z ichiga oladi. Tomoshabinlar uni “Guljamol”, “Ota”, “Oila”, “Boychechaklar” kabi seriallarda ham ko‘rishgan.
Ayda Aksel Jan-Klod Van Damm bilan birga ishlashga muvaffaq bo‘lgan kam sonli turk yulduzlari qatoriga kirganini ko‘pchilik bilmaydi. 2006-yilda ular Turkiyaning “Imtihon” filmida birga rol o‘ynashgan.

Aydan Shener

Ushbu ro‘yxatda “Choliqushi” serialining bosh qahramonini eslamaslik xato bo‘ladi. Aktrisa 1983-yilda “Kichkina boshliq” serialida debyut qilgan va uch yildan so‘ng mashhur melodramada Feride rolini o‘ynagan. Aydan hozir ham kinoda suratga tushishda davom etmoqda. Uning hisobida turli xil filmlarda 30 ga yaqin rol bor. Tomoshabinlar uni “Sandiq hidi”, “Uch opa-singil”, “Yurak og‘rig‘i”, “Menejerimga qo‘ng‘iroq qiling”, “Deniz mening qalbimda” va boshqa ko‘plab loyihalarda ko‘rishlari mumkin.

Keng filmografiyaga qaramay, Shener rollarining aksariyati ikkinchi darajali. Aynan shuning uchun u ko‘plab tomoshabinlar uchun “Choliqushi”dagi Feride bo‘lib qoldi.